Гужем чеберлыкез кылдытӥсьёс пӧлысь устоосыз пусйиськизы

Лулчеберетъя юртъёс туннэ нуналэ эктон-кырӟанъёсын гинэ уг выро, соос адями котырысь улонэз радъяса, гуртысь калыклы дырзэ пайдаё ортчытон инты но луо. Гуртысь калык огазе люкаськыса сюлмаськытӥсь юанъёсты эскере, вожвылъяськонъёслы дасяське. Али вакытэ мынӥсь нимысьтыз ожгар операцие пыриськисьёслы юрттэт сётонлэсь но лулчеберетъя юртъёс палэнэ уг кылё: максировочной сетьёс лэсьто, гуманитарной юрттэт люкало, блиндажной свечаос лэсьто но пӧртэм мукет ужъёсты быдэсто. 

Нош гужем лулчеберетъя юртъёс понна нимаз ик гуртлэсь мылкыдзэ, вылтуссэ воштон вакыт. Клубъёслэн но лулчеберетъя юртъёслэн кивалтӥсьёссы асьсэ ужъюртъёссылэсь котырзэс яркыт, чебер, тунсыко карыны тыршо. Соин коньдэт (бюджет) организациос пӧлын трос аръёс ӵоже "Лучшее болагоустройство прилегающей территории" вожвылъяськон ортче.

Лулчеберет удысысь ёрос вожвылъяськонлэн вормисьёсыз 2 категориын бырйиськизы. 
Лулчеберетъя юртъёс пӧлын:
1-тӥ инты - Янгул лулчеберетъя юрт;
2-тӥ инты - Смаиль гуртысь лулчеберетъя юрт; 
3-тӥ инты - Сосна гуртысь лулчеберетъя юрт. 

Гурт клубъёс пӧлын: 
1-тӥ инты - Ура гуртысь клуб;
2-тӥ инты - Вуж Кушкет гуртысь клуб; 
3-тӥ инты - Чапшар гуртысь клуб. 

Нимысьтыз номинациосын но вормисьёс луизы:
- Лучший ландшафтный дизайн прилегающей территории номинациын - Княбаш гуртысь клуб;
- Создание лучших малых архитектурных форм номинациын - Тюнтер гуртысь лулчеберетъя юрт; 
- Лучшее озеленение прилегающей территории номинациын - Шишинер гуртысь лулчеберетъя юрт; 
- Лучший эстетический вид деревьев и кустарников номинациын - Арбор гуртысь лулчеберетъя юрт. 
Шумпотымон, вожвылъяськонын призо инты басьтэмъёс пӧлын удмурт гурт клуб но вань. Трос аръёс ӵоже Вуж Кушкет гуртысь клуб (кивалтӥсез - Светлана Щербакова) та вожвылъяськонын арлы быдэ сӥё-дано кузьымъёсын пусйиське. 

Вань сюлмысен ӟечкыласьком! Вормисьёс нимысьтыз дипломен но сертификатэн пусйиськизы.
Азьланяз но тӥледлы тазалык сӥзиськом, ужады азинсконъёс но чебересь нуналъёс!