Калыклэн улонэз туж юн герӟаськемын азьло улонэн

Умоесь, гажано редакциын ужасьёс! Нырысь ик сӥзисько тӥледлы юн тазалык, шуд, ужады выль азинсконъёс. Тау кылме вераме потэ статьяосы понна.

Та музъем вылын трос пӧртэм калык улэ. Котькуд калыклэн аспӧртэм вераськон кылэз вань, кудзэ котькудӥз тырше узырмытыны, азьланьтыны.

Мынам пинал дыры ортчиз Балтась ёросысь одӥгаз туж чебер сэрегаз — Вукогуртын. Та удмурт гурт монэ будэтӥз, дышетӥз улонэз валаны, калыкез гажаны, ужаны; секыт луыку, кышкатэк азьлань вамыштыны. Соин ик но, дыр, вань ортчем сюрес, котькуд вамыштэм пытьы пуксе син азям.

Гуртамы школа ньыль классозь вал, вань предметъёсты удмурт кылын дышетским, ӟуч кылэз гинэ — ӟучен. Ципьяын кык школа вал: огез ӟуч, нош мукетыз удмурт, тямысэтӥ классозь. Вань урокъёс удмурт кылын, одӥг ӟуч кыл гинэ — ӟучен. Туннэ нуналэ со школа интыын «Труд» ООО-лэн правлениез, выль юрт ужамын, азбарысь беризьёс гинэ тодэ вайыто ини та школа интыез.

Улон выжыме лэзи Башкортостан музъемысь удмурт гуртэ. Мон школаын ужаны кутскыку, удмурт кылэз тямысэтӥ классозь дышетӥзы, нош туннэ нуналэ пиналлэн кельшемезъя, мылкыд каремезъя гинэ дышетско. Улон азьлань туж ӝог вамыштэ, соин ик но вераськон кылмы но оло вуныса мынэ меда? Сюлэм куд-ог дыръя та ласянь мур малпаське. Но калыклэн улонэз туж юн герӟаськемын азьло улонэн. Кызьы вунэтод сое? Туннэ нуналэ тросэз уг тоды, луоз, азьло дыре бусы ужъёс туж секыт вылӥллям шуыса. Куд-ог дыръя шутэтскыкузы сюлмысьтызы потэм кырӟанъёс но малпазы, луоз. Ӟег-чабей вуэм бере нылкышноос киын аразы, кутсазы, соин ик но та кырӟан кыл но озьы ик кылдэм, дыр:

Шар-шар кырӟасал,

Шар-шар бӧрдысал —

Уг поты мынам куарае.

Кырӟай ке, куарае

Кыръя, дыр, кошкоз.

Бӧрдӥ ке, кӧт ӝожме

Кин басьтоз?

Азьло дыре котькуд семьяын вить-куать нылпи луоз вылэм, та кырӟан кылъёс но озьы ик кылдэмын, дыр:

Ӝытазе ӝужам кизили

Куазь сактон дыръя таркаське.

Анай-атайлэн нылыз но пиез

Мугораз вуыса таркаське.

Тани шуом, нош одӥгез кырӟан гур калыклэсь улонзэ возьматэм, луоз:

Милям азбармы покчи гинэ,

Вож ожо ке ӝужа, чеберске.

Милям коркамы покчи гинэ,

Ӟеч калык ке пыре, шулдырске.

Зэмзэ но, тазьы юн ке малпад, улон ас понназ туж умой, выжыкылын кадь улӥськом: кыӵе чебересь юртъёс ужаськомы, синмаськыса учкымон. Озьы ик малпано: азьло дырысен удмурт калык данъяськиз ужез яратӥсь, тыршись, калыкез гажась, кырӟаны но эктыны яратӥсь луэменыз.

Та кылъёс бере сюлэмы тазьы ик вера но валэктэ кадь: «Уз, уз быры та музъем вылын дуно но яратоно удмурт кылмы. Вунэтоно ӧвӧл, семья пушкын вордӥське вераськон кыл, соин ик котькуд удмурт семья мед тыршоз утьыны аслэсьтыз вордскем кылзэ.

Мария Александрова (Кондӥ Мани)