Хезмәт

«Инмар гинэ та улонлэсь медаз люкы»

Котькуд семьялэн аслаз историез, аслаз шумпотонъёсыз но, кӧтӝож-куректонъёсыз но вань.

30 арлэсь тросгес валче улыса, вань шуг-секытъёс, эскеронъёс пыр потыса, нылпиоссылэсь будэмзэс адӟыса аръёслэсь ортчемзэ но шӧдытэк кылем Вукогуртысь Яковлевъёслэн семьязы туннэ нуналэ ини внукъёссылы шумпотыса улэ.

Семон агай нырысетӥ адӟемысеныз ик синмаськем аслаз вуоно кузпалызлы, Ниналы. Ымнырызъя но мусо, мугореныз но веськрес Нина аслаз зӥбыт сямыныз синмаськытэм, Семон агаез.  

«Огпол уж дорам мыныкум, Нинаез сюрес вылысь адӟи. Кыӵе ке ныл  машина дугдытыны курадӟыса, «голосовать» карыса сылэ вал. Машинаын пиосын куинь кузя пукиськомы вал. «Та починка ныл сылэ ук, ойдо, пуктомы сое» шуизы эшъёсы. Ма бен, пуктӥ», — тодаз вае Семон агай.

— Оло, кабинкаяз куинь ӵошен пуко шуыса ӧй пуксьы меда машинаяз — уг ни тодӥськы, но мон уробояз ю вылэ пуксьыса бертӥ. Починкае васькыса кыли. Семонлы кельшиськем вылэм мон, соин ик тодмоосызлэсь мон сярысь юалляськем ни, — пальпотыса вера Нинапай. — Тӥни озьыен, машинаеныз мон доры ветлыны кутскиз. Кема но ӧм ветлэ, кык толэзьлы матын, собере лушкаса вайизы. Со вал 1982-тӥ ар. Сомында машинаос, мотоциклъёс вал монэ лушкакузы... Адямиос али но тодазы вайыса верало сое.

Кизнере дышетскыны кошкыны дасяськем Нинапаез Вукогуртэ лушкамзы бере, егит ныл бадӟым семьяе нош одӥг ныл луыса лыктэ. Пинал дырысеныз ик Нинапайлы кузпалэзлэсь анай-атайзэ утьыса возьыны тупам. «Инмарлы тау, соосты утьыны быгатӥ. Нылпиосы но соку пичиесь вал — соосты но учконо, нош песяй-бабайлы но саклык висъяны дыр шедьтоно. Сопал дуннеын ӟеч мед улозы ни пересьёсмы», — вера Нинапай.

Кылдэм шуг-секытъёслы сётскытэк, улонлы ӝожтӥськытэк, кузпалэзлы яратӥсь но гажась кышно луыса улэ нылкышно. Вукогуртын улыны кутскемез дырысен фермаын тырше, пенсие потэм бераз кема аръёс ӵоже тыршыса ужамез понна почётной грамотаен пусйиське. Семон агай но туж ужась пиосмурт — колхозын пӧртэм удысъёсын тырше, киужъёслы но со туж усто.

Нинапайлэн но Семон агайлэн нырысетӥ нылпизы, Александр, 1983-тӥ арын вордске. Собере Яковлевъёслы шуд усе кыкетӥ нылпизэс, Владимирез, вайыны (1985-тӥ ар). 1988-тӥ арын Оля, 1989-тӥ Ирина — огез сьӧры огез нылъёссы вордско. «Инмар огез сьӧры огез нылъёс но сётӥз, собере ини, 7 арскын, 1995-тӥ арын, покчи пимы Вася но вордскиз. «Кыӵе шулдыр луылэ вал нылпиосмы пичи дыръя, полной детсад люкаське вал азбарын, лумбыт татын шудо вал, — пальпотыса тодаз вае Семон агай.  — Туннэ нуналлы 6 внукмы вань, Инмарлы тау. Нылпиосмес будэтӥмы, табере внукъёсмес будэтоно ни.

Кузпалъёсын вераськон — ачиз туж бадӟым шумпотон. Каньыл, дыртытэк, радызъя, ваньзэ валэктыса верало, ог-огзэсты куспетӥ карытэк верасько. Семон агаез но Нина апаез адӟем карымон семья шуысал мон. Юртазы югыт, азбаразы — чылкыт, бакчаязы емыш сётӥсь писпуос.

— Тани та — ваньмыз нылпиосмы понна. Инмарлы тау, куное бертыло, внукъёсмес но вайыло, милемыз гажало. Анай-атай понна нош ма кулэ на. Ми асьмеос пичи дыръя кампет сиыса будэм нылпиос ӧвӧл ук, соин но нылпиосмылэн но внукъёсмылэн ваньмыз умой мед луоз шуыса тыршиськом. Инмар гинэ та улонлэсь медаз люкы, — шуо кузпалъёс. — Ми пичи дыръя колбаса но, сӥль но шер гинэ луылэ вал, созэ но ваньмылы люкылыса сиимы. Али кадь тодӥсько, пичи дыръям Кисьтон дыръя кызьы ми, нылпиос, ӝок вылысь сиёнъёсты шумпотыса сииськомы вал. Соин но нылпиосмылы ваньзэ умойзэ сётыны тыршиськомы. Тани та ӟечыранэз но внукъёсылы лэсьтӥ (азбар шорысьтыз ӟечыранэз возьматэ), — ватсаз Семон агай.

Паймисько, кызьы сомында ар ӵоже улыса, кузпалъёс гажанзэс но яратонзэс ыштымтэзы. Соос али но куспазы синмаськем егитъёс кадь верасько, ог-огзэс кылзыны но кылзӥськыны быгато, кенеш сётыса уло.

— Милям характермы ог-огмылы туж тупа. Огмес-огмы валаса улӥськомы, Инмарлы тау. Чиданлык но кулэ, мазэ веранэз, сотэк уг луы. Ог-огмылы юрттыса ужаськомы, кенешыса улӥськомы, даллашеммы но та дырозь ӧй вал. Пичи керетонъёс луыло ни со котькинлэн. Но вераськытэк, ог-огмы вылэ куатаськыса улэммы ӧвӧл. Ма, мон даллашыны уг быгатӥськы, лэся, — серекъя Нинапай. —  Нылпиосме но тышкаськыса ӧй будэты. Кылзӥськись милям соос, ог-огзылы котьку юрттыса будӥзы. Дорын но ӧвӧл ни табере...

— Котькинлэн но сямыз огкадь уг луы ведь, адямиез валаны кулэ. Кельшоно ке, кельшиськод ини со, — шуэ Семон агай. — Туала дыре егитъёслэн чиданлыксы ӧвӧл, пичи гинэ мар ке луиз ке, соку ик люкисько. Эрки будо, улонын ведь мар гинэ уг луы. Али ведь, малпаськид ке, ваньмыз вань: дӥськутэз но, сиён-юонэз но. Улон капчи туала дыре. Талы шумпотыса улоно кадь гинэ, — шуэ со.

Улон туала дыре капчи, веранэз ӧвӧл. Но улонын котьку яратонлы инты вань. Яковлевъёслэн семьязы талы пример луэ. Семон агай кышноезлы юрттыса скал но кыскем, дорысьтыз ужъёссэ но ужаны юрттэм. Кышноез но, ас черодаз, кузпалэзлы юрттэм. Ог-огзылы пыкет луыса, улонын кылдэм шуг-секытъёс пыр потыны гинэ ӧвӧл, яратон кусыпъёссэс эшшо но юнматыны быгатӥллям соос. Соин нылпиоссы но, анай-атаезлэсь адӟем карыса, яратонзэс ыштытэк, ог-огзылы оскымон кыльыса но юн семья луыса, шудо улозы шуыса оскисько.

 

 

Реклама
Теги: семья
Нравится
Поделиться:
Реклама
Комментарии (0)
Осталось символов: