Карлыганысь «Ӟардон» ансамбль выльысь бадӟым вормонъёсы вутскиз

«Ӟардон» — Марий Эл Республикаысь Мари-Турек ёросысь Карлыган гуртэз вань Россилы тодмо карись удмурт калык ансамбль.

Марий Элын но, Татарстанын но ӧвӧл, дыр, та ансамбль сярысь кылымтэ, тодымтэ адями. Солэн историез кутскемын 1975-тӥ арын. 48 ар ӵоже ини ансамбль шумпоттэ аслэсьтыз гурт калыксэ, бускель ёросъёсысь учкисьёсты, Россилэн бадӟым сценаосаз но вуылэ.

Та нуналъёсы гинэ «Ӟардонъёс» Северной Осетиын 30 коньывуонысен 5 шуркынмонозь ортчем фестиваль-конкурсысен бертӥзы — отын соос вань номинациосын нырысетӥ интыосты басьтӥзы. Таин валче Карлыган гуртысь лулчеберетъя юртлэн кивалтӥсеныз Наталья Юрьевна Ивановаен коллективлэн вормонъёсызлэн секретъёсыз, Северной Осетиын кунояськемзы но коллективзы сярысь вераськимы. 

— Наталья Юрьевна, тӥ Карлыган гуртысь лулчеберетъя юртэн кивалтӥськоды. «Ӟардон» ансамбле но мыло-кыдо пыриськиськоды... Соин вераны быгатоды, луоз, ма бордын ансамбльлэн азинскемезлэн но трос бадӟым вормонъёсызлэн секретэз?

— Вакчияк верано ке, секретэз — ансамблез кылдытӥсьёслэн, солэн азьветлӥсьёсызлэн но вань бадӟым коллективезлэн тыршемез бордын. «Ӟардон» ансамбльмы дано аслаз дасо аръёс ӵоже луэм историеныз, аслаз аспӧртэмлыко репертуареныз, туж чебересь костюмъёсыныз но пӧртэм арлыдъем пыриськисьёсыныз. «Ӟардонэ» пыриськись котькуд мурт номаин ӵошатонтэм пытьызэ кельтэ ансамбльлэн историяз. Коллективын котькин тае умой вала, соин бадӟым кылкутонэз но шӧдэ. Эшшо тани мае пусъеме потэ. Ми калык дӥськутъёсты яратӥськомы. Выль сценической костюмъёсты но дэремъёсты, соос милям трос ке но, сценае потыкумы шергес дӥсяськомы — кырӟанъёс кырӟаку гинэ. Со сяна, фольклор композициосты быдэстыку, улэп крезьгурен выступать карыны тыршиськомы. Флейта, балалайка, баян... — милям ваньмыз та вань. Малпасько, соин но калык выступлениосмес матын каре, дыр, шуыса. 

— Уг янгышаськы ке, «Ӟардон» — шошма удмуртъёслэсь кырӟанъёссэс, эктонъёссэс возьматӥсь ансамбльёс пӧлысь одӥгез тужгес тодмоез но мӧйыез луэ. 

— 48 ар ӵоже ансамбльмы улэ, воштӥське, выльдӥське, репертуарзэ паськытатэ, сяськая, выль вормонъёсы вутске. 1981-тӥ арын солы калык ансамбльлэсь нимзэ сёто. Та, валамон, коллективе пыриськись котькуд адями бордын луэ. Но ансамбльмы ӧй ик луысал, дыр, Вячеслав Николаевич Алексеевтэк — со «Ӟардонлэн» кылдытӥсеныз лыдъяське. Калык сям-йылолъёсты утён ужпум сое егит дырысеныз тунсыкъяськытэм но сюлмаськытэм. Ӵапак соин ик со ансамбльмес но кылдытэм. Ансамбльлэн азинсконаз ас дыразы трос кужымзэс поно Валерий Макарович Марсаков, Николай Кузьмич Романов но Галина Алексеевна Кузнецова (1985-тӥ арысен ансамблен кивалтыны кутске). Нош 1989-тӥ арысен ансамблен кивалтэ 1980-тӥ арысен «Ӟардонэ» пыриськись Мария Аркадьевна Главатских. Мария Аркадьевнаез Балтась ёросын туж умой тодо, со Марий Эл республикаысь лулчеберет удысын сӥё-дано ужась луэ. 30 арлэсь тросгес коллективен быгатыса но рос-прос кивалтэ, кӧня ке ар талэсь азьло гинэ та секыт ужлэсь палэнтӥське со. Но ансамблез уг кельты, туннэ нуналэ но мыло-кыдо солэн улоназ пыриське. Мария Аркадьевна ансамбль понна туж трос лэсьтӥз. Солы ми асьмелэсь вормонъёсмес но сӥзиськомы. Пусйыны кулэ Валентина Николаевна Филипповаез но. Со баянэн туж усто но вольыт быгатыса шудэ. Озьы ик вераме потэ Геннадий Семёнович Михайлов сярысь но — со 1989-2007-тӥ аръёсы аккомпаниатормы луиз. Нокыӵе нимысьтыз тодон-валанэз луытэк но, сыӵе усто шудэ вал мызганэн! Вылаз ик, ачиз пор калыкысь ке но, удмурт крезьгуръёсты со туж яратыса но туж усто быдэсъялля. Огъя вераса, коллективмы сыӵе ушъяськымон адямиосыныз котьку туж узыр луэм, али но адӟем карымон усточиосмы трос. 

— Соос сярысь но вералэ вал.

— Туннэ нуналэ устолыкъя кивалтӥсьмы Елена Николаевна Резенова. Со кӧня ке ар ӵоже гинэ ужа али, но ужзэ котьку кулэезъя быдэстэ. Балетмейстермы Алёна Леонидовна Семёнова — «Ӟардонын» 1996-тӥ арысен тырше. Со туж усто удмурт калык эктонъёсты но композициосты гинэ ӧвӧл, бигерзэ но, порзэ но, ӟучсэ но пуктыны быгатэ. Огшоры гинэ но уг пукты — нырысь пыр-поч ваньзэ эскере, книгаосты лыдӟе, интернетысь ивор утча, адямиослэсь юалляське. Номеръёссэ котьку чебертыны, выльдыны тырше. Алёна Леонидовналы Марий Эл республикаысь лулчеберет удысын сиё-дано ужасьлэн нимыз но сётэмын. Аккомпаниатормы Валентина Николаевна Филиппова но Марий Эл республикаысь лулчеберет удысысь сиё-дано ужась. Сыӵе ушъямон но дано, асьсэлэсь ужзэс тодӥсь-валась ӧнерчиосын ужамысь ик, бадӟым вормонъёсы вутскиськомы. 

— Шонер валай-а, тӥ ньыль кылын — удмурт, ӟуч, бигер но пор — кырӟанъёсты но эктонъёсты быдэсъяськоды?

— Бигер кылын кырӟаны ӧм дышетскеме ай (серекъя), та кыл ми понна секытгес. Но вуонояз малпаськомы репертуарамы бигер кырӟанъёсты но пыртыны, ми понна та вылезлы дышетскон понна стимул. Туннэ нуналэ милям котькуд концертамы ньыль блок вань — удмурт, ӟуч, бигер но пор кылъёслы сӥзем блокъёс. Кырӟаськомы куинь кылын — удмурт, ӟуч но пор кылъёсын. Нош тани эктон ласянь шуг-секытъёсмы ӧвӧл — удмуртсэ но ӟучсэ, порзэ но бигерзэ — ваньзэ быдэстӥськомы. 

— Репертуарды сыӵе паськыт бере, ансамбле пыриськисьёс пӧлын удмуртъёс гинэ ӧвӧл, пӧртэм калыкысь адямиос вань, дыр? 

— Шонерзэ верано ке, ансамблямы туннэ нуналэ удмуртъёс сярысь поръёс тросгес... Маин тае валэктыны уг тодӥськы. Бен, ансамбле пыриськисьёслы трос репетициосы ветлыны тупа, та муген тросэз ветлэмысь дугдо. Адямиосты валаны но луэ кадь — котькинлэн дораз ужъёсыз вань. Но ми калыклы гинэ ӧвӧл, асьме коллективмылы но тунсыко мед луоз шуыса тыршиськомы. Тужгес но нылпиос понна, соос мед кыстӥськозы вал ансамблямы шуыса, мед тодозы вал удмурт, ӟуч, пор, бигер калыкъёслэсь лулчеберетсэс шуыса. Ми соослы ӵемысь тодазы уськытӥськомы, кыӵе ансамбле соос пырисько, кыӵе дано адямиослэсь ужзэс азьланьто. Милям потэ, соос мед данъяськозы шуыса «Ӟардонэн» валче луэменызы. Соин тыршиськомы асьме ёросамы но республикаямы выступать карем сяна, Россилэн пӧртэм сэрегъёсаз но вуылыны — коллективмылы пӧртэмлык мед луоз шуыса но, валамон, коллективмес, калыкмес данъян понна но. 

— Та муген 2017-тӥ арын Крымын ортчись «Алтын майдан» калыккуспо инклюзивной фестиваль-конкурсэ пыриськиды, луоз? Соку Гран-при басьтӥды шуыса тодам вайисько, коллективдылэсь нимзэ инмысь кизилилы но сётӥзы. Та сярысь газетамы статья но потэм вал.

— Озьы, 2017-тӥ арын со конкурсын Гран-при утӥмы. Со ик конкурсын кык ар талэсь азьло но Гран-при басьтӥмы. Кылем арын ветлӥмы Абхазие (конкурсэз отын радъязы) — вань кадь номинациосын нырысетӥ интыосын пусйиськимы. Туэ но организаторъёсыз милемыз конкурсэ пыриськыны ӧтизы. Ми коллективенымы шумпотыса сюрес кутӥмы Северной Осетие — туэез конкурс отын ортчиз. Мынӥмы трос кузя, делегациямы 35 адями луиз. Вань кадь номинациосын, кудъёсаз пыриськимы, 1-тӥ интыос басьтыны быгатӥмы. Ми понна та туж бадӟым вормон но шумпотон. Со сяна, ми бускель элькунъёсын ортчись пӧртэм фестивальёсы, конкурсъёсы но шумпотыса пыриськиськом. Киров улосын, Татарстанын ми ӵем куноос луиськомы. Балтась удмуртъёсын но юн кусып возиськомы. Туэ гужем гинэ но Карлыганын Гырон быдтонэз но Чакараез ортчытыку, Балтась удмуртъёс ми доры вуизы. Озьы, ми тӥ доры куное ветлӥськомы, тӥ — ми доры. Эшъяськонмы ноку медаз ышы вал. 

— Туж синмаськымон коллективды, мукетъёс понна примере пуктымон, Наталья Юрьевна. Вуонояз эшшо но бадӟымгес вормонъёсы вутскыны мед кылдоз.

— Тау ӟеч кылъёстылы. Мынам нош, учырен пайдаяськыса, Балтась удмуртъёслы синмаськемме но таукаремме вуттэме потэ. Мон умой тодӥсько тӥ палась егитъёсты. Тӥ туж тыршисесь, ас кылдэс но калыктэс яратӥсь но гажась адямиос. Лулчебереттэс утьыны, вордскем кылдэс тодыны тыршиськоды — та туж дуно. Ноку эн ыштэ та сямъёстэс, котьку валче луэ, милемын озьы ик эшъяське!

— Вераськемды понна тау, Наталья Юрьевна.

P. S. Азьланьтонэз вань. Одӥгаз вуоно номерын тододы, кызьы Карлыганын но Мари-Турек ёросысь мукет удмурт гуртъёсын вордскем кылзэс утьыны тыршо, кызьы удмурт кыллы нылпиосты школаын дышето но бускельёсмы сярысь трос мукет тунсыкозэ.

Наталья Жукова