Хезмәт

7-тӥ январе Ымусьтонлы сӥзем праздник ужрадъёс ортчизы

Арлы быдэ Ымусьтон праздникез ёросамы бадӟым карыса пусъё — черкъёсын праздник вӧсьёс ортчо; нуназеяз но, ӝытаз но нылпиослы но вань калыклы сӥзем шулдыр но тунсыко ужрадъёс радъясько.

Туэ но та праздниклэсь асьмелэнъёс палэнэ ӧз кыле — праздник нуналэ Ципья Культура юртын, озьы ик Покчи Лӧзя Культура юртын Ымусьтонлы сӥзем концертъёс ортчизы.

Нокин понна секрет ӧвӧл ни, кылем арысен Ципья черк бордын  воскресной школа ужаны кутскиз шуыса (Покчи Лӧзя черк бордын сыӵе школа со дырозь но ужа вал ни). Калыкез шумпоттӥз ӵапак та школае ветлӥсь нылпиослэн, соосын ужась дышетӥсьёслэн но празднике пыриськем школаын дышетскись но нылпи садэ ветлӥсь вань нылпиослэн (шумпотымон, соос пӧлын православной осконэн пиналъёс гинэ ӧй вал), визьнодасьёслэн кужыменызы дасям бадӟым концерт программа.

Тужгес бадӟым люкетсэс концертэ пыртӥзы воскресной школае ветлӥсь нылпиос. Та нылпиослэсь тыршемзэс пусйиз кызьы отец Рафаил, озьы ик концертлэн мукет организаторъёсыз но. Соослэн верамзыя, воскресной школае нылпиос котькуд шутэтскон нуналазы азьтэмъяськытэк ветло.

— Мынам, учырен пайдаяськыса, туннэ анай-атайёслы вазиськеме потэ: нылпиосты воскресной школае ветлысалзы ке, туж умой луысал. Феофан митрополитмы но, Кирилл патриархмы но верало ук: нылпиосты оскон борды пичиысен кысконо. Мон уг шуиськы, черкын гинэ нылпиосты ӟечезлы дышето шуыса — озьы ӧвӧл со. Садик, школа выллем учреждениосын но нылпиос трос тодон-валан басьтыны быгато, оскон ласянь но. Но куке тӥляд нылпиосты черкын, воскресной школаын — тӥляд синкылиосты ӧжытгес луозы. Туннэ  сценае потэм нылпиос каникулъёсазы шутэтскытэк, нуналлы быдэ, дырзэс жалятэк, репетициосы ветлӥзы. Татын таукарон кылъёсты анай-атайёслы но, дышетӥсьёслы но, визьнодасьёслы но вераны кулэ. Асьсэ понна гинэ ӧвӧл, вань кадь матысьёссы, тодмооссы понна но вӧсясько тӥляд нылпиосты, — вераз отец Рафаил.

Воскресной школае ветлӥсьёс сяна, концертэ школаын дышетскись, садике ветлӥсь нылпиос но пыриськизы: нылпиос аспӧртэмлыко но тунсыко эктонъёс возьматӥзы, чебер кырӟанъёсты быдэстӥзы. Пусйыны кулэ, арлы быдэ сямен нылпиослы ческыт кузьымъёс дасяны трос нимаз ужбергатӥсьёс, озьы ик черке ветлӥсь прихожанъёс юртто.

Концерт программа йылпумъяськем бере, ужрадэ лыктэм котькуд нылпилы но кузьым сётӥзы. Соос пӧлысь тросэз сцена вылэ потыса Ымусьтонлы но Выль арлы сӥзем кылбуръёссэс веразы. Вуоноын концертэ пыриськем но, концертэз учкыны лыктэм нылпиос но воскресной школае ветлозы шуыса оскем потэ.

— Концерт туж кельшиз. Туж шумпотымон, Ымусьтонлы сӥзем концертамы арысь аре тросгес но тросгес нылпиос пырисько шуыса. Озьы ик тани мар нош шумпоттэ: азьло пиналъёс Выль арлы школае, садике дасям кылбуръёссэс лыдӟо ке вал концертын, табере нимысьтыз Ымусьтонлы сӥзем кылбуръёсты дышетскыса лыкто. Озьыен, соос праздник сярысь тодо, солы дасясько, соин тунсыкъясько. Малпасько, Ымусьтон праздник сярысь нылпиос арысь аре тросгес но тросгес тодо, сое Выль арлэсь но тросгес витьыны кутско шуыса, малы ке шуоно соос огшоры кузьымъёс гинэ уг басьто, асьсэос но концертэ пырисько. Та пиналъёс понна шумпотымон луэ. Шумпотымон соиз но: туэ концертэ пыриськизы трос студентъёс. Азьло троссэ концерт программаез ачим дасясько вал ке, туэ трос дышетӥсьёс но юрттӥзы,  бадӟым тау соослы. Зэмзэ ке верано, ваньзылы тау шуэме потэ: отец Рафаиллы но — со спонсоръёсты шедьтӥз, концертын кутсконысеныз пумозяз пукиз, нылпиосты но люкаськем калыкез ӟечкылаз; концертэз учкыны лыктэм калыклы, озьы ик нылпиослэн анай-атайёссылы — соос одӥг кыл вератэк нылпиоссэс репетициосы лэзизы; клубын ужасьёслы — шутэтскон нуналъёсты тодытэк, милемын валче репетициосы ветлӥзы, клубез усьтӥзы, — шуиз праздникез радъясь, Ираида Жукова.

Покчи Лӧзяын но Ымусьтон концерт арлы быдэ сямен шулдыр ортчем. Воскресной школае ветлӥсь нылпиос, школаын дышетскисьёс трос кужымзэс поныса, концертэз умой, калыклы туж кельшымон дасяны быгатӥллям. Татын но концертэ вань матысь гуртъёсысь трос калык люкаськем, анай-атайёс но нылпиосынызы ӵош лыктӥллям.

— Концертмы туж шулдыр пӧрмиз. Кузьымтэк но нокин ӧз кыльы —  сценаын выступать каремъёс но, концертэ лыктэм нылпиос но — ваньзы асьсэ кузьымъёссэс басьтӥзы. Кузьымъёс сярысь верано ке, коньдон ласянь юрттӥсьёстэк уг луы, малы ке шуоно соослэн кужыменызы нылпиослы сомында кузьымъёс дасяны быгатӥзы. Бадӟым тау шуыны кулэ коньдон ласянь вань юрттӥсьёслы . Озьы ик бадӟым тау ваньзылы концертэз радъясьёслы. Нимаз ик отец Рафаиллы, солэн кузпалэзлы матушка Натальялы, ваньзылы воскресной школаын ужасьёслы — соос нылпиосын концерт программа дасязы, — шуиз Галина Петрова. 

Галина Денисовна ачиз но та концертэз ортчытонэ трос кужымзэ понӥз — нылпиосын со но концерт номеръёс дасяз. Озьы ик концерт йылпумъяськем бере, Галина Денисовна нылпиос понна фойеын ёлка котырын шудонъёс но ортчытэм — нылпиос шудӥллям, анай-атайёссы но вӧзазы луиллям. Огъя вераса, Покчи Лӧзяослэн праздниксы но, котьку сямен, туж тунсыко но пайдаё ортчем.  

 

Реклама
Нравится
Поделиться:
Реклама
Комментарии (0)
Осталось символов: