Балтач боксчылары Арчадан җиңү белән кайтты

Ильнур, 29 ноябрь 2016 - 13:59

2538

25-27ноябрь көннәрендә Арчада республиканың бокс буенча көнбатыш федерациясенең ябык беренчелеге үтте.

Балтач боксчылары Арчадан җиңү белән кайтты

Ярышларда алты район боксчылары өч көн дәвамында көч сынашты. Биредә районыбыз данын 10 боксчыдан торган команда яклады. Турнирның һәрбер көне спортчылар өчен җиңүләр дә, җиңелүләр дә алып килде.Әмма алар җанатарларының, остазларының өметләрен аклады. Районыбызга барлыгы 6 егет призер исеме белән кайтты.

Зөлфәт Сөнгатуллин, Раил Гыйләҗетдинов, Азат Мөхәммәтгалиев, Әмир Шәмсетдинов үз үлчәү авырлыкларында беренче булса, Илназ Хөсәенов һәм Артур Трофимов икенче урын яулады. Афәрин, егетләр, булдырдыгыз. Әмма әлеге җиңүләр генә аз, булдыклы егетләребез күп, шөгыльләнүләр җитми, дип саный тренер Фаил Фәсыйхов. Яшьләрнең спортка тартылмавына да бик борчыла.

- Балтач спорткомплексында һәр атнаның дүшәмбе, чәршәмбе, җомга, ә "Факел" клубында сишәмбе, пәнҗешәмбе, шимбә көннәрендә эшләүче бокс секциясенә һәркем рәхим итә ала. Балалар биредә бокс классикасына гына өйрәнеп калмый, үзендә ихтыяр көче дә тәрбияли. Ә монысы тормыш өчен иң кирәклесе, - ди ул.

Чыннан да, спорт мәктәбе аша узган һәркемгә тормышта үз юлын табу күпкә җиңел. Бигрәк тә, атаклы Рашит Тимербаев, Фаил Фәсыйхов, Васил Зәкиев һәм Илшат Галимҗанов кебек тренерлар җитәкчелек иткән секциядә шөгыльләнсәң...