Хезмәт

Балтач районы

18+
2024 - Гаилә елы
Азьлане

Каникулъёс шулдыр ортчизы (фоторепортаж)

Кыӵе гуртын кызьы шулдыръяськизы дас одӥг нунал ӵоже кыстӥськем шутэтскон нуналъёсы?

Дас одӥг нунал ӵоже кыстӥськем шутэтскон нуналъёс туж ӝог ортчизы. Выль ар шутэтсконъёсы котькуд гуртын пӧртэм шулдыръяськон ужрадъёсты ортчытон кемаласен чебер традицилы пӧрмиз ини. Туэ но, коронавирусэн сэрен кылдэм шуг-секытъёс шоры учкытэк, ёросысь котькуд гуртын сыӵе ужрадъёс радъямын вал. Клубъёслэн кивалтӥсьёссы, нуналлы быдэ сямен гурт калыкен, нылпиосын кыӵе ке но ужрад ортчытӥзы. Статьямы но ӵапак та сярысь — кыӵе гуртын кызьы шулдыръяськизы дас одӥг нунал ӵоже кыстӥськем шутэтскон нуналъёсы?

Ӟаны клуб выль ар шутэтсконъёсты радъянэ мылысь-кыдысь басьтӥськем. Гуртын нуналлы быдэ шуымон клублэн кивалтӥсеныз Алевтина Ивановалэн, библиотекалэн кивалтӥсезлэн Римма Анисимовалэн, озьы ик Тататьяна Михайловналэн ансамбльлэн балетмейстерезлэн тыршеменызы радъям пӧртэм тунсыко ужрадъёс ортчизы. Нырысь ик 31 толсуре гуртын бал-маскарад луиз.  1-тӥ толшоре “Новогодние загадки” шуыса нимаськись онлайн-шудон ортчиз. Озьы ик шутэтскон нуналъёсы радъямын вал мультфильмъёсты учкон, квест-шудонъёс, гурезьысен нискыланъёс, онлайн-викторина, “Поле чудес” шудон но мукетъёсыз.

— Куасэн но ветлӥмы, гурезьысен но нискыламы. Тросэз пумиськонъёсмы, бал-маскарад но, ортчизы урамын, командаос куспын ӵошатсконъёс вал. Вормисьёслы кузьымъёс но сётъямы. Вань кадь ортчем ужрадъёсты ортчытӥмы библиотекаен ӵош. Выжыкылъёслы сӥзем онлайн-викторинамы но луиз, нялтас вераса, Ӟаны гуртлэн нимысьтыз инстаграм страницаяз ортчиз. Шумпотымон, отчы котькин но пыриськыны быгатӥз. Со викторинаын 100-лэсь уногес адями юанъёслы ответ сётӥз. Йылпумъянъёссэ но лэсьтӥмы — 1-тӥ, 2-тӥ, 3-тӥ интыосты басьтэм адямиосты пусйимы. Кылдэм ке, та ужрадъёсы тужгес мыло-кыдо пыриськем адямиослы нимысьтыз дипломъёсты но сётыны малпасько. Ноябрь праздникъёс дыръя но котькуд нунал онлайн амалэн ужрадъёс ортчытӥмы, соку но дипломъёс сётъяй, — вера Ӟаны клублэн кивалтӥсез Алевтина Иванова.

Кушкет гуртысь калык но выль ар шулдыръяськонъёслэсь палэнэ кыльымтэ. Гуртысь клубен кивалтӥсь Светлана Щербакова арлы быдэ котькуд ужрадъёслы пыр-поч дасяськыса, калыкез шулдыртыны быгатэ. 31-тӥ толсурысен кутскыса, шулдыръяськон ужрадъёс каникулъёс ӵоже кыстӥськиллям. Толсурлэн берпуметӥ нуналаз ортчем бал-маскарад адямиослы туж кельшымон луэм. Светлана Петровналэн верамезъя, калык маскарадын сюлмысь шулдыръяськем, шутэтскем. “Ваньзы эктӥзы-кырӟазы, тэк ӧз пуке. Лотерея но ортчытӥмы, нылпиос понна котькуд нунал клубын пӧртэм тунсыко ужрадъёс радъямы. Кылсярысь, англи кылъя урок ортчытӥмы, мультфильмъёсты учкимы, калык шудонъёсты шудытӥмы. Терроризмлы пумит вераськонмы луиз, гуртысь медсестра Алина Филипова нылпиосын пумиськыса коронавирус сярысь мадиз”, — шуэ Светлана Щербакова. Ымусьтон праздникез но Кушкетын бадӟым карыса пусйиллям — гурт калыкен люкаськыса, клуб азьын чорыг лым пӧзьтӥллям, шулдыръяськиллям.

Тагашур гуртын клуб выльысь ужаны кутскем бере, гурт калык праздниклы быдэ шуымон клубе шулдыръяськыны люкаське ини. Тол каникулъёсы но та пичи гуртын трос ужрадъёс ортчытӥллям. 30-тӥ толсуре нылпиос понна клубын театрализованной представление возьматӥллям, нош 31-тӥ толсуре урамын бал-маскарад ортчем. Тагашурысь клублэн заведующиезлэн Ирина Конькиналэн верамезъя, отын вал пӧртэм шудонъёс, мызган улсын юмшанъёс, пӧсь чай но табань. Каникулъёсы нылпиос понна но пӧртэм тунсыко ужрадъёс ортчытӥськизы. “История нового года” шуыса нимаськись  вераськон; суредъёсъя, мадиськонъёсъя конкурсъёс; викторинаос; фильмъёсты учкон но мукетъёсыз. Вунэтымтэзы Ымусьтон праздник сярысь но — праздник сярысь вераськон сяна, нылпиос ымусьтон кизилиосты но лэсьтӥллям.

Вукогуртысь клубен кивалтӥсь Антонида Перемечева но каникулъёсы нылпиос понна ужрадъёс ортчытэм — кудзэ клубын, нош кудзэ — урамын. “Я рисую новый год” шуыса нимаськись суредъёсъя конкурс, “Зимушка-зима” мадиськонъёслы сӥзем конкурс ортчем. Со сяна, нылпиос “Сила воли” шуэм кино учкиллям. Нылпиос трос луымтэзы ке но, ужрадъёс шулдыр ортчиллям.

Сырьяос но котьку шулдыръяськыны быгатӥзы. 30-тӥ толсурысен кутскыса, нылпиос понна клублэн кивалтӥсез Леонид Сапожников пӧртэм тунсыко ужрадъёсты радъяз. 30-тӥ толсуре, нылпиосты люкаса, кивалтӥсь гуртысь ошмес доры васькыса, пиналъёсын тунсыко шудонъёсты ортчытэм. Мукет нуналаз клубын нылпиосын дасям выль ар концерт возьматӥзы. Нош ини толшоре, нуналлы быдэ нылпиосты люкаса, кыӵе ке тунсыко ужрадъёс радъямын вал. Соос пӧлын — “Дюймовочка” фильмез учкон (та фильм Сырья нылпи садэ ветлӥсьёсын но соослэн визьнодасьёссылэн пыриськеменызы 2007-тӥ арын уськытэмын), шахматэн но шашкиен шудон (та шудонъёс куинь нунал ӵоже кыстӥськиллям), катокын конькиен нискылан, футбол шудон, куасэн ветлон — кинлы мар тунсыкогес, “Эктоника” — флешмоб.

— Нуналлы быдэ шуымон кыӵе ке ужрад ортчытӥмы, — шуэ Леонид Дмитриевич. — Сыӵе ужрадъёс вань клубъёсын ортчизы: каникулъёсы нылпиосты маин ке шулдыртыны кулэ ук. Шумпотымон, нылпиос ӧжыт ӧз люкаське, сырьяос сяна, Турья гуртысь куноос но вуизы.

Ципья гурт бадӟым бере, татын арлы быдэ шутэтскон нуналъёсы ортчись ужрадъёсы клублэн кивалтӥсез Алиса Низамова но устолыкъя кивалтӥсь Евгения Михайлова сяна, библиотекаын ужасьёс Гульсина Животникова но, Залия Зиатдинова но мыло-кыдо пырисько. «Азьло дырысен клубын но, библиотекаын но ортчись ужрадъёсы огкылысь, ог-огмылы юрттыса дасяськиськомы, ужрадъёсты ортчытӥськомы», — шуиз Евгения Михайлова но. Туэ но соослэн огъя кужыменызы Ципьяын бадӟымъёс понна но, нимысьтыз нылпиос понна но шулдыръяськон ужрадъёс ортчизы. 30-тӥ толсуре бадӟымъёс понна урамын ёлка вӧзын бал-маскарад луиз. Отчы кӧня ке мукет гуртъёсысь адямиос но вуизы. Нылпиос понна но нимысьтыз праздник радъязы, со вал клубын 31 толсуре. Толшоре но нылпиос понна пӧртэм ужрадъёс ортчизы — мадиськонъёсъя, суредъёсъя конкурс, прогулка-экскурсиос, интеллектуальной шудонъёс но мукетъёсыз. Нош бадӟымъёс понна библиотекаын шулдыр пумиськон ортчем.

(Пумыз 5-тӥ бамын).

(Пумыз. Кутсконэз 4-тӥ бамын).

Турья гуртын но трос мукет гуртъёсын сямен тол шулдыръяськонъёс 30-тӥ толсуре кутскиллям. «Клуб дорын урамын чебер вож кыз котырын пиналъёслы ортчытӥмы Выль ар шулдыръяськон. Нылпиосты но куноосты Тол бабаен Лымы ныл пумитазы. Кыз котырын шулдыръяськимы но ӵошатсконъёс ортчытӥмы. Пиналъёс капчи мылкыдын доразы кошкизы, праздникмы соослы туж кельшиз», — шумпотыса вера Турья гуртысь клублэн кивалтӥсез Ирина Исьмекова. «31-тӥ толсуре бадӟымъёс понна бал-маскарад радъямы. Сизнер гуртысен пӧртмаськыса лыктэмъёс но вань вал. Пиос мызганэн удмурт дӥсь дӥсяса лыктӥллям вал. Туж шулдыр каризы, тау соослы но», — ватсаз на клуб ужен кивалтӥсь. Но тужгес тунсыко выль ар шутэтсконзы ортчем дышетскись пиналъёслэн. Котькуд нунал шуымон соос понна  кыӵе ке но выль ужрад луэм. «Шутэтскон дыръязы, «Нескучные каникулы» ним улсын ужрадъёс ортчытӥмы. 1 толшоре «Ураа! Каникулы!» шуыса нимаськем шудон программа, нош 2 толшоре «Зимняя фантазия» ним улсын суред суреданъя конкурс радъямы. 3 толшоре нылпиослэсь визьзэс сынамы, мадиськонъёсъя конкурс ортчытыса. 5 толшоре пиналъёсын гурезь баме нискыланы мынӥмы. Туж шулдыр нискыламы. Доразы бертыны но ӧз дыртэ. Нош одӥгзэ гурт шулдыръяськонэз ортчытӥмы Ымусьтон нуналэ. Клуб дорын, вож кызмы котырын ортчытӥмы туж шулдыр праздник. Татчыяз ини бадӟымъёс но пыриськизы. Табань пыжимы, бургыен самоварен чай пӧзьтӥмы. Шулдыръяськыны но вуимы. Асьмелэн мызганчимы но лыктэм вал. Туж бадӟым тау Алёшалы, азьпалан но тазьы ик ӵошен шулдыръяськыса улыны мед кылдоз. Праздникмы шулдыр ортчиз. Пиналъёслэсь «нескучной» каникулзэс 8 толшоре куасэн бызьылонэн йылпумъямы, нылпиос гурт кузя куасэн бызизы», — тодматӥз тол каникулъёсы ортчытэм ужрадъёсыныз Ирина Исьмекова.

Утёд ке, Сизнерысь пӧртмаськисьёс бускель гуртъёсы но вуыло вылэм. Тӥни ук Турья гуртэ мынӥллям, пе, нош азьвыл аръёсы Ципьяе вуылэмзы сярысь но ивор кылӥськылӥз. Та асьсэ дорын мӧзмыт шуэмез уг валэкты, тае шулдыръяськон мылкыдзы бадӟым шуыса валаны кулэ. Сизнер гурт клубын Выль арлы сӥзем бал-маскарадын пӧртмаськисьёс азьло но трос луыло вал, али но со сямзылэсь уг куштӥсько соос. Тани туэ ортчем выль ар шулдыръяськоназы но кинъёс но ӧй вал: пудо-животъёс но, тылобурдоос но, лымымунё но, хоккеистэз но, Сизнер МВД-ысь полицейскойёс гинэ но вал. Тужгес йӧспӧртэмесь вал скалъёс но ошъёс, (2021-тӥ арлэн кузёез Ош луэмысь, вылды, тросэз та пудоез бырйиллям). Ушъямон, вань пӧртмаськисьёс асьсэ киынызы дасям аспӧртэмлыко дӥсен вуиллям вал. Пӧртмаськисьёс ваньзы шуымон егитъёс луизы. Та но шумпоттэ.  Тӥни озьы 7 толшоре, урамын будӥсь кызэз чебермаса, Тол бабаен Лымы нылэз ӧтьыса, валче кырӟаса но эктыса, шудыса-серекъяса, пӧртэм вожвылъяськонъёсы пыриськыса, кузьымъёс утыса, Сизнер гурт калык сюлмысь шутэтскиз, кемалы тырмымон шулдыр мылкыд басьтӥз. Йылпумъяськиз праздник ужрад выль ар лотереез шудытонэн.

Нылпиослэн ёлка праздниксы Сизнерын 30-тӥ толсуре луэм. Вераны кулэ, котьку сямен, со туж шулдыр ортчем, пиналъёслы кельшем.

«Что ни день, то праздник» — тазьы шуыны луысал Покчи Лӧзя Культура юртлэн выль ар каникулъёсы ужамез сярысь. 31-тӥ толсурысен кутскыса 10 толшорозь калыклэсь шутэтсконзэ шулдыргес карон понна мыло-кыдо тыршизы Культура юртлэн кивалтӥсез Ринат Калимуллин но устолыкъя кивалтӥсь Галина Петрова. Кутскизы выль ар праздникъёс традиционной бал-маскарадысен, кудӥз котьку сямен 31-тӥ толсуре ортче. Выль арлэн нырысетӥ нуналаз нылпиос понна урамын, чылкыт омырын шулдыр вожвылъяськонъёсын но шудонъёсын программа радъямын вал. 2-тӥ толшоре нылпиос выль арлы сӥзем интеллектуальной шудонэ, «Поле чудесэ» пыриськизы, мукет нуналаз Тол бабаен вож кыз котырын кырӟазы-эктӥзы. 4-тӥ толшоре толлы но Выль арлы сӥзем суредъёсъя конкурс ортчиз. Нылпиос отчы но мыло-кыдо пыриськизы. 5 толшоре выль ар пуконъёс (посиделки), 6-аз нылпиосын но Культура юртын ужасьёсын «Поле чудес» ортчытӥськиз. 7-тӥ толшоре Ымусьтонэз пусйизы. 8 но 9 толшор нуналъёсы ортчем шулдыр но тунсыко шудонъёс, конкурсъёс но нылпиослэн сюлэмъёсазы чебер тодэ ваёнъёс кельтӥзы, луоз.

Починкаын но нылпиослэсь шутэтсконзэс тунсыко но пайдаё карон сярысь сюлмаськиллям. Гурт клубен кивалтӥсь Зоя Никитина но библиотекалэн заведующиез Мария Якимова пиналъёс понна выль ар кыз котырын шулдыръяськон радъязы, Ымусьтон нуналэ чылкыт омырын ческыт табань пыжыса куноязы, тунсыко конкурсъёсын шулдыртыса капчи мылкыд кузьмазы. Нош кыӵе тол каникул нискыланъёстэк. Нылпиосты люкаса куасэн но нискылазы, конькиен но. Конькиен нискылан сярысь нимысьтыз ик вераме потэ. Конькиен нискыланы тросэз нылпиос ярато, но, жаляса верано, котькуд гурт каток луэменыз ушъяськыны уг быгаты. Починкаын та шуг-секытысь потон амал шедьтӥллям: кык бускель семьяос куспазы вераськыса, нылпиоссылы пичи каток лэсьтӥллям. Малпаны кулэ, туэ та каток гуртысь нылпиослэн одӥгез тужгес яратоно интызы луэм, дыр, шуыса.

Бадӟымъёс сярысь но культура удысын ужасьёс сюлмаськиллям, котьку сямен, 31-тӥ толсуре традиционной бал-маскарад ортчытӥллям.

Бадӟым Лӧзя гуртын ини кемалась клуб уг ужа. Но гурт калыклэсь шулдыръяськон мылкыдзэ озьы гинэ кысод шат?! Берло аръёсы Ымусьтон но Вӧй праздникез пусъён лӧзяослэн сямазы пырем вал ини, нош туэ тани, Выль арлы сӥзьыса, бал-маскарад но ортчытӥзы. Гуртысь азьветлӥсьёслэн тыршеменызы, нимаз ик Григорьева Нина Петровналэн кичӧлтэмезлы но мылкыдызлы луыса, Бадӟым Лӧзя гуртын улӥсьёс но Выль ар праздниклэсь шӧмзэ шӧдӥзы. Ваньмыз вал озьы, кызьы кулэ: Тол бабай но Лымы ныл, вож кыз, арган гуръёс чузъяськем улсын кырӟан но эктон, нылпиос, кылбур веранъёс… Со сяна, вал на пӧртэм шудонъёс но вожвылъяськонъёс. Мылкыд каремъёс пу вандонэ, гынсапег куянэ пыриськизы, чорыгазы, ледянкаосын ӵошатскизы. Трос шумпотон кузьмаз нылпиослы (ма, нылпиослы гинэ шат?!) гуртысь азьветлӥсьёслэн но Покчи Лӧзя гурт поселенилэн тыршеменыз лэсьтэм нискылан гурезь. Конькиен нискыланы яратӥсьёс катокын шутэтскыны быгатӥзы, нош кынмисьёс — самоварысь пӧсь чаен шунтскыны.

P.S. Валамон ни, калык понна кыӵе ке ужрад, шулдыръяськон ортчытыку, коньдонэн юрттӥсьёстэк уг луы. Пичи гинэ кузьым но калыкез тунсыкъяськытыны но шумпоттыны быгатэ уга. Нош спонсоръёсты шедьтон — со капчи уж ӧвӧл. Соин но культура юртъёслэн но гурт клубъёслэн кивалтӥсьёссы газетмы пыр ужрадъёсты ортчытыны юрттэм, кузьымъёс яке коньдон висъям вань адямиослы тау каремзэс верало.

Наталья Жукова

Ольга Плотникова дасязы

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Галерея

Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: выль ар каникулъёс

2
X