Бультырак зымылӥзы

Бультырак зымылӥзы

Котьку сямен ик, Вукогуртысь старостамылэн Степанов Юрийлэн кичӧлтэмезъя эшшо одӥг ужрад ортчиз. Таяз со радъяз Йӧвылэпотон дыръя пыласьконэз, ачиз ик чакласа возиз пыласьконлэсь радлыксэ.

Гуртысь пиосъёсын кенешиллям, асьсэос ик егитъёс спонсоръёс кариськиллям, лэсьтӥськон арбериос басьтон понна. Нунал куспын клуб дорысь тыметэ пыласькон инты лэсьтӥллям. Вуэ пырем бере шунтӥськыны, ӝытпал кутскыса уйшорозь, будка лэсьтыса вуттӥллям. Пушказ пуктӥллям тепловой пушка, скамейка но кылиськон-дӥсяськон инты, шуныт выж лэсьтӥллям, электротыл кыскиллям.  Тани соос кибашлыос: Юрий но Василий Степановъёс, Константин Петров, Юрий Сидоров, Валера Тимофеев.  Костя мылысь-кыдысь басьтӥськем на шурпа, чорыг лым но чай пӧзьтыны, продуктъёс басьтыны. Ты дуре вуэме бере эшшо но пайми. Мар куспын отысь лымыез сузяллям, йӧэз вандылыса купель лэсьтӥллям, йӧлэсь ик Кирос пуктӥллям, йӧ блокъёслэсь котыртэм лэсьтӥллям. Тыметын тыршиллям вылэм Михаил Щербаков, Ильнар Закиров (таиз Ципьяысь), Василий Щербаков, Константин Петров но Валерий Тимофеев.

Гуртысьтымы пиосъёслэсь сокем тыршем ужзэс адӟыса, мон но пыласькыны дӥсьтӥ. Купель доры матэктыса ву вылысь йӧкурез адӟыса кышкаськем вал. Но, чурыт-чурыт кариськи, Инмарлы вазиськи но дыртытэк каньылэн пыласькыса потӥ. Номыр кышкытэз, сюлэмшугъяськонэз вылымтэ, ӧй но кынмы. Вуэ пырисьёс трос гинэ вал. Нырысьсэ пырисьёс шокпотыса, нош арлы быдэ пыласькисьёс, нокыӵе кариськытэк, бультырак зымылӥзы. Юра Степанов шуэ: «Туэ куазь кезьыт ӧвӧл бере, гань-гань, нош кезьыт дыръя эшшо но умойгес, вань мугор ӟырда, пар потэ, гольык пыдын йӧ вылын ветлыны луэ». Бускель гуртъёсысь но лыктэмъёс вань вал, Тагашурысь лыктэмъёс нылпиосынызы пыласькизы. Ваньмыз пыласькисьёс пичи ке но выльдӥськизы, тазатӥськизы, луоз.

Витьымтэ шорысь бадӟым кузьым лэсьтӥзы пиосмуртъёсмы. Чорыг лымзы но шурпазы зумыт (наваристой) ческыт пӧрмем, вуэ пырем бере пӧсь чай но интыяз луиз. Азьвыл Йӧвылэпотон дыръя ми, пичиос, салазкиосамы гырлы думыса нискыламы. Гурезь тыр гырлы куара жингыртӥз. Татын но Нина Кузнецова жингыр гинэ гырлы куараен ӝытэз шулдыртӥз. Тау тӥледлы мыло-кыдо луэмды понна. Юрт котырысьтыды уждэс кельтыса, гурт калык понна сюлмаськемдылы. Перемеч Зина апай но, та ужрад сярысь тодыса, егитъёс понна оброс азяз султыса сюлмысьтыз вӧсяськиз, Инмарлэсь куриз соослы тазалык, семьяязы тынӥсьлык, ужазы азинлык (со Инмарлы туж оскыса улӥсь).  

Вера Лобанова,

Вукогурт

Туспуктэм: В. Лобанова