Балтасьын тужгес умой педагогъёс ӵошатскизы
19 феврале Балтась шоръёзо школалэн базаяз «Арлэн тужгес умой визьнод сётӥсь педагогез» зональной конкурс ортчиз. Та ӧнер устолыкъя конкурсын 8 районысь визьнодан ужъёсъя тужгес усто педагогъёс кужымзэс эскеризы.
Арча, Атня, Высокая Гора, Саба, Кукмор, Пестрецы но Балтась районъёсысь педагогъёслэсь кылдытэм командаос нырысь ик районысь культура центрын конкурсэз усьтон торжествое люкаськизы. Та ужрадэ 200 пала адями пыриськиз. Куноосты ӟечкыласа, районысь исполкомлэн кивалтӥсез Рамиль Шакиров ас умой мылкыд каронъёссэ вераз:
— Тӥ азьын выступать карыны мон понна туж умой, малы ке шуоно мон ачим но ужан сюресме дышетӥсьлэн ӧнерез бордысен кутски. Соин мон дышетӥсьлэсь ужзэ вылӥ гажаса учкисько. Нылпиосын ужан арысь аре секытгес луэ. Сыӵе дыре тӥ Дышетӥсьлэсь Дано нимзэ утьыса, ас кужымдэс но энергидэс сётыса тыршиськоды. Тӥляд секыт ужды азьын но нылпиосты яратонды азьын мон йыбырттӥсько. Туннэ та конкурсэ лыктыса тӥ ини вормись луиды. Татын тӥ устолыктэс эшшо огпол эскероды, выль идеяос кутыса бертоды. Вормонъёс тӥледлы!
Сӥё-дано усьтон ужрад дышетӥсьёслэн пыриськеменызы дасям концерт номеръёсын азьланьтӥськиз. Ӝутскем мылкыдын дышетӥсьёслэн группазы Балтась шоръёзо школаын люкаськиз. Конкурс кутскиз. Шара занятие возьматон понна ваем юрттэт амалъёс пӧлын кыӵеез гинэ ӧй вал. Самолёт но, нылпиосын лэсьтэм сяськаос но, гелий шаръёс но — пыриськемъёс кужмо дасяськыса лыктӥллям.
32 конкурсант ас ӧрезъя 4 пӧртэм номинациын устолыксэ возьматӥз. Асьсэсын тодматон понна видео амалэн лэсьтэм визитной карточка ӵектӥзы. Шара занятиосты возьматыкузы но туала техникаен интыяз пайдаяськыны быгато шуыса возьматӥзы. Конкурсантъёслэсь выступлениоссэс жюри дунъяз.
Асьме районысь та конкурсэ 4 педагог пыриськиз. «Ватсаса тодон-валан сётӥсь педагог» номинациын Покчи Лӧзя шоръёзо школалэн базаяз ужась внешкольной ужъёсъя центрысь педагог Чулпан Гарафиева 1-тӥ инты басьтӥз. «Классэн кивалтӥсь» номинациын Ципья шоръёзо школаысь дышетӥсь Ираида Жукова 3-тӥ интые потӥз. Озьы ик та конкурсэ «Педагог-организатор» номинациын пыриськем Балтась гимназиысь Равиля Шарипова но «Педагог-психолог» номинациын ас устолыксэ возьматэм Балтась шоръёзо школаысь психолог Гульчачак Мамлиева пыриськемзы понна сертификатэн пусйиськизы.
Районмылэсь данзэ утем котькуд конкурсантлы тау кареммес вуттӥськом но соосты сюлмысен ӟечкыласьком. Нош Ираида Жуковалы но Чулпан Гарафиевалы азьпалан витись республиканской конкурсын вормонъёс сӥзиськом.
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев