Эшъяськон Юртын котырес ӝӧк

Эшъяськон Юртэ люкаськизы Татарстанысь удмуртъёслэн автономизылэн азьветлӥсьёсыз, Казаньын дышетскись студентъёс, мӧйыос. Люказ котырес ӝӧкез Удмурт Элькунысь йӧскалык политикая министр Л.Н.Буранова.

Лариса Николаевна тодматӥз вуоно арлы чаклам ужъёсын. «Вань кадь ужрадъёс пӧлысь, оло, тужгес но валтӥсез луэ, дыр, 2020 арын ортчоно перепись», — шуиз со, талы вылӥ саклык висъяны курыса. Вераськон ӝутӥськиз 2020 арын Удмуртилэн но Татарстанлэн кунлыксылы 100 ар тырмонэз пусъён сярысь, «Удмурт Кенешлэн» Бадӟым Ӧтчамез но вуоно арлы тупа вылэм. Вуоно ар Татарстанысь удмуртъёс понна вунонтэм луыса кыльыны кулэ — 2020 ар ялӥське Удмурт культурая арен. Но Лариса Николаевналэн малпамезъя, Бигер Элькунын улӥсьёсты удмурт культураен гинэ ӧвӧл, Удмурт шаерлэн пӧртэм удысэныз тодматон тыр-тысё, тунсыкогес но пайдаёгес но луысал. Асьме, Балтась ёросамы талы сӥзем ужрад март толэзе «Кубыз фестиваль» нимын ортчытыны чакламын. (Кубызъёстэс дасяса улэ, кубызчиос, мызганчиос!) Лариса Николаевна вакчияк тодматӥз «Гербер» элькун праздниказы пыртоно воштӥськонъёсын. Вуоно арын Вавож ёросын ортчоно Герберзылы али ик дасяськыны кутскиллям: инты бырйиллям, сценарияз но шӧдскымон воштӥськонъёс пыртэмын, пе, луозы. Пумиськонын пӧртэм юанъёс эскериськизы, соос пӧлын интыосысь но элькун ёзъёсын уж нуон, грантъёсъя вожвылъяськонъёсы пыриськон но мукет.

Пумиськонэ пыриськиз Татарстанысь нырысетӥ Президентлэн кенешчиез В.С. Хазиахметова. Ачиз Инмар ваем, дыр, сое та пумиськонэ. Анай-атаезъя удмурт нылкышно Валентина Серафимовна Казане вуэм Удмурт Героймылэн — И.Н. Волковлэн Родинаысьтыз — Глазов ёросысь. Президентлы Кенешчие шедён понна, бадӟым конкурсын вормыса потэм! Шат та данъяськымон ӧвӧл?! Быгато ук удмуртъёс но! Чик но кулэс ӧвӧл мукет калыкъёслэсь! Валентина Серафимовна сьӧраз ваем оло сизьым, оло тямыс книга — ваньмыз сӥземын удмуртъёслы, туж тунсыкоесь потӥзы соос мыным. Удмурт кунлыклы сӥзем книгаоссэ Удмуртиысь вуэм Министрлы кузьмаз. Кык ар куспын со мында пӧрам, аслаз кисыысьтыз коньдонэн, жаль тиражез быдэн сю гинэ...

Марина Иванова, Татарстанысь удмуртъёслэн автономизылэсь ужзэ быдэсъясь директорез,

Леонид Сапожников, Балтась ёросысь «Кенеш» НКА-лэн Правлениезлэн ёзчиез