Булган павильонны сүтеп аттылар, ә яңасы һаман да юк.

Ильнур, 12 февраль 2015 - 15:46

2402

Күптән түгел Норма авылы үзәгендәге Балтач ягына бара торган автобус тукталышы павильонын сүтеп аттылар. Ник аны бераз сабыр итеп, халыкның хәленә кереп, көннәр җылыта башлагач кына сүтеп булмадымы икән?!

Булган павильонны сүтеп аттылар, ә яңасы һаман да юк.

Хәзер күпме халык иртән эшкә, укучылар укырга барганда шул суыкта ачыклыкта туңып торырга мәҗбүр. Бар кешенең дә машинасы юк, җәяүлеләр барын да онытмасыннар иде җитәкчеләр.

Хәерчегә җил каршы дигәндәй, шуның өстенә Кариле поликлиникасының гомум практика табибы Әлфир Йосыповны да поликлиника бинасында ремонт эшләре булганлыктан, Балтач больницасына күчерделәр. Авырып табибка мөрәҗәгать итәсе яки больницаның көндезге стационар бүлегендә дәваланасы булса да көн дә шул тукталышка чыгып басабыз.

Бу мәсьәләне 30нчы гыйнварда Норма авыл җирлегендә уздырылган исәп-хисап җыелышында да күтәреп чыктым. Анда җитәкчеләр: "3-4 көннән икенче павильон вакытлыча булса да куелыр, ә яңасы җәй җиткәч булыр", - дип ышандырдылар. Инде 12 көн вакыт үтте, павильон юк. Халык автобус көткәндә җилле, суык көннәрдә Г. Нәсыйхованың "Раил" кибетенә кереп тула башлады. Кибет бит ул тукталыш урыны түгел.

Норма һәм Кариле авылы халкы исеменнән

Минниса КӘРИМОВА.

Фото: http://www.lipetskmedia.ru/news/view/32581-Lipyetskim_avtovladyeltsam.html