Хезмәт

Балтач районы

18+
2024 - Гаилә елы
Азьлане

Эшъяськон луэм интыын...

Дурга гуртын улӥсь Николай Алексеевез тросэз крашин шуыса малпало. Солэсь удмурт луэмзэ тодыса паймо.

Дурга гуртэз крашин шуыса лыдъяськом, но татын 10 пала калыкъёс уло. Коля агай национальностезъя удмурт ке но, крашинъёслэсь сям-йылолъёссэс утьыса возёнын, вуныны кутскем калык сямъёсты, вуоно поколениослы выжтонын азинлыко уж нуэ. Валамон, огназ ӧвӧл, улонысь эшеныз Фирданияен ваче ки кутскыса вамышъяло, вань улон сюрессэс культуралы, искусстволы сӥзё шуимы ке, янгыш уз луы.

Районамы крашинъёслэн огазеяськонзы кемалась ик кылдэмын ӧвӧл, председателез но Дурга гуртысь Антон Борисов. Солэн верамезъя, районамы крашинъёслэсь сям-йылолъёссэс, калык праздникъёссэс утён бордын уж мынэ. Туннэ гожтэмлэн героеныз Николай Алексеевен но та сярысь вераськимы.

— Дурга крашин гурт шуыса лыдъяське ке но, ми дорын туж трос калыкъёс уло. Соин но котькудӥз шоры огкадь учкыса, котькуд калыклэсь сям-йылолъёссэ утён бордын ужаськомы. Крашинъёсты ке верано, сямъёссы ышон-вунон дыръёсы ми гуртысьтымы Анна Семёнова, Елизавета Чеботарёва арлыдоосмылы вазиськиськомы, соосты но ужамы кыскиськом. Нырысетӥосын луыса ми быгатӥмы ас гурт праздникмес берыктыны. Со сярысь табере асьмелэнъёс гинэ ӧвӧл, бускель районъёсысь но Дурга праздник шуыса верало. Азьло аръёсы клуб дорын гинэ ортчытылӥмы, табере Теми бакча дорын луэ. Кӧня ке ар ӵоже ини шулдыръяськонамы «Бэрмэнчек» ансамбль но пыриське, — шуэ Коля агай. Озьы ик Дургаын шулдыр ортчыто Акашка выллем праздникъёсты но.

— Калык, сям-йылолъёслэн вунэмазы калык ачиз гинэ янгыш шуыса малпасько мон. Эшъяськон луэм интыын одӥг калык но мукетызлэсь вылӥ уг луы. Инмарлы тау, милям Дургаын национальностьёслы люкон ӧвӧл. Котькуд калыклэсь сям-йылолъёссэ утёнын тыршыса-гажаса ужаськом. Кылсярысь, крашинъёслэсь калык праздникъёссэс утьыса кельтэм сяна, гуртомылэн, Малмыж районлэн главаезлэн Валерий Васильевич Константиновлэн юрттэменыз калык дӥсьёсты но вуримы. Соку калык дӥсьёс воксё ӧй вал ни, соослэсь орнаментъёссэс бускель районъёсы мыныса но дышетским. Нош туннэ ас калык дӥсьёсмы вань. Вуныса мынӥсь сямъёсмес берыктыны быгатэммылы туж шумпотӥськом. Озьыен, культуралы сӥзем ужан сюресмы огшоры ортчымтэ, — ватса Фирдания апай.

Тодмо, огшоры луымтэ. Кӧня аръёс ӵоже культура юртын ӵош ужам Алексеев кузпалъёс ас гуртазы улӥсь трос нациё калык понна, ас гуртсы понна уно умойзэ лэсьтӥзы. Татарстанысь культура удысысь ужась Николай агай усто мызганчи но, кырӟанъёсты но гожъя. Туннэ нуналлы удмурт, ӟуч, бигер кылын 55-лэсь трос кырӟанэз вань. Дурга палан одӥг праздник но соостэк уг ортчы. Праздникъёсты но шулдыръяськонъёсты, вордскем нуналъёсты но юбилейёсты — ваньзэ вунонтэм яркыт карыса нуо Алексеевъёс. Культура юрт бордын ужась эктонъя, кырӟанъя, кыл устолыкъя кружокъёсы ветлӥсь нылпиослэн пӧртэм конкурсъёсын вормемъёссы но тыршыса ужамзэс юнмато.

Кыӵе синмаськымон Алексеевъёслэн ужамзы, сыӵе ик адӟем карымон улонзы но. Бадӟымез нылзы Роза дышетӥсь луыса ужа, гуртысьтызы пиен Василиен семья кылдытыса али дыре Казаньын уло, кык нылпи будэто. Артур пизы гурт хозяйствоя институтэз йылпумъяса, туннэ нуналэ озьы ик Казане интыяськыса улэ. Асьсэ нылпиоссы сяна, та семья кык пиналъёсты вордыны басьтыса ас доразы анай-атай луыса будэтэм. Мария (Миляуша) но Иван Зеленодольск городысь луо. Азьло та нылпиос мукет семьяын улӥллям, но семьялэн кузёез дырызлэсь вазь кулэмен соосты ас доразы Алексеевъёс басьтӥллям. Туннэ нуналэ Мария Бурбаш Сардыган гуртысь пиен семья кылдытыса ас нылзэ будэтэ ини. Нош Иван Нурма лицейын тодон-валан басьтэ, туж быгатӥсь пи, шуо со сярысь.

Тӥни сыӵе семья каньыллыкен, калык эшъяськонэн улӥсь, творчествоен ӝуась адямиос луо Фирдания но Николай Алексеевъёс.

 

 

 

 

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: эшлыко семья