Августина Алдыровалы — 90 арес

5-тӥ толсуре 90 аресъем юбилейзэ пусйиз Вуж Турья гуртын улӥсь Алдырова Августина Александровна. Ёрос кивалтэтысь представительёс, юбилярез вордскем нуналэныз ӟечкыласа, Россиысь Президентлэсь ӟечкылан открытказэ, Балтась ёросысь главалэсь Таукарон гожтэтсэ, сяська керттэт но кузьымъёс сётӥзы. Та нуналэ Августина апай доры самой матысь адямиосыз люкаськиллям вал.

Августина Александровна — гумырез ӵоже тазалыкез утён удысын ужам мурт. Аслаз тыршеменыз но кулэ карыса дышетскеменыз со 8 классэз йылпумъяны быгатэм.

— Кезьытэн но, пӧсен но ужамы. Куддыръя урокъёс бырытэк ик ужаны мыноно луылӥз — колхозлы юрттоно вал ведь.., — тодаз вае юбиляр.

1953-тӥ арысен кутскыса но пенсие потытозяз со тыршем Янгулысь больницаын. Трос аръёс ӵоже дезинфектор луыса ужам. Ветлон сюресэз но матын луымтэ — Августина Александровна Вуж Турьяе картлы кошкем но кузпалэныз со гуртын улэм. Али но отын улэ.

— Трос пыдын ветлӥськиз. Мынам ужам дыръёсы ведь нылпиос туж висё вал, пӧртэм инфекциос трос луизы. Пенсие потытозь но отын, больницаын, ужай мон. Кӧня ке дыр ӵоже санитарка но луыса ужай, дезинфекторлэн штатэз быремысь. Медсестра луыса но вить ар ӵоже тырши. Огъя вераса, кыӵе гинэ уж ӧз оске, ваньмыз борды басьтӥськи, пыр-поч быдэсъяны тырши, — ужам аръёсыз сярысь вера юбиляр.

Августина Александровналэн куинь нылпиосыз вордско — Юрий, Иван но Людмила. Туннэ нуналэ песянай куать внукезлы но укмыс правнукезлы шумпотыса улэ. Жаляса вераны кулэ, кузпалэз, Серафим Михайлович, кемалась кулэм ини.

— Улӥсько Иван пиеным но Тамара кенэным. Семьяеным мыным удалтӥз, туж шумпотӥсько. Соос монэ утё, учко, огнам уг кельто, — шумпотэ Августина Александровна.

Августина апай — чырткем песянай. Туннэ но со ачиз усто пӧраське, сиён пӧзьтэ. Син медаз усьы! Али кема аръёс ӵоже матысьёсызлэсь шунытсэс шӧдыса, сӧл-таза луыса улыны мед кылдоз солы. Кылем арын песянай доры куное вуылыкум но, 89 аресъем Августина Александровна гидкуазяз ветлэ вал. Арлыдэз шоры учкытэк, песянай ураме потылыны тырше. Соку со милемыз «Инмарлы тау, мон шудо адями, мынам ваньмыз вань» шуыса пумитам вал, али но со улонэзлы уг ӝожтӥськы, улон солы пӧртэм эскеронъёсты дасям вал ке но.

P.S.: Августина Алдыровалэн улон-вылонэз сярысь кылем арын гинэ газетамы статья потэм вал. Сое шедьтыны быгатоды «Азьлане» газетлэн 39-тӥ номерысьтыз.