«Асме таза адямиосын одӥг радын лыдъяны быгатэменым данъяськисько»

Сюбегатэм физической луонлыкъёсын улосчиосмы понна радъям кудаз гинэ ужрадэ эн пыриськы, одно ик Ева Александроваез адӟод, туж мыло-кыдо ини та кышномурт шуыса малпаськыны кутскиськод. Вылаз ик трос учыре со серьёзной ужъёсты но быдэстэ: кузьымъёс понна яке коньдон ужпумъёс понна кыл кутэ. Асэныз Еваен вераськем бере но солэсь макем визьмо, азьпал учкись но ужпуме вутскись сямо луэмзэ шӧдӥськод, талы примеръёс но уно.

— Ева Семёновна, газет лыдӟисьёсмес асэныды матынгес тодматэ вал.

— Мон Балтасьын вордски. Анае сярысь вераны быгатӥсько, атае сярысь уг, малы ке шуоно сое туж ик уг тодӥськы. Анае мынам Сала Кушкет гуртысь – Игнатьева Зинаида Семёновна, 1940 арын вордскемын. Мон удмурт, анае но удмурт.

— Анайды ож дырысь нылпи вылэм.

— Озьы, атайзэ, яке мынэсьтым ӵужатайме, оже келяллям. Со пленэ шедем но отын бырем. Анаез огназ куинь нылпи будэтэм, кык пи но одӥг ныл. Анай – куинетӥ нылпи. Ож бере школаын дышетскем, ялан анаезлы юрттыса улэм. Анайлы пӧртэм интыосын ужано луэм, лэсьтӥськонын но тыршем, гын сапег но, кирпич но лэсьтэм, берпуметӥ ужан интыез — школаын. Со отын утялскем. Пенсие потыса но ужаз али, 60 арес тырмыса гинэ кошкиз.

— Балтасьын вордскем ныллэн пинал, егит дырыз кытын ортчиз?

— Балтась нылпи садэ ветлӥ, собере 5-тӥ классозь школаын дышетски. Анай монэ, врачъёсын вераськыса, Казаньысь 4-тӥ номеро интернатэ интыяз, отын 11 классозь дышетски. Со дыре школаосын 10 класс гинэ луиз. Туж умой вал отын, дышетӥсьёс но ӟечен гинэ тодэ кылизы, умой тодон-валан басьтӥ. «4»-лы но «5»-лы гинэ дышетски. Экзаменъёсты но умой сётыса, аттестат басьтӥ. Со аттестатэн Казаньысь кооперативной техникуме пырыса, бухгалтер-экономист ӧнерез басьтӥ. Кык ар, кассир луыса, универмагын ужай. Универмагез пытсазы, базар каризы, со дырозь ужай, 1990 арозь луэ ини.

— Тӥляд туж чебер нылпиосты но вань!..

— 1998 арын картлы кошки, одӥг арскын нылмы вордскиз. Мусо но ӟеч луыса будӥз со, 2009 арын сентябре Максим вордскиз, кыкез но нылпиосы сентябре вордскемын. Инмарлы тау, сӧл-таза улӥськом. Нылы картлы кошкиз, куинь но ӝыны аресъем внукмы вань ини, Серёжа ним сётӥмы, со нылпи садэ ветлэ. Нылы Казаньын ужа. Вамышлы быдэ Инмарлы тау карисько, сӧл-таза гинэ мед улозы. Серёжа внуке ас пие кадь потэ, туж яратӥсько.

— Тӥледыз ӵемысь мусо но бордаз кыскись пиеныды ӵош адӟиськом…

— Максим! Максим ДЦП диагнозэн вордскиз, кык но ӝыны аресозь ветлыны ӧз быгаты, ки йылам нуллӥ, кык китӥз кутыса гинэ ветлэ вал. Пиеным уно больница сюресъёсты лёгано луиз, тазалыкез тупатон центръёсы но ветлӥмы. Али Максимлы 13 арес. Казаньын, мон дышетскем интернатын ик тодон-валан басьтэ, ударник. Отын сое эмъяло но, визьнодало но, тодон-валан но сёто. Вить нунал ӵоже дышетско, пятницаозь, собере кык нунал шутэтско. Арня пумын доре вайыны тыршисько, куатетӥ арзэ озьы тодон-валан басьтӥськом ини. Дорын дышетскыны ӵектӥзы вал, соглаш ӧй кариськы, Максимлы адямиосын вераськыса, кусып возьыса дышетсконо.

 — Ева, асьтэ сярысь но уногес вералэ вал.

— Мон пуктэм ужпуме вутскыны тыршись адями, активной улон нуисько. Спортэз яратӥсько, шашкиен но шахматэн шудӥсько, капчи атлетикаен вырисько.  Шашкиен но шахматэн умой шудэмелы ачим но паймисько (серекъя — ред.). Инвалидъёслэн огазеяськонзылэн ужаз пыриськисько. Чулпан Габдулганиеваен, Геннадий Слепцовен ӵош спорт удысын вырйылъёсты басьтӥмы шуыса но вераны луысал, дыр. Али мынам аресэ ортчиз ини, ас ветлэм пытьыостӥм Максимез нуллыны тыршисько. Пие но спортэз яратӥз, боччаен выре, футболъя командае басьтӥзы — Казаньын школа-интернатлэн командаяз шудэ. Школалэн футбол шудыны ас интыез вань, туж чебер лэсьтэм площадка, отчы пото. Соосын паралимпийской чемпион Ирина Полякова но ужа, ӵошен волейбол, баскетбол шудо. Кыӵе спорт видъёс вань, котькудаз соосты пырто.

— Ужпумъёсы вутскон понна туж бадӟым тыршон кулэ…

— Валтӥсез, тэк пуконо ӧвӧл, активной улон сямен улоно. Ачим но мыло-кыдо улыны тырши, пиналъёсме но куашкам мылкыдлы сётскытэк, адямиосын кусып возьыса улыны дышетӥ. Нылы, ачим кадь ик, куинь кылэз но тодэ — удмуртсэ но, ӟучсэ но, бигерзэ но. Максим ӟуч сямен гинэ вераське. Бигеро-ӟучо вераськыку вала ик, юан ке сётӥд, валэктонзэ но вера. Бигер кылын но ответ сётыны тырше. Интернатын урокъёс ӟучен но бигерен нуисько.

— Туннэ улэмдэс кельшытӥськоды шуыса, пальпотӥсь ымнырдыя ик адӟиське!

— Пичи дыръям монэ ялан мыскыл карылӥзы, висись луэмысь, адямиос визьтэмен лыдъязы. Но мон аслым ужпум пуктӥ но солы вутски. Ачим сярысь мон тазьы ноку ӧй малпалля, адями азьын одно ик быгатонме возьмато шуи. Туннэ нуналэ мон сярысь, вормонъёсы сярысь «Хезмэт» но «Азьлане» газетъёсын гожто, монэ адӟо, мон сярысь верало, озьыен, адямиос азьын асме возьматыны быгатӥ, талы мон туж шумпотӥсько. Касса сьӧрын коньдонэн ужай, басьтӥсьёс «йырыд ужа-а ма тынад?» шуыса юаллязы, ӧй ке ужасал, кассае ӧй пуктысалзы угось. Адямиос азьын возьытэ усьымтэелы, калык пӧлын асме ыштымтэелы шумпотӥсько. Асме ачим ӝутыны быгатӥ, корка но пуктытӥ, али пичи юртын ум улӥське. Инмарлы тау, мунчо но лэсьтытӥ, коркан душ, туалет, мисьтаськонни вань, ву пыртэмын, кошкон интыез но радъямын.

— Ева, азьпаллы кыӵе планъёсты вань?

— Максим пиме адями карыны тыршисько, мукет муртъёс азьын ассэ возьматыны мед быгатысал шуыса малпасько. Та ӧрын чаклам ужъёсы вань, каллен ваньмыз быдэстӥськоз. Вӧзам умой адямиос вань дыръя, малпанъёсы вутскыны луэ. Фагиль Гайнутдиновлы тау, со юрттэ ини милемлы, туж тырше ми понна. Милемын туж ик выремзы уг поты, коньдон уг тырмы. Эшъёсы но туж умой, Казаньын но, Балтасьын но уно. Соостэк номыр но карыны ӧй луысал. Улонмы каньыл мед луоз. Ваньмы но сӧл-таза мед уломы, Инмарлы тау карыны мед быгатомы.

— Вераськемды понна бадӟым тау, Ева! Малпанъёсаз вутскем мурт шудо луэ, шудо-буро мед улоды!