Аркадий Михайлович Кунаев - Ӟаны клублэн заведующиез
Аркадий Михайлович вордске 1932-тӥ арын Ӟаны гуртын. Та гуртын клублэн заведующиез луыса армиысь бертэм бераз, 1955-тӥ арын, ужаны кутске. Ужез борды соку ик кылкутымон басьтӥське.
Художественной самодеятельностен выре, Шор Кушкет, Сала Кушкет, Пор Кутеш, Вуж Кушкет, Карек-Серма, Сизнер, Турья, Вукогурт, Покчи Лӧзя но Тагашур гуртъёсы спектакльёс возьматыса трос ветло. Библиотекарьлэсь ужъёссэ но быдэсъя: нуналлы быдэ нуназеяз библиотекае нылпиос люкаськизы, ӝытаз — егитъёс. Нылъёс но пиос трос книгаос лыдӟиллям, газет-журналъёсты учкиллям. Читательской конференциос но, лекциос но, вераськонъёс но орчытъям Аркадий Михайлович.
— Аркадий Михайлович егит дырысеныз пенсие потытозяз Ӟаныын тыршиз ини. Ачиз клублэн заведующиез но вал, ачиз ик художественной руководитель но. Удмурт ансамбльлэн кивалтӥсез но луиз со. Пётр Николаевич Кубашевен (Ципья школаын ужам, школаысь ансамблен кивалтэм — ред.) огзылы-огзы юрттыса ужазы. Казаньысь оперной театрез усьтонэ но ансамбльёсынызы пыриськизы, Вормон нуналлэсь 10 ар пусъёназ но Казаньын вал соос. Куно карыны но туж быгатӥз со. Ӵемысь ансамбль коллективзэ дораз кӧланы кельтэ вал. Ӟаны ансамбльлы, ма калыклы но, Аркадий Михайловичен туж удалтӥз. Туж каньыл, туж положительной адями вал со. Котьку серекъясь, коллективез понна ваньзэ сётыны дась вал, котькинлэн куспаз пыриз. Коллектив но сое туж яратӥз, — тодаз ваёнъёссэ вераз Ципьяысь Елизавета Абрамова.
«Туж усто вал суредаськыны, гожъяськыны но чебер гожъяськиз. Праздникъёс азьын ачиз плакатъёс гожъя, афишаос суреда вал. Агитаторской ужен но выриз», — шуиз со сярысь Ӟаныысь Михаил Папаев.
