«Больницаын ужам аръёс — самой шудо аръёс луизы»

Одӥг пиез кулэмын, кыкетӥез аслаз семьяеныз Удмуртиын улэ. Анаез доры, шер ке но, бертылэ. Тазалыкез лябӟемын ке но ини, висёнъёслы кышномурт уг сётскы: каллен-каллен вамышъяса ке но, чипы-курегъёссэ учке, юртаз утялске, сиён пӧзьтэ. Юрттӥсез но, социальной ужась Ирина Захарова, вань. Висьыса ке но, одӥг синмын гинэ адӟыса ке но та дуннеын улэмезлы шумпотыса улӥсь нылкышно со доры куное лыктӥсьёсты пальпотыса пумита. Монэ но шумпотыса куно кариз.
Мария Гавриловна ас дыраз кема аръёс ӵоже Ципьяысь участковой больницаын ужам. Вераськонмы но та сярысь ик луиз.
— Мария Гавриловна, Ципьяысь участковой больницаын туж трос ӧнерчиос ужазы, али но ужало. Врачъёс, медсестраос, технической персонал — ваньзы ас ужзылэн усточиоссы луиллям. Тӥ но кема аръёс ӵоже больницаын тыршиллямды. Но больницаын ужаны кутскем аръёсты сярысь вераны кутскытозь, асэныды нырысь тодматэ вал.
— Мон шумпотыса ачим сярысь мадё тыныд. Ачид адӟиськод, огнам улӥсько, вераськыны адямие ӧвӧл. Бен, пие вань, но со кыдёкын улэ, ӵем куное бертылыны уг быгаты... Тани пересьмон даурам огнам улӥсько. Кузпалы но вить ар талэсь азьло кулӥз ни. Зэмзэ ке верано, гумыре ӵоже тэльмырыса улыны тупаз. Вордски 1936-тӥ арын Вуж Турья гуртын. Анае берлогес вералоз вал, со туж сютэм ар луиз шуыса. Дышетскыны но рос-прос ӧм быгатэ, вазь бадӟым улонлэсь шӧмзэ валамы. Гуртысь фермаын ужай. Нош ини 1966-тӥ арын Ципьяе картлы кошки но со ик аре татчы больницае ужаны пыри. Больницаын ужам аръёс самой шудо аръёс луизы шуыны быгатӥсько. Макем секыт луиз ке но ужаны но, улыны но — ӧм ӝожтӥське.
— Больницаын кин луыса ужаны кутскиды?
— Мон ужаны кутскытозь, больницае валтӥсь врач луыса ужаны Горячкин нимо врач лыктӥз, нимзэ вунэтӥ ни. Сокем йӧно но усто врач-хирург вал со. 1966-тӥ арын ужаны кутскиз. Горячкин монэ аслаз кабинетаз ӧтиз но пыр-поч эскериз: киосме, пыдъёсме, пиньёсме. Сюлмаськыса сылӥсько, малы ӧтиз меда та монэ но малы эскере меда шуыса. Паймеменым, мар карыны но мар вераны ик ёрми. Утид ке, нылпи ваён отделение санитарка кулэ вылэм. Горячкин эскере вылэм, ярасько-а, уг-а мон та уже. Яраськем. Отын ведь висисьтэм адями гинэ ужаны быгатэ вал. Со нуналысен нылпи ваён отделениын санитарка луыса ужаны кутски.
— Но отын тӥ кема ӧд ужалэ шуыса тодӥсько. Трос аръёс ӵоже та больницаын тӥ сиён пӧзьтӥсь луиллямды.
— Куинь ар ужай нылпи ваён отделениын. Куинь арскын выжтӥзы кухняе ужаны. Отын ини кема ужай — 27 ар ӵоже сиён пӧзьтӥ. Асме ушъяса вераме уг поты, но сиёнъёсме яратыса сиизы, туж шумпотӥсько вал талы. Курласа верасьёс ӧз луэ. Ушъян кагазъёсты но сётӥзы. Аслэсьтым ужме радызъя быдэсъяй. Мар карыны куризы, ваньзэ ужай. Нокинэн ӧй но даллашы.
— Сиён пӧзьтӥсьлэн ужез тросгес кельшем, дыр, тӥледлы.
— Озьы вераме уг луы. Кыкез но огкадь вал. Кыкез но секыт, кылкутымон ужъёс. Та удысын ужамтэ адями сое валаны уз быгаты. Кухняын секыт вал ужаны. Вань кадь ужез киын быдэстоно луиз. Пуэн эстыса сиён пӧзьтӥмы, ӵукна куинь часэн лыктыса ужаны кутскиськомы вал. Мукет сямен сиёнэз вуттыны уг луы вал. Газ но ку гинэ потӥз, тыл но ӧй вал, лампаосын ужамы. Валэн бочкаен ву ваё вал, соосты киын пыртӥмы. Пельпумын ву пыртыса, пож вузэ озьы ик карнанэн поттыса кисьтаськомы вал. Ми, сиён пӧзьтӥсьёс, кык ӵошен вал — мон но мынам юрттӥсе. Монэным ужасьёс туннэ нуналэ ваньзы кулэмын ни... Нылпи ваён отделениын ужаку но капчи ӧз луы. Отын ведь туж чылкыт луыны кулэ. Миськем выжъёсты мамыкен ӵушыса эскеро вал, кылем-а ӧвӧл-а тузонэз. Лампочкаосты гинэ но сменалы быдэ миськимы. Сыӵе тӥни чурыт эскерон улсын ужамы ке но, пал кыл ӧм вералэ. Ужан интыям мынэме потыса гинэ улӥ. Врачъёс шабесь, коллектив умой вал, малы ужам уз поты?
— Пенсие потэмды бере уждылэсь мӧзмиды, луоз.
— Туж мӧзми. Сыӵе шулдыр пото вал ужам интыосы. Вуж больницаын гинэ ужай мон, выляз ӧй мыны ни. Гурласа ужаз больницамы. Трос врачъёс ужало вал. Мон, кызьы верай вал ни, Горячкин валтӥсь врач дыръя ужаны кутски. Но со татын куинь ар гинэ ужаз — сое Казане ужаны басьтӥзы. Кукморысь врач Миннехат Хадиевич Хафизов лыктӥз. Со пиньёсты эмъянъя врач вал. Собере валтӥсь врач луыса ужаз Рашит Шарипович Сафин. 5 ар ужаз но, сое Газинур Давлетович Давлиев воштӥз. Со кошкем бере ини Миннегаян Нуриевич ужаз (фамилизэ вунэтӥ). Кинэ ке, оло, вунэтӥськем но, дыр. Вожзэс медаз поттэ. Сыӵе тӥни эшлыко, бадӟым коллективен, тодӥсь-валась ӧнерчиосын ужам бере, кызьы ужлэсь уд мӧзмы ни? Ваньзы — врачъёс но, медсестраос но, технической персонал но — ас ужзылэн усточиоссы вал. Куспамы ваньмы тупаса ужамы.
— Кылэме вань, азьло Ципья больницае олокытысен но висисьёс вуыло вал шуыса. Зэм-а со?
— Кызьы верай ини, больница гурласа ужаз. Бадӟым вал со, 75 эмъяськонни койка тыр. Адямиез нош солэсь но тросгес луэ вал — раскладушкаосын кыллисьёс но трос луизы. Балтась ёросысь гинэ ӧвӧл, олокытысен но вуыло вал больницае. Марий Эл республикаысь тросэз ветлӥзы. Нылпи вайыны трос нылкышноос ми пала вуылӥзы — врачъёс умой шуыса лыкто вал. Туж данлы вал со больница. Табере, жаляса верано, вуж больница ӧвӧл ини. Аръёс ортчо. Больница вужмиз. Мон но пересьми. Улонэз берыктыны уг луы, шумпотыса улоно.
— Мария Гавриловна, вераськемды понна бадӟым тау. Секыт аръёсы улыны но ужаны тупам ке но, шуг-секытъёслы сётскытэк, уждылэн зэмос усточиез луиллямды. Шудо но каньыл улыны мед кылдоз тӥледлы.