«Инвожо» нош ик Казане вуылӥз (+фото)

Али коньывуон толэзе гинэ Ӟаны шоръёзо школаысь «Инвожо» фольклор ансамбльлэн «Даур куара» адӟытонлэн ужаз пыриськемез сярысь гожтӥськеммы вал. Нош табере Ӟаны школаысь дышетскисьёслэн творческой коллективзы 28-тӥ шуркынмонэ Казаньысь 180-тӥ номеро трос профильем полилингвальной гимназиын ортчем исследовательской конференциез шулдыртӥз, ТНВ каналлэн съёмкаосаз пыриськиз.

— Нылпиос пӧлын ортчытӥськись Россиын улӥсь калыкъёслэн кылъёсынызы лыдӟонъёслэн но исследовательской конференцилэн йылпумъян этапез вал та. Отчы Ӟаны школаысь «Инвожо» ансамбльмы но пыриськиз. Милям коллективмылэн фольклор номерез сяна та ужрадын вал на башкир, пор, бигер, чуваш но ӟуч выступлениос, — ивортӥз милемлы «Инвожо» ансамбльлэн одӥгез кивалтӥсез Лилия Викторовна Чирикова. — Ми пумтэм шумпотӥськом, «Дуслык» возёслэн но ёрос кивалтэтлэн юрттэтсылы луыса та выллем ужрадъёсы пыриськыны быгатэммылы, — таукарон мылкыдъёссэ вераса ватсаз на Лилия Викторовна.

Нялтас вераса, удмурт кылосбуръя секциын Татарстанысь но Удмуртиысь пиналъёслэн 13 исследовательской ужзы эскеремын луэм. Та сярысь ивортэ Татарстанысь удмуртъёслэн Вконтактеысь огинзы.