Хезмәт

Егит мылкыдоос

Кылем арняе ветеранъёс пӧлын самодеятельной артистъёслэн «Балкыш» («Сияние») районной смотр-конкурссы (комсомоллы 100 ар тырмонлы но Быдӟым Отечественной ожын вормонлы 73 ар тырмонлы сӥземын) ортчиз.

Радъязы сое Балтась районысь исполнительной комитетлэн культурая отделэз, Балтась районлэн ожысь но ужысь ветеранъёслэн Советсы.

Калык творчествоез утёнъя, вордскем шаерлы яратон мылкыд пыӵатонъя, ожын бырем адямиосты гажанъя но соосты тодын возёнъя районын арлы быдэ трос ужрадъёс ортчытӥсько — «Балкыш» фестиваль но таӵе ужпумен радъямын вал. Асьме районмес гинэ басьтӥд ке но, мамында татын пенсионеръёс, ветеранъёс, кудъёсыз пинал дыразы художественной самодеятельностен выризы, кудъёсыз туннэ нуналэ но доразы мӧзмыса уг пуко, концертъёсы пырисько, кырӟало. Сыӵе мӧйыосмы понна та конкурс туж шумпотымон луиз, дыр. 2-5 апреле та конкурслэн зональной этапъёсыз ортчизы. Балтасьын Гала-концертэз 12 апреле луиз. Шумпотымон, асьме удмурт гуртъёсысь пенсионеръёсмы но зональной этапез ортчыса, Балтасьысь концертэ пыриськизы.

Покчи Лӧзя культура юртысь «Егит мылкыд» («Молодость») ансамбль «Мне доверена песня твоя и моя» комсомольской кырӟанэныз жюриосты паймытэм — Гала-концертэ та номерзэс бырйизы. Ансамблязы 8 адями кырӟа, нош Гала-концертэ соос пӧлысь 6 гинэ пыриськыны быгатӥзы (та нуналэ ик мукет концертын выступать кароно луиз). Сизнер гуртысь Антонова Надежда, Герасимова Мария но Пиляева Алевтина учкисьёсты выступлениенызы шумпоттӥзы. «Мон ачим соосты та конкурсэ пыриськыны ӧтиськем вал, но ваньзылэн асьсэлэн мылкыдзы но луиз выступать карыны, шумпотыса пыриськизы. Мылкыдзы вань бере, туж шумпотымон со», — шуэ Сизнер клублэн заведующиез Таисия Маркова. Сизнеръёс кык кырӟан кырӟазы — «Катюша» но «Едут новосёлы» кырӟанъёсты. Кыкетӥ кырӟанэнызы сизнеръёс Гала-концертын но выступление возьматӥзы. Нош тани «Катюша» кырӟанэз кырӟаллям Турьяос но. Соос ик та кырӟанэн Гала-концертэ потӥллям — Зайцева Ольга но Зайцева Татьяна кыкназы та кырӟанэз быдэстӥзы. Починкаос но зональной этапе кык выступление дасяллям — Никитина Анисья кылбур верам, нош Василий Никитин (асьме лыдӟисьёсмылэн «Азьлане» газетэ яратоно гожъясьсы) «Песня о тревожной молодости» кырӟан быдэстэм. Та кырӟанэныз со ортчем Балтасьын луэм Гала-концертэ, со сяна Кукморын луоно концертэ но Василий Петровичез ӵектӥллям. Сыӵе устоесь асьме мӧйыосмы!

Та ужрадэ удмурт гуртъёс ваньзы но пыриськиллям, шуыны кулэ. Ӟаныос но, Сырьяос но, Вукогуртъёс но — ваньзы. Асьсэлэн кылбур верамъёсынызы, кырӟанъёсынызы соос жюриез но, калыкез но туж шумпоттӥллям.

 

 

Нравится
Поделиться:
Реклама
Комментарии (0)
Осталось символов: