Ӝӧксьӧр кырӟанъёс

Мертчан но черсӥ,

куж но черсӥ…

Ӝоксьӧр кырӟанъёс

Мертчан но черсӥ, куж но черсӥ,

Ӟеч вылэм мертчанлэн черсонэз.

Ӟечен но улӥ, шуген но улӥ,

Ӟеч вылэм ӟечен улонэз.

***

Сизьымо кутэз кин но уз кутча,

Кутаса сётӥсез вань дыръя.

Тӥледыз туган кин но уз кары,

Кырӟаса сектасез вань дыръя.

Сьӧд нюлэс сёртӥд коньыед кошке,

Утча уд шедьты пытьызэ.

Со коньы кадь ми но кошкиськом,

Утчаса уд шедьтэ вужермес.

Возь вылын сяськаед туж уно,

Ӧвӧл ук италмас сяськаед.

Татын бен пиос туж уно,

Ӧвӧл ук вордэм нуныкае.

Луд ӟазегедлэн сюресэз,

Уг адскы шундыя куазьёсын.

Милям сюлмаськонъёс-бӧрдэмъёс

Уг адско муртлэн син азяз.

Толэзь югытэд ӧвӧл дыръя,

Мар ужаськод кизили югытэн.

Аслам шудэ ӧвӧл дыръя

Мар ужасько муртлэн шудэныз.

Гырем анаме вамен усыясал,

Жалясько кыткем валъёсме.

Оломар пӧртэм кылме верасал,

Жалясько каръян лулъёсме.

Тулыс но вуэд малы кожгетэ,

Кошкон интыез ӟоскытысь.

Мынам кӧты марлы но бӧрдэ,

Улон интые ӟоскытӥсь.

Жаль-жаль но кошкись ошмесад,

Кинлэн мисьтськемез уз поты.

Тӥ кадь каньыл туган доры,

Кинлэн лыктэмез уз поты.

Анна Сапожникова, Сырья гурт

«Азьлане», 26 декабрь, 1992 ар, №120.

Редакцилэсь: текст тупатъятэк сётэмын.

Фото: https://pixabay.com/ru