Дано ужпумез быдэстӥсьёс

Газет бамъёсамы куке но статья поттӥмы вал ини егит волонтёръёс сярысь. Со Ципья шоръёзо школаысь 3б класслэн коллективез сярысь вал. Дышетскисьёс, анай-атайёс, классэн кивалтӥсьёс – ваньзы туж бадӟым но кулэ ужен выро. Тани дышетскон арлэн пумаз но соос СВО-е пыриськисьёслы юрттэт сётӥзы.

Куартолэзь – дышетскон вакытлэн самой секыт, со дыре ик самой шулдыр вакытэз луэ. Азьпалан – вунонтэм гужем нуналъёс но шуныт ӝытъёс. Сыӵе малпанъёсын йылпумъязы 3 класслэсь программазэ Ципья шоръёзо школаысь волонтёръёсмы но.

Шумпотымон, та дышетскон арез соос умой оценкаосын гинэ уг йылпумъяло, со сяна соос быдэс шаермылы но юрттыны вутско. Соослэн огкылысь луыса юрттон мылкыдэнызы, ёросысь волонтёръёслэн копилкаязы 4100 манет коньдон пыриз. Та ӟеч ужзэс волонтёръёс асьсэ группаязы но пусйизы:

– Йыбырттӥськом но тау кылъёс вераськом 3б классысь вань дышетскисьёслы, анай-атайёслы но классэн кивалтӥсьёслы – Екатерина Валерьевналы но Оксана Петровналы. Ваньдылы, кин аслэсьтыз кужымзэ пыртӥз нимысьтыз ожгар операци мынӥсь зонае келям гуманитарной юрттэтэз люкан понна. Тӥляд юрттэтты дунъянтэм, тужгес но дуно солэн ялан луэмез. Ми тау кариськом палэнэ кыльымтэды понна. Воргоронъёсмылы секыт, соиз валамон. Асьмелэн киосамы соослэн тазалыксы, шудбурзы но ӵуказе нуналзы. Инмар тӥледлы тазалык, шудбур но сайкыт инбам мед кузьмалоз.

Тодады вайытон понна пусйыны кулэ, 3б класс нимысьтыз ожгар операциысь воргоронъёслы туж бадӟым юрттэт лэсьтэ. Соос коньдонэн гинэ ӧвӧл, турын чайёс но, куасьтэм шыд но лэсьто, гуманитарной юрттэт люкало. Анай-атайёс умоен ӧй лыдъясалзы ке, пиналъёс но та уж борды сокем сюлмысь ӧй кутскысалзы, дыр. Озьыен, татын пичиысен ик сюлмо нылпиосты будэто ини.

Куарусёнэ пиналъёсты возьма выль дышетскон ар, дышетскон тубатлэн выль лёгетэз. Куинь толэзь туж чаль ортчоз, шӧдыса ик уд вутты, но воргоронъёсмылы юрттон куспетӥ медаз луы вал.