Хезмәт

Династилэн куинетӥ поколениез

Династилэн мукетыз азьланьтӥсез — Эшкеева-Кузнецова Раиса Алексеевна, Александра Фёдоровналэн бадӟым нылыз.

Со 1942 арын 19 мае Вуж Кушкетын вордскемын. 1949 арын Раиса Ципьяысь удмурт шоръёзо школаысь 1 классэ дышетскыны пыре (соку семьязы Ципьяе улыны выже). 1961 арын, атаезлэн алэмез шоры учкытэк, анаезлэсь сюрессэ азьланьтэ — Мензелинскысь педагогикая училищее дышетскыны пыре. Сое йылпумъямез бере, Раиса Алексеевна Балтась ёросысь Сизнер гуртысь покчиёзо школаын ужа, нош берлогес Ципьяын нылпиослы географияя тодон-валан сётыны кутске, малы ке шуоно заочно Казаньысь педагогикая кун университетын географияя факультетын дышетске. 2001 арозь дышетон удысэн уг люкиськы Раиса Алексеевна, дано шутэтсконэ Волжск городын ужакуз (Марий Эл республика) потэ (кузпалэныз отчы ужаны выжо).

Александра Фёдоровналэн кыкетӥ нылыз — Эшкеева-Иванова Галина Алексеевна — 5 августэ 1944 арын Вуж Кушкет гуртын вордскемын. 1952 арын Ципьяысь шоръёзо школае дышетскыны пыре, 1962 арын сое йылпумъя. Пичи дырысеныз дышетӥсь луыны малпам Галина Ижкарысь УдГУ-э дышетскыны пыре. Тазалыкез лябӟемен, физикая но математикая факультетысь куинетӥ курссэ йылпумъяса, со гуртаз бертэ но ньыль ар ӵоже Шор Кушкет школаын математикаез дышетэ. Отын ужакуз Галина Алексеевна Сала Кушкет гуртысь Леонид нимо пиен тодматске но солы картлы кошке. Егит семья огдырлы Марий Эл республикаысь Волжск городэ улыны кошке. Нялтас вераса, Галиналэн но Леонидлэн бадӟым нылзы Лилия но Волжскын вордске. Нош 1970 арын егитъёс вордскем палъёсазы берто но Галиналэн анай-атайёсыз дорын Ципьяын улыны кутско. Галина Алексеевна Ципьяын покчи классъёсты дышетыны кутске, та профилья Йошкар-Олаысь педагогикая университетын заочно тодон-валан но басьтэ. 1994 арозь Галина Алексеевна Ципья школаын дышетэ, нош собере кӧня ке ар ӵоже Шор Кушкет школаын ужзэ азьланьтэ. 1999 арын дано шутэтсконэ потэ. Туннэ нуналэ но Галина Алексеевнаез дышетскисьёсыз, соослэн анай-атайёссы, валче ужам эшъёсыз ӟеч кылын тодазы ваё. «Мынам ӵош дышетскем эшъёсы, анае сярысь веракузы, котьку сое небыт, нылпиосты туж яратӥсь дышетӥсь шуыса тодазы ваё. Но анай котьку чурыт куронъёсты пуктэ вал (со мынам но нырысетӥ дышетӥсе луиз)», — шуэ анаез сярысь нылыз Лилия Иванова.

Галина Алексеевна но Леонид Петрович кык нылъёссэс, Лилияез но Ольгаез, пыд йылазы султытыны быгато. Туннэ нуналэ Галина Алексеевна (жаляса верано кузпалэз кулэмын ини) Лия, Ксюша но Егор внукъёсызлы шумпотыса улэ.

Бадӟым стажен но опытэн дышетӥсь Галина Алексеевна район масштабын трос грамотаосын, озьы ик ТР-ысь Дышетонъя министерстволэн Почётной грамотаеныз но пусъемын.

Нош одӥгез куинетӥ поколениысь представитель  — Светлана Ильина, Антонида Григорьевналэн нылыз. Светлана 1960 арын Ципья гуртын вордскемын. Но Ципья школаын со одӥг ар гинэ дышетске, собере Карлыган гуртысь школаын дышетсконзэ азьланьтэ. Школаез йылпумъяса, Светлана, анаез кадь ик, дышетӥсьлэсь ӧнерзэ быръе но Йошкар-Олаысь институтэ физикая но математикая факультетэ дышетскыны пыре. 1975-тӥ арын распределениея Соликамск городэ ужаны кошке, отын 2015 арозь математикаез дышетэ. Дано шутэтсконэ потэм бераз нылкышно Соликамскысь нылпи садын ужа.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: