Хезмәт

90 аресъем юбиляр

«Ошен гыриды ке, галоши сётом, шуыса ужатӥзы» Сизнер гуртын улӥсь Анисия Павловна Ивановалы 1 июне 90 арес тырмиз.

Балтась районлэн исполнительной комитетэзлэн кивалтӥсезлэн нырысетӥ воштӥсез Ильшат Галимуллин, социальной услугаосты возьматӥсь центрлэн директорез Гульнара Ахмадиева, Смаиль гурт поселенилэн главаез Рифнур Юсупов, «Смаиль» обществолэн валтӥсь экономистэз Розалия Фазылзянова юбилярез ӟечкыласа, солы шуныт мылкыд каронъёссэс веразы. Президентлэсь Владимир Путинлэсь Ӟечкылан открытказэ, Балтась муниципальной районлэн главаезлэсь но берло ужам интыысьтыз но гурт поселенилэсь кузьымъёссэс вуттӥзы.

Анисия Павловна Вуж Кушкет гуртысь вылэм. Отын вордскем но будэм, 7 класс тодон-валан басьтэм, нош собере кышкыт ож дыр кутскем. Семьяын бадӟым нылпи луыса, солы сузэръёссэ но учконо луэм, бадӟымъёсын колхоз ужъёсты но быдэстоно...

«Со аръёсысь тодэ ваёнъёсы — гырыку вал интые ош кыткылӥзы. Музъемез бушын кельтыны уг яра, гыроно. Милемыз гырыны ош  кыткыны косо вал. Нош кулэ нормаез ужады ке, галоши сётом шуыса ужатӥзы. Вужмем усьто кутме куштыса выль галоши дӥсяны мылкыды сокем кужмо луэм, мон вань шуг-секытъёсты но чиданы тырши. Мыным галоши дӥсяны шуд усиз... Колхозын уж ар ӵоже но ӧз бырылы. Валъёсты ути. Вылаз ик нюлэс кораны келяллязы. Колхоз бригадаын пӧртэм ужъёсты быдэсъяй.

Агрофинья анаймы кужмо висемез бере кыллиз, султыны ӧз быгаты ини. Кема аръёс ӵоже сое ути. Но берпум шокчемзэ ӧй кылы, уже кыли. Бертыса пырыкум анай кулэмын вал. Та секыт адӟонэз нокызьы вунэтыны уг луы. Одӥг гинэ сузэре Наташа Можга пала ужаны кошкемын вал. Отын со бызиз но отчы улыны кылӥз. Туннэ нуналэ но сӧл-таза, 88 арессэ тырмытэ», — тодэ ваёнъёссэ вера юбиляр.

Анисия Ивановна 1952 арын Сизнер гуртэ бызе. 7 ар но 7 толэзь армиын служить карем солдыт пиен — Егор Афанасьевичен семья кылдытыса, 6 нылпи будэто. Туннэ нуналэ юбилярлэн 8 внукез, 7 правнукез вань. Со кык пиосыныз, Михаилэн но Николаен, улэ. Озьы ик та гуртын улӥсь Люба нылыз но ӵем гинэ юрттылэ. Жаляса верано, улонысь эшезлэн — Егорлэн улонэз вакчи луэ, со 58 аресэн кулэ.

Анисия Павловна кема аръёс ӵоже «Смаиль» обществоын тыршыса ужаз, отысен дано шутэтсконэ потэ. Юбилеен ӟечкыланы лыктэмъёсты со тау карыса пумитаз. Кивалтӥсьёс мӧйы муртэз уг вунэто шуыса сюлмысен шумпотӥз.

Теги: юбиляр
Нравится
Поделиться:
Реклама
Комментарии (0)
Осталось символов: