Балтасьысь Денисова Мария Гавриловналы — 90 арес

Озьы ке но удмурт кылын но, ӟуч кылын но, бигер кылын но вераськиз милемын. Нош милесьтым верам кылъёсмес кылыны, валаны кызьы гинэ ӧз тыршы ке но — ӧз быгаты. Ӝӧк вылаз но пӧртэм эмъюмъёс радызъя сыло. Бен, аръёс аслэсьтыззэ басьто...

Мария Денисова 1929-тӥ арын Бадӟым Лӧзя гуртлэн II-тӥ люкетаз вордске. Пичи дырыз секыт аръёслы тупа. Тросэз со аръёсы вордскем нылпиос кадь ик, Мария но вазь ӵукнаысен уйинозь колхозын пӧртэм ужъёсты быдэсъя. Ӵем тодаз вайылэ со тракторын ужамзэ но пушнерлэсь шыд сиемзэ. Но та аръёсты пичи Мария чида... Бадӟым будэм бераз Ижевске картлы кошке. Кузпалъёслэн пизы вордске. Малпано кадь, вань шуг-секытъёс сьӧре кылемын — шумпотыса улы но улы. Но жаляса верано, Мария Гавриловна картэныз кема ик улытэк люкиське. Собере пиеныз ӵош Балтасе улыны бертэ. Татын со ужаны интыяське мех фабрикае вуриськись луыса. Пенсие потытозяз та ужын, Балтасьын, тырше. Туннэ нуналэ солы пересьмон дырзэ огназ пумитано луэ шуи ке, уг янгыша, дыр. Бен, Мария Гавриловналэн пиез, куинь внукез, куать правнукез вань. Но пиез аслаз семьяеныз кыдёкысь Сургутын улэ, анаез доры ӵем куное бертыны уг быгаты — арлы огпол гинэ вуылэ. Мария Гавриловнаез социальной службаысь Таслима нимо нылкышно уте. Солэн верамезъя, Мария Гавриловна — туж аккуратной кышномурт, юртаз но котьку чылкыт, сиёнзэ но со ачиз пӧзьтэ вылэм.

Ӝыны часлы гинэ лыктыса, ӟечкыласа кошкиськомы ке но, Мария Гавриловна кадь пересьёслы мамында шумпотон мылкыдъёс кузьмаськомы меда! Тани та учыре но кӧня шумпотон вуттӥзы район кивалтэтысь вуэм куноос. 90 аресъем юбилееныз ӟечкыласа, Мария Гавриловналы  РФ-лэн Президентэзлэсь ӟечкылан открытказэ, район главалэсь Таукарон гожтэтсэ сётӥзы, трос кузьымъёс кузьмазы, тазалык но кузь гумыр сӥзизы. Кошкыкузы песянай, куноослэн кузьмам шаленыз шобырскыса, шумпотэмзэ ватытэк, ваньмынызы киыныз шонаса люкиськиз. Али кема кошкись машинаосмы шоры кыдёкысен учкыса сылӥз со.