Анастасия нимо Сизнер ныл вордскемез бере ик экранысь кизилилы пӧрмиз

Республикаын тодмо луэмезлэн мугез нош тани ма бордын: та нунылэн анай-атайёсыз 2018-тӥ арлэн 1-тӥ январьысеныз ужаны кутскем федеральной законъя выль пособие басьтон понна, республикаын нырысетӥ луыса, документъёссэс сётӥллям.
Туэысен нырысетӥ нылпизы вордскем ӧжыт доходэн семьяос выль законъя ватсам пособие басьтыны кутскозы. Со понна семьяысь членъёслэн одӥг муртлы шорлыдын доходзы 1,5 поллы йылэтэм улон минимумлэсь вылӥ луыны кулэ ӧвӧл. Солэн быдӟалаез регионъёсъя висъяське,  Татарстанын пособие 8490 манет луэ. Со сяна, Тарасовъёслы нылпи вордскем бере одӥг пол тыриськись 16 сюрс манет  тыр пособие но сётэмын луоз.
Егит семьялэсь шумпотонзэ люкыны вуылӥзы ТНВ каналысь журналистъёс, фотографъёс но операторъёс. Ас юанъёссэс соос  Тарасовъёслы но сётӥзы, районысь социальной отделлэн кивалтӥсезлы но, район кивалтэтлы но сётӥзы.
Огъя вераса, бадӟым тыршись семьялы  ваньзы синмаськизы. Районысь  исполнительной комитетлэн кивалтӥсез Рамиль Шакиров, Смаиль гурт поселенилэн главаез Рифнур Юсупов егит семьяез нырысетӥ нылпиенызы ӟечкылазы.
Тӥни озьы 2018 арын районамы нырысетӥ вордскем ныл быдэс Татарстанлы тодмо луиз. Вуоно улонзы сыӵе ик сайкыт но шудо мед луоз. Та сярысь пыр-почгес лыдӟыны луоз вуоно газетлэн номерысьтыз. Озьы ик та сярысь передача возьматэмын вал ТНВ каналын но.