«Асьмеос валче тыршомы, удмурт калык мед азинскоз шуыса»

Ужрадлэн валтӥсез эскероно ужпумез ёросысь удмуртъёслэн национально-культурной огазеяськонзылы выль кивалтӥсез быръён луиз шуыса ивортӥськеммы вал ини.

«Мон вань сюлмысь оскисько, тӥлесьтыд осконъёстэс зэматыны быгато шуыса. Озьы ик оскисько, тӥ мыным котькуд ласянь юрттоды но шуыса. Малпасько, асьмеос ваньмы ӵош, дэмен та ужез азинтомы, асьме огазеяськонмы, асьме удмурт калыкмы мед сяськаялоз шуыса», – ас мылкыдъёссэ вераз «Кенешлэн» огкылысь луыса быръем выль кивалтӥсез, Ольга Мироновна.

Мазэ веранэз, котькыӵе выль уж борды басьтӥськыку кышкан мылкыдъёс луо, дыр, уката но калыкен ужан сярысь верано ке. Ольга Мироновналэн но сыӵе малпанъёсыз вал, дыр. Но Балтась ёросысь исполнительной комитетлэн кивалтӥсезлэн воштӥсез Ильгам Гайнутдинов та кышканъёсты тӧлӟытӥз шуыса оскем потэ. «Асьме ёросысь удмуртъёслэн огазеяськонзы кема аръёс ӵоже адӟем карымон вал республикамы понна. Туж трос лэсьтэмын вал, али но лэсьтӥське азинскон, луэмзэ утён но вуоно поколенилы вуттон понна. Мон малпасько, азьланяз но, выль тӧролэн кивалтэмез улсын но, Балтась удмуртъёслэн НКА-зы пример луыса ужалоз шуыса. Мон оскытӥсько, ёрос администрация, кивалтэт ласянь мон котьку но, котькызьы но юртто», – кыл сётӥз Ильгам Фидаелевич. «Ӟечкыласько, азинсконъёс Тӥледлы! Ӝутскем вырйылэз ыштытэк, огъя кыл шедьтыса, азинлыко ужаны мед кылдоз, асьме ёросысь удмуртъёслэн огазеяськонзы азьланяз но быдэс элькунмылы адӟем карымон мед луоз», – ватсаз на кивалтӥсь.

Та ужлэсь кулэлыксэ Татарстанысь удмуртъёслэн НКА-зылэн тӧроез Андрей Сергеевич но пусйиз. «Зэм, та кылкутымон уж, кызьы шуэ Леонид Дмитриевич, дантэм уж, но со дыре ик туж кулэ уж но со. Со кулэ адямиос, калык понна, соин асьмеос ке ӧм выре, валамон, пумен со таркаськоз, асьмеос ассимилироваться кариськомы, мукет калыкъёс пӧлы сылмомы но сям-йылолъёсмы, лулчеберетмы, Атаймузъеммы уз ни луы. Соин но ваньмыз асьме киын. Шумпотымон, элькун, ёрос кивалтӥсьёс, Ильгам Фидаелевич котькуд кутсконъёсты умоен лыдъяло но котькуд ласянь юртто, «вож тыл» сёто. Эшшо вуоноез ар но Татарстанын Анай кылъёслэн но калык огазеяськонлэн арез луоз. Соин элькунамы солы бадӟым саклык висъяськоз. Озьыен, со тулкымын ёрос понна но, элькунмы понна но пайдаё луись трос ма лэсьтыны луоно. Но интыысь кивалтӥсьтэк сое лэсьтыны уз луы…», – шуиз Татарстанысь удмуртъёслэн НКА-зылэн тӧроез Андрей Герасимов.

Та секыт ныпъетэз ӝутыны, та ужез азьланьтыны Ольга Мироновна вормоз шуыса оскемзэ Леонид Дмитриевич но вераз. Солэн азинлыко ужамезлы оскыса но азьлапаллы мылкыд каронзэ но вуттӥз. «…Та уже Ольга Мироновна бӧрсьы лыктӥсьёс Президентлэн интыужаз кадь ӧвӧл ке но, но мылзы потыса, 2-3 кандидат ке но, асьсэды асьсэос мед ӵектозы вал ини», – шуиз 20 ар ӵоже «Кенеш» НКА-ен кивалтэм Леонид Сапожников.

«Кенешлы» кивалтӥсь быръем сяна, та ужрадын мукет ужпумъёс но эскериськизы на. Андрей Сергеевич Татарстанысь удмуртъёслэн вуоно арлы чаклам ужрадъёсъя дорожной картаенызы тодматӥз. «Туж оскисько, коронавирусэз асьмеос вормомы но очной ужрадъёс ортчозы шуыса», – шуиз со. Ваньмыз умой ке луиз, вуоно арын нылпиос понна «Мудорвай» вожвылъяськонэз ортчытыны малпало ини, озьы ик 2021 арын мытыны чаклало нылпи садысь визьнодасьёс пӧлын тужгес устооссэ быръён вылысь нимысьтыз конкурс. Кызьы пусйиз Андрей Сергеевич, та конкурсъёсын покчи пиналъёсын ужан цикл йылпумъяське но солэн шумпоттӥсь бервылыз луыны кулэ: школае мыныса анай-атайёс но, нылпи но анай кылэн удмурт кылэз мед быръёзы. «Ӵапак «Мудорвай» но визьнодасьёслэн вожвылъяськонзылы луыса ми чакласьком со ужпумез быдэстыны, азьланяз асьмелэн кадръёсъя резервмы мед луоз шуыса», – пусйиз кивалтӥсь.

Школаын дышетскись нылпиос понна Кукмор ёросын опытэн вошъяськонъя улосвылкуспо конференция ортчытӥське – таиз школа арлыдэн нылпиос понна ортчытоно ужрад луэ. Куинетӥез ӧр – со «БиГерд» форум, кудӥз егитъёсты огазея. Ньылетӥез – со бадӟымъёсын ужан. Татчы «Гырон быдтон» праздникез пыртыны луэ. Вуоно арын элькун масштабен ортчись «Гырон быдтон» Агрыз ёросын луыны кулэ. Но, кызьы верамы ини, ваньмыз умой луиз ке, сюбегатонъёс ӧз ке луэ. Нылпи садъёс сярысь вераськон потэм бере, асэрказ юан кылдӥз: асьме ёросамы удмурт пиналъёс понна нылпи садъёсын ӧвӧл удмурт кылъя занятиос. Соин покчиёзо школае лыктыса, анайатайёс паймо, кыӵе туркыме сётыны пиналзэ: удмуртэ-а, бигере-а? Та зэмзэ но, бадӟым проблема, малы ке шуоно нылпи сад – со пиналъёсты визьноданын одӥгез валтӥсь ӧр.

«Та проблемаез ми Ольга Мироновнаен валче эскеромы. Котькуд кык толэзьскын кусып тупатыса ёросын кылдэм вань шуг-секытъёс эскерисько, тӥледын, ёросэн, республикаен валче утчаськом соосты сэрттон-пертчон амалъёсты. Лулчеберетъя но Дышетонъя министерствоосын кусыпъёсмы умой, табере тани Президентлэн аппаратэныз но (Марина Анатольевна Иванова табере Президентлэн аппаратаз йӧскалык ужпумъёсъя ужа – О. П. )…», – оскытӥз Андрей Сергеевич. Туала технологиос кузёяськон, ивортодэт ӝог вӧлмон вакытэ улӥськом. Андрей Сергеевич но пусйиз, ивортодэт вӧлмытон амалъёс пыр пропагандалэсь кулэлыксэ. Асьмелэсь ужаммес возьматыны кулэ шуиз со газетмы пыр но, пӧртэм мерлыко интернет вотэсъёс пыр но, адямиос мед тодозы, асьмеос вань шуыса, асьмеос ужаськом но азинскиськом шуыса.

«Асьмеос валче тыршомы удмурт калык мед азинскоз, мед сяськаялоз шуыса, калык сямъёсмес но лулчеберетмес асьме нылпиосмы мед узырмытозы шуыса. Ӟеч сюрес асьмелы!», - тӥни таӵе ӟеч сӥзёнъёсын йылпумъяз аслэсьтыз веранзэ Андрей Герасимов.