Хезмәт

«Котькуд книгалэн аслаз лыдӟисез вань»

1995-тӥ арысен кутскыса, 27-тӥ куартолэзе Россиын библиотекаослэсь но со удысын ужасьёслэсь нуналзэс пусъё. 27 ар ӵоже тросэз воштӥськиз: библиотекалэн функциосыз но, улонэз но. Одӥгез гинэ уг воштӥськы: библиотека котьку ас лыдӟисьёссэ шедьтэ.

Туала библиотекаосын, тужгес но гуртын интыяськемъёсаз, шыпыт: лыдӟисьёс ке вань, соос книга лыдӟонэ выемын. Нош библиотекарь аслэсьтыз ужъёссэ быдэстэ: книгаосты радъя, соосты компьютере пыртэ, утялске… Тае ваньзэ туж умой Ӟаны гуртысь 22-тӥ номеро филиаллэн заведующиез Римма Александровна Анисимова быдэстэ. Библиотекарь луэмез сяна, Римма Александровна пӧртэм общественной ужъёсы но пыриське: со ик переписчик но, со ик быръён комиссилэн секретарез но луэ. Ӧнер праздникез азьын Римма Александровнаен ужез сярысь вераськимы.    

— Римма Александровна, кӧня ар ӵоже тӥ библиотекаын ужаськоды но ужады асьтэлы тросгес маиз кельше?

— Дышетскемея мон биологияя но химия дышетӥсь луисько, Казаньысь пединститутысь естественно-географической факультетэз йылпумъяй. Ӧнерея ужаны ӧй вутскы — нырысь кӧня ке дыр ӵоже Ӟаны школаысь интернатын визьнодась луыса ужай, собере ини библиотекае интыяськи. Татын мон дырозь Кунаев Аркадий Михайлович ужаз, со пенсие потӥз но мон со интые ужаны кутски. Озьыен, мон татын 1994-тӥ арысен ужасько ини. Ужме яратӥсько, сотэк ужаны ӧй быгатысал, дыр. Калыкен ужаны кельше. Школамы но татын артэ гинэ интыяськемын, соиз умой — дышетӥсьёсын, визьнодасьёсын валче пӧртэм ужрадъёсты радъяны быгатӥськомы.   

— Та ӧнерез быръён понна, лыдӟиськыны туж яратыны кулэ, дыр.

— Мон малпамтэ шорысь библиотекае ужаны интыяськи, отын ужало шуыса ӧй малпа. Инты луиз но мынӥ — ужаны кулэ вал ук. Но, зэм, лыдӟиськыны мон пичи дырысен яратӥ. Трос книгаосты лыдӟи. Тодӥсько на, школаын дышетскыкумы классэн ик книга вузан магазинэ мынӥськомы но 10-15 коньыен книгаосты басьтӥськомы вал.

— Туала дыре сыӵе трос лыдӟиськисьёс ӧжыт, дыр, ини.

— Улон воштӥське бере, библиотека но воштӥське. Адями, азьло дырен ӵошатыса, библиотекае ӧжытгес ветлэ ке но, милям ужмы ӧжытгес кылиз шуыны шонер ӧвӧл. Ми ведь, лыктэм муртъёслы книга сётъям сяна, мукет трос ужъёсты но быдэсъяськомы. Кылсярысь, электронной каталог кылдытӥськомы. Озьы ик калыкен трос ужаськомы. Нялтас вераса, пӧртэм арлыдъем калыкен — нылпиосын но, бадӟымъёсын но, мӧйыосын но. Егитъёс сярысь но ум вунэтӥське. Али кемалась ӧвӧл гинэ, шонергес вераса, 19-тӥ куартолэзе, школаын ужасьёсын валче нылпиослы «В здоровом теле здоровый дух» шуыса нимаськись спортивной ужрад ортчытӥмы. 14-тӥ куартолэзе егитъёс понна «Путешествие по красной книге» ним улсын ужрад радъямы. Пӧртэм акциосы но пыриськиськомы. Кемалась ӧвӧл «Читаем детям о войне» акцие пыриськимы, нылпиослы военной тематикаен произведениосты лыдӟи.   

— Библиотекае ветлӥсьёс сыӵе ужрадъёсы пыриськыны ярато-а?

— Ярато. Тани кылсярысь, 3-тӥ оштолэзе клубын ужасьёсын валче «Ортчемезтэк ӧвӧл вуоноез» шуыса нимаськись пумиськон радъямы. Со ужрадэ 19 адями пыриськиз. Мынам малпамея, та гуртысь библиотека понна ӧжыт ӧвӧл. Пумиськонлэн рамкаосаз люкаськем калыклы (соос пӧлын самой покчиезлы 10 арес, нош самой мӧйыезлы 87 арес вал) гуртмылэн историез, удмуртъёслэн сям-йылолъёссы сярысь верамы. Гуртысьтымы гажамон адямиос но — Ермаков Иван Васильевич, Шадров Пантилеймон Дмитриевич, Папаев Михаил Фёдорович — мыло-кыдо пыриськизы. Озьы ик троссэ ужрадъёсты дышетӥсьёслэн но визьнодасьёслэн юрттэменызы ортчытӥськомы. Милям ведь асьмелэн арлы гожтэм планмы вань, со планъя ик ужаськомы. Тросгес населениез ужамы кыскыны тыршиськомы. «Тазалык» темалы бадӟым саклык висъяськомы. (Пумыз. Кутсконэз 4-тӥ бамын).

Озьы ик кылбурчиослэсь, гожъяськисьёслэсь вордскем нуналъёссэс, юбилейёссэс но палэнтӥ ум ортчиське. Огъя вераса, ужлы ноку ум ёрмиське. 

— Сомында ужаса, ушъямон бервылъёсы но вутскиды шуыса тодӥсько.

— Зэм. Библиотекамы пӧртэм конкурсъёсы, акциосы, онлайн амалэн ортчись конкурсъёсы но мыло-кыдо пыриськыны тырше, соин бервылъёсмы но умой шуыса малпасько. Ёрос уровенен но, республика масштабен но грамотаосмы ӧжыт ӧвӧл. 2020-тӥ арын Игнатьева Иллария «Аленький цветочек» Всероссийской творческой конкурсын 1-тӥ инты басьтӥз, «Джалиловские чтения» конкурсын но лыдӟисьёсмы ушъямонэсь бервылъёсы вутско, призо интыос басьто. 2021-тӥ арын «Башваткыч» передачае но пыриськыны шуд усиз. 2021-тӥ арын ТР-ысь гурт поселениосын интыяськем лулчеберет учреждениос пӧлын «Лучшая сельская библиотека» номинациын 1-тӥ инты басьтыса, 100 сюрс манет утӥмы. Со коньдонлы библиотекаямы телевизор, цветной принтер но ноутбук басьтӥмы. Та ми понна туж шумпотымон.

— Римма Александровна, озьы бере, библиотекаяды ветлӥсьёс ӧжыт шуыны уг луы? Озьыен, библиотека улоз на?

— 1994-тӥ арысен ужасько бере ини, ӵошатыса вераны быгатӥсько: туала дыре калык, зэмзэ но, библиотекае ӧжытгес ветлэ. Та нокин понна бадӟым секрет но ӧвӧл. Тросэз адями кулэ луись информациез книгаысь ӧвӧл, интернет источникъёсысь утчаны дышем. Но озьы ке но, книгаез гажась адямиос туала дыре но вань. Библиотекаямы ветлисьёс но вань. Кин ке книгалы пыре, кин ке газет, журнал лыдӟыны вуэ. Кылсярысь, ярато Удмуртиысь вуэм «Кенеш», «Инвожо» журналъёсты лыдӟыны — котькин но та журналъёслы уг гожтӥськы бере, библиотекае лыктыса лыдӟыны туж умой ук. Библиотекаямы 10 сюрслы матэ книгаосмы вань. Соос пӧлын вылез но, вужез но шедёз. Выль книгаос туж трос уг берто, со ваньмыз централизованно радъяське. Котькуд книгалэн аслаз лыдӟисез вань. Тае но вераме потэ: калыкмы милям умой, югдурамы пырыны быгатэ — ку гинэ ужрадъёсы соосты ӧд ӧтьы, адямиос лыктыны дась. Соин туж шумпотӥсько но оскисько: библиотекамы улоз на! 

— Вераськемды понна бадӟым тау, Римма Александровна! Ӧнер праздникеныды ӟечкыласа, сӥзисько тӥледлы тазалык, шудбур но ужады выль азинсконъёс.

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Твиттер, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: