Хезмәт

Казаньын удмурт пилы синпелет пул усьтӥськиз

Ӧй но малпалля, Казаньын удмурт пилэсь нимзэ нуллӥсь урам вань шуыса... Вань вылэм! Асьмелы, удмуртъёслы вунэм Героймес шараяз В.С. Романов.

Валентин Серапионович, вордскемын 10 мартэ 1937 арын Сизьныр Починка гуртын. 1956 арысен улэ Казаньын, физика-математика наукаосъя тодосчи-кандидат, али ке но Россиысь наукаосъя академилэн (РАН) бурд улаз ужзэ азьланьтэ. Валентин Серапионович 2012-2016 аръёсы Татарстанысь удмуртъёслэн автономизылэн (НКА У РТ) Тӧроез луиз. Ӵапак со аръёсы ик кенжытскиз удмурт геройлэсь нимзэ нуллӥсь ураме синпелет пул (мемориальная доска) понон сярысь малпанэн. Та уж борды басьтӥськемез дырысен ортчиз ини куать ар — сомында ветлоно луиз солы вылӥ кабинетъёс кузя куриськонъёсын сюлворыса. Синпелет пулзэ гинэ но куинетӥзэ лэсьтэм ини — ваньзэ аслаз кисыысьтыз коньдонэн! Синпелет пулзэ интыяны йыг-йыг выль корка но ачиз быръем, дано пумиськон-ужрадэ кун кивалтӥсьёсыз но ачиз ӧтчам. Солы аслыз но Герой ним сётыны луымон! Я бен учке ай: 82 аресъем воргорон (бабай уд шуы но сое, син медаз усьы! «Родные напевы», «Забытые мелодии» но «Бальные танцы» — Эшъяськон Юртысь куинь пӧртэм коллективын но азьветлӥсь со!) Куинь метр ӝуждалае борддоре огназ юнматыса понэ 48 килограммъем гранит пулэз! Та учыр ачиз одӥг подвиг шуымон!

Я, бен кин Со — вунэм Удмурт Героймы? — Иван Николаевич Волков, вордскемын 2 декабре 1893 арын Вятской губерниысь Глазов уездысь Ново-Волково черкогуртысь крестьян семьяын. 1913 арын Казане университетэ дышетскыны пыре. Отын К. Маркс, Ф. Энгельс, В.И. Ленин но мукет революционеръёслэн ужъёсынызы тодматскемез азьпал улонэзлы — революцилы дурбасьтоназ нэгыз луэ. 4-тӥ курсысь студентэз, дышетсконэз понна дун тӧляны быгатымтэысьтыз, университетысь улляло. Озьы ке но со революцилэсь уг палэнскы. 1917 арын 26 мартэ сое Казаньысь Ревкоме быръё, «Рабочий» нимо газетлэн редколлегияз басьто. Сютэм но ёрмыса улэмен, висьыны кутске. Озьы ке но, кенжытскем ужезлэсь уг куштӥськы. Ужась калык гажамысь, Казаньысь Ревком сое А.П. Комлевен ӵош делегат карыса, Москвае большевикъёслэн Апрельской Всероссийской конференциязы ыстэ. Отысь бертыса, заводъёсын но фабрикаосын ужасьёслы социалистической революциын пролетариат азьын сылӥсь ужпумъёс сярысь докладъёс лыдӟылэ. «Рабочий» газет пыр В.И.Ленинлэсь «Апрельской тезисъёссэ» калыклы вуттэ.

Со арын ик июль толэзе властьлы пумит пуромем бугыръяськонъёс кутскемен, И.Н. Волков Горд гвардилэсь отрядъёс кылдытон борды басьтӥське. Соослы пыӵал тӥрлык шедьтон но ыбылӥськыны дышетӥсь инструкторъёс люкан ужъёсын кивалтэ. Быдӟым Октябрь революция нуналъёсы: 24-25 октябре восстаниен кивалтӥсь революционной штабаз ужа, ачиз но красногвардейской отрядъёсты узыръёслы пумит ожмаськонэ ӝутэ.

Революция бере, Иван Николаевич Ревкомлэн ёзчиез луыса бырйиське. Со арын ик сое Казаньысь Горд гвардилэн центральной штабезлы начальник каро, контрольно-ревизионной комиссиязы председателе быръё.

Висёнэз кужмоямен, 1918 арын тулыс сое Уфимской губерние эмъяськыны келяло. Но белочехъёс наступление выжемен, эмъяськыны уг кылды, бертэ вордскем гуртаз, Ново-Волковое. 1919 арын январь толэзе кулэ.

Дано удмурт пилэн Иван Николаевич Волковлэн нимыз, Совето Союз вакытэ, геройлыко подвигзэ вунэтонтэм вылысь, Казаньысь урам ним каремын. (Азьвыл со урам Вторая Гора нимаськем).

Удмурт Героймес данъян синпелет пулэз усьтыку, удмуртъёс сярысь ӟеч кылъёс веразы синпелет пул усьтонэз быдэстӥсь Романов Валентин Серапионович, Татарстанысь удмуртъёслэн автономизылэн Тӧроез Герасимов Андрей Сергеевич, Президентлэн аппаратысьтыз йӧскалык политикая Кивалтэтлэн начальникез Мустафин Данил Махмутович,  Удмурт Элькунысь йӧскалык политикая министр Буранова Лариса Николаевна.

Дасяз но нуиз синпелет пул усьтонэз Татарстанысь удмуртъёслэн автономизылэсь ужъёссэ нуись директор Марина Анатольевна Иванова.

Синпелет усьтонын чузъяськизы удмурт кырӟанъёс но. Соос пӧлысь огез — ачиз Валентин Серапионович куать ар жадемъёссэ сайкиз мылкыдаз кельшем кырӟан чуръёсын. Оло пушкыз тыремен, оло кырӟан кужымен, ас мылкыдызъя тунсыкъяськыса ми пӧлы пыриськем палэнысь воргоронлэн (татын артэн коркан, пе, ужасько, историк) но лулсэрыз лэйказ, лэся. Люкаськемъёслы тау карыса, табере тодӥсько ни шуиз, кин со Волков.

Марина Иванова, Татарстанысь удмуртъёслэн автономизылэсь ужзэ быдэсъясь директорез,

Леонид Сапожников, Балтась ёросысь «Кенеш» НКА-лэн Правлениезлэн ёзчиез

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: