«Анаймы милемыз пичиысен ужаны дышетӥз» (+фоторепортаж)

26-тӥ куарусёнэ Бадӟым Лӧзя 1-тӥ люкет гуртын улӥсь Плотникова Раиса Андреевна 90 аресъем юбилейзэ пусйиз. Сое вордскем нуналэныз ӟечкыланы вуизы Балтась ёросысь исполнительной комитетлэн кивалтӥсез Айдар Хайрутдинов, Покчи Лӧзя гурт поселенилэн главаез Сергей Мухин, озьы ик ёросысь социальной удысысь но «Сурнай» обществоысь представительёс. Соос юбилярлы тазалык, каньыл но шудобуро улон сӥзизы. Кузьмазы РФ-лэн Президентэзлэсь ӟечкылан открытказэ, район главалэсь Таукарон гожтэтсэ но трос кузьымъёс. Плотникова (Медведева) Раиса Андреевна 1931-тӥ арын Покчи Лӧзя гуртын трос нылпиё семьяын (соос сизьым кузя нылпиос луиллям) вордскем. Атаез, Андрей Тихонович, ожын ивортэк ышем. Раиса Андреевнаен вераськонмы но со бордысен кутскиз. — Атаймес жугиськонлэн нырысетӥ нуналысеныз ик оже басьтӥзы. Озьыен, ми семьяямы тямыс кузя кылимы — анаймы Агафья Николаевна но ми, сизьым нылпиосыз. Самой бадӟым апаймылы, Валялы, соку 12 арес луэ, нош мыным — 9. Семьяямы апаенымы самой бадӟым нылпиос ми луиськомы вал бере, самой секыт ужъёс но ми выламы луизы… Гужембыт бусыын тыршимы, ӟегез арамы, культо керттӥмы, гуртысь колхозын озьы ик сюрлоен арамы… Укмыс арес шоры учкытэк, мыным валэн но ужаны тупаз, малы ке шуоно гуртын воргоронъёс ӧз кыле шуыны луэ — ваньзэсты фронтэ басьтӥзы. Валъёсын ми фермаысен бусые кыед нуллӥмы. Нош сӥзьылзэ школае ветлӥмы. Дӥськутэн секыт вал бере, ветлӥмы фуфайкаосын но кутъёсын. Урокъёс бере шутэтскон сярысь малпаськыны дырмы ӧй вал — дышетӥсьёсынымы хозяйствоосысь пень, тылобурдо кыед, кагазъёс люканы ветлӥмы. Анаймы конюх луыса ужа вал бере, ми Валя апаенымы школа бере солы юрттыны ветлӥмы: гидысь пудо сылон интыосты сузямы, толалтэ бусые кыед поттылӥмы. Пичи луэммы шоры учкытэк, котькыӵе ужъёсты ужамы. Нюлэскысь ӧм ик бертэ шуыны луэ. Ӝожтӥськеме уг поты — ож дыръя ваньзы озьы улӥзы ведь ини, нокинлы капчи ӧз луы. Егитъёс со дыръёс сярысь мед тодозы кадь потэ, — Раиса Андреевна шуак, син куспын пичи дыраз берытскыса, тодэ ваёнъёссэ вераны кутскиз. 90 аресэз шоры учкытэк, Раиса апай егит дырзэ умой тодэ но малпанъёссэ рос-прос вераны быгатэ. Солэн туннэ но синъёсыз ӝуало (син медаз усьы), зэмос арлыдзэ пурысьтам йырсиосыз гинэ шараяло. — Сиён-юонэн секыт вал, — азьланьтэ улонэз сярысь веранзэ Раиса апай. — Нуналаз кык пол сиськимы, потлэсь шыд сиимы. Картофка со аръёсы ӧжыт но векчи вал, урод будӥз. Соин анаймы шыдэ картофкаез лыдӟыса гинэ тыре вал — одӥг адямилы быдэн кык паламтэ векчи картофка. Тулыспал, лымы шунаны кутскыку, ми, кӧтмы сюмамысь, коневниклэсь (конский щавель шуо) выжыоссэ пуртэн бугыръяса но сиимы. Сиён милемлы уг тырмы вал, сютэм ветлӥмы… Малы ке шуоно турынэн шыд сиыса кӧтмы ӧз тыры — тордэ гинэ вал. Анаймы сютэм луэмысьтыз но секыт ужлэсь катьтэммиз но тушак вылысь вырӟыны ӧз быгаты. Соку ми доры ёросысь эскеронэн вуизы но, номыр сиёнмы луымтэысь, ньыль килограмм пызь выписать каризы. Собере анаймы со пызез одӥг пуньыен потэн шыдэ ватсаса пӧзьтылӥз… Раиса Андреевна веранэз куспетӥ син азяз пуктӥз аслэсьтыз анайзэ, песяйзэ, вынъёссэ-сузэръёссэ, апайзэ… Кӧня шуг-секытъёс пыр потӥллям соос ӵошен, кӧня ыштонъёсты адӟиллям. Но котьку ӵошен луиллям, ог-огзылы юрттыса улӥллям. — Тол кезьыт вал, пу ӧй вал. Соин школа бере ми салазкиосын шур дуры бадьпулы ветлӥмы. Солэн ньӧръёсыз векчиесь вал, ма, соосыз но ӧжыт луизы. Со дыръёсы пулы нюлэске ветлыны уг лэзё вал, соин шур дурысь векчи но кот ньӧръёсты люканы тупаз, гурез эстыса коркаез шунтон понна. Озьы тӥни мон сизьым классме йылпумъяй.., — маде Раиса Андреевна. Пичи дырысеныз ужаны дышыса будэм Раиса сизьым классэ йылпумъям дырысеныз колхозын ужаны кутске. Анайзылэн дышетыны кужмыз луымтэысь, сизьым нылпиосыз пӧлысь огез но сизьым класс сяна тодон-валан басьтыны уг быгаты. Ачиз Раиса ужан сюрессэ нюлэс погыръян бордысен кутске. Кӧня ке дыр ортчыса, валэн ужаны но кутске — Шеморданэ тысь нуллэ. — Милям анаймы туж ужась вал. Милемыз пичиысен ужаны дышетӥз, «кыӵе уж борды басьтӥськиды ке но, пумазйылаз вуттэ» шуэ вал. Котьку тыршыса ужаны косӥз милемыз. Соин огмы но ужлэсь ӧм кышкалэ. Пичи дырысен бадӟымъёсын артэ, соосын огкадь ужамы. Тӥни озьы ужакумы, одӥг нуналэ витьымтэ шорысь ож быриз но вормон вуиз шуыса ивор вуиз. Мыным соку дас куинь арес вал. Тодысалды ке, кыӵе ми шумпотӥмы соку: кин тэтчаз, кин бӧрдӥз, ваньзы «Ураа» шуыса черекъязы… Сое син азе но пуктэмды уз луы.., — синкылиоссэ ватыса, вормон нунал сярысь тодэ ваёнъёссэ вера Раиса апай. Ож быремен, улон калленкаллен азьланьтӥське. Бен, нокинлы капчи уг луы, Раиса апайлэн семьяезлы но. Атайзы ожысь бертымтэ бере, анайзылы, Раиса апайлы, Валя апаезлы трос тыршоно луэ покчи вынъёссэ но сузэръёссэ сюдонвордон понна. 1955-тӥ арын Раиса апай Бадӟым Лӧзя 1-тӥ люкет гуртэ Василий нимо пиосмуртлы картлы кошке. Почтаын ужакуз (Раиса Андреевна, колхозын ужамез сяна, ассэ кӧня ке дыр ӵоже почтаын но утем) газётъёсты нуллӥсь Раиса вуоно кузпалэныз тодматске. — Капка выжыяз сылэ вал со. Со дыре песяез ураме потӥз но монэ кубиста сиыны ӧтиз. Мон пыри, ӧтем бере… Али соку сиёнъёс ӧй вал ук… Озьыен тӥни тодматскимы, эшъяськимы Василиен. Со кылтэм-пельтэм (глухонемой) вал, ужаз пилорамын. Туж ужась вал со, ужысеныз бертыса но шутэтсконэз ӧз тоды: сапегъёсты кышъяз, вуриськиз. Уйбыт ӧз изьы. Плотник но вал али со. Куспамы соин ӟеч улӥмы, умой адями но пиосмурт вал Василий, — тодаз вае Раиса апай нырысетӥ кузпалэз сярысь. Василийлэн но Раисалэн кык нылпиоссы вордско — Павел (1956) но Любовь (1959). Жаляса верано, нылпиосыз пичи дыръя ик, Раиса апайлэн кузпалэз висьыса кулэ. Василийлы соку ваньзэ-ӧвӧлзэ 29 арес гинэ луэ. Но улон азьланьтӥське, кык пичи нылпиосызлы атай, аслыз Раисалы оскымон кузпал кулэ луэмысь, егит кышномурт Пермьысь бертэм Валерий нимо пиосмуртэн семья кылдытэ (таиз кузпалэз но кемалась, 1981-тӥ арын кулэм ини). Соослэн Фёдор нимо пизы вордске (жаляса верано, Фёдор но кемалась ӧвӧл кулэм). Кышноезлэсь нылпиоссэ Валерий яратэм, обижать карымтэ. Нош ужам со Ушмаысь кирпич заводын. Ачиз Раиса Андреевна трос аръёс ӵоже гуртысьтыз колхозын, фермаын тыршем, пудо-живот вордӥсь луыса ужам. — М о н п уд о о с т ы т у ж яратӥ. Парсьпиосты куроен ӵушылӥсько вал, жаляса но мусо карыса. Дорын но парсьпиосты, ыжъёсты, скалъёсты, кунянъёсты вордӥ, — шуэ песянай. 55 аресэз тырмем бере, Раиса апай пенсие потэ. Туннэ нуналэ но со улэ Бадӟым Лӧзя 1-тӥ люкет гуртын. Юртазы соос вить ӵошен уло: Раиса апай, Александр внукез, Роза кенэз но соослэн кык нылпиоссы. Раиса апай улонэзлы туж шумпотэ: — Туала улонын туж умой улӥськомы, сютэм ум улӥське, кураськыса ум ветлӥське. Шумпотӥсько, нылпиосы монэ учко, утё, Роза кенэ туж умой, ваньмыз ласянь юрттэ. Нылы но котьку татын. Туннэ нуналэ вить внуке но укмыс правнуке вань ини. Соос понна улӥськод ини, пересьмем бере, — шуэ со, пальпотыса. Раиса Андреевналэн медальёсыз но вань. 1947-тӥ арын «За доблестный труд в Великой Отечественной войне 1941- 1945 г.» медален пусйиське, 1988-тӥ арын — «Ветеран труда» медален. Кема вераськимы Раиса Андреевнаен азьвыл но туала улон сярысь. Туж сюлмаське вылэм песянай удмурт кыллэн вуоноез сярысь но. — Кызьы удмурт адями удмурт кылэз уз тоды ини… Тани мынам нылпиосы но, жаляса верано, удмурт кылын уг верасько. Ма, атайзы ӟуч вал. Нош тани мон удмурт бере, мынам сыӵе удмурт кылын вераськеме потэ. Куаш-куаш вераськысал — адямие ӧвӧл. Яра али бускель Мание ветлэ, соин ке но вераськиськомы. Мукет кинэн вераськом? — юаса кадь вера Раиса апай. Нош мон кема малпаськытэк шуи: «Монэным». Раиса апай озьы верамелы туж шумпотӥз но пальпотыса серекъяз: табере солэн нош одӥг удмурт кылын вераськись эшез ваньук...

Фото Ольга Плотникова