Хезмәт

Балтач районы

18+
2024 - Гаилә елы
Азьлане

«Куать нылпиос пӧлысь огнам кыльыса, али но улӥсько

​​​​​​​Вуж Кушкет гуртысь адӟем карымон песянайёсын пумиськыны лыктыку, кемалась ӧвӧл 90 аресъем юбилейзэ пусъем Мария Ильмурзинаен сяна, Александра Филипповаен (таиз туннэ статьялэн героез) но Елизавета Зимееваен (со сярысь газетмылэн одӥгаз вуоно номераз лыдӟоды) тодматски.  Таяз учыре Александра апаен вераськеммы сярысь гожтӥсько.

Пересьёсты кадырласькомы шуыса, соосын пумиськыса но матысен тодматскыса, улон-вылонзы, секыт адӟонъёссы, туала улонзы сярысь газетэ гожъяськомы шуыса, Александра Филиппова туж шумпотэ. Песянай уг ваты: мӧйы адямиосты шумпоттон понна, трос кулэ ӧвӧл. Кӧня ке небыт кыл веран но тырме. Шура апай вить нылпиосты будэтэм анай, внукъёсызлы но правнукъёсызлы шумпотыса улӥсь ӵужанай но песянай луэ.

Александра Кузьминична 1934-тӥ арын Кукмор ёросысь Лельвиж гуртын вордскем. «Кызьы бен татчы вуиды?» шуэм юанлы нырысь серекъяса «Егит дыръя вуиськод со, малы ке но Лельвиж пиосты кулэ ӧй кары» шуиз но собере, малпаськонэ усьыса, вераны кутскиз:

— Мынам аслам атае жугиськонысь ӧз берты. Оже кошкыкуз, солэн кык нылъёсыз кылизы — мон но сузэры. Сузэры пичи вал али, со кема улытэк кулӥз но, ми анаеным кыкнамы улыны кылимы. Ож бырытозь кыкнамы улӥмы, мае гинэ адӟыны ӧз кылды со дыре… Пичиысен ужаса будӥ. Нокытчы ӧй но ветлы, гумыре колхозын ужаса ортчиз. Школаын ньыль класс дышетски. Туж возьдаськись вал, номае но ӧй юа. Ма, озьы дышетскыны луоз шат… Азьло дышетӥсен ваче пумит луыны возьыт вал. Туала дыре дышетӥсьёс асьсэос нылпиослэсь кышкало, дыр. Лельвиж дорысен куинь иськемын Сардыкбаш бигер гурт вань, отчы удмурт школа усьтӥзы, мон отчы мынӥ, но, дышетскыны уг быгаты шуыса, берен кошки. Дырез сыӵе вал, дышетӥсез туж гажазы. Урамтӥ дышетӥсь лыктэ ке, кызьы ортчыны ёрмисько, кытӥ ортчоно меда шуисько вал.

Дышетскон сярысь малпанъёсызлэсь палэнскыса, Шурапай нош ик улонзы сярысь мадьыны кутскиз:

— Сыӵе улонмы 1946-тӥ арозь кыстӥськиз. Улон секыт, сютэм. Скал вордӥмы, анай маин турын люкам, дыр, али но уг валаськы. Пуэз но кулэ. Огдыре анаез колхозэ трактористъёсты сюдон понна ужаны пуктӥзы. Нош трактористъёсты сюдэм сяна, анай колхозын нянь но пыжиз. Нянь пыжем понна пу но уг сёто вал, ачид утчаса вайыны кулэ вал сое. Пулы ветлэммес умой тодӥсько. Огпол нуналаз сизьым пол нюлэскысь пу вайимы. Уг вунэтӥськы сое, уг но вунэты ноку... Нюлэс но кыдёкын ӧй вал, гурезь но ӝужыт ӧй вал кадь, но жадемысь отчы пуксьыса бӧрдэмме одӥг но уг вунэтӥськы.

1946-тӥ арын Шура апайлэн анаез одӥг воргоронэн улыны кутске, со пиосмурт инвалид луэм. 1949-тӥ арын Шуралэн сузэрыз вордске но, жаляса верано, со ныл 1957-тӥ арын кулэ… 1959-тӥ арын анаез но сопал дуннее кошке.

— Анае кулэм бере, сюратаен кыкнамы улыны кылимы, со мыным туж матын вал. Монэ со туж яратӥз, огпол но кур ӧз кары, мон сое котьку ӟеч кылын гинэ буре вайисько. Аслыз «дядяй» яке «агай» шуыса вазьыны куриз, нош мынам «агай» но, «дядяй» но шуэме уг поты, «атай» шуэме потэ вал…  Нырысьсэ солы «атай» шуыса ваземме но тодам возисько. Шундыя куазь. Атай мар ке но лапасын ужа вал, мон солы «Атай, шыд сиыны пыры» шуи но ачим ураме бызьыса кошки… Со сямен «атай» шуыны ымы усьтӥськиз. Эх, шумпотэмелы вал, «атай» но «атай» гинэ вал ни собере… Анай кулэм бере, атай нош ик кышнояськиз. Мон но, кема улытэк, аслэсьтым семьяме кылдытӥ.

Вуж Кушкет гуртысь Пантелеймон агаен, вуоно кузпалэныз, кык пол гинэ адскыса вераськемез луэм Шура апайлэн. Лельвижын Панти агайлэн апаез улэм, ӵапак со апаез ик Панти агайлы егит Шураез кышно пыртыны дэмлам. Озьыен, Пантелеймон агай Шура апайлы гожтэт келяны малпам. Гожтэтаз кышно пыртыны малпанъёсыз сярысь со шара верам. Нош Шура апай уг мынӥськы шуыса ответ келям.

— Пантелеймонлэсь лэзем гожтэтсэ ӝуатӥ. Нош со озьы ке но лыктыса вуэм гуртамы. Ӝытлань ӵужапай кӧжыен шыд пӧзьтэм вал. Мон шыд сиёно тэркыям пуньыме понӥ но басьтыса ӧй вутты — Пантилэн апаез ӧстӥ пыре вал ни. Соосыд, пе, лыктыса вуизы. Пуньые шарт! киысьтым усиз. Мон дорысь потӥ но бызьыса кошки. Ӧй пегӟы, бускель кышно доры кенеш курыса мынӥ. Кушкет пи, шуисько, лыктэм, мыном-а, уг-а, — тодаз вае 1959-тӥ арез Шура апай. 

Кушкетэ Филиппов Пантелеймонлы кышно луыса лыктыны Александра соглаш луэ ик. Аресэз но тырмемын вал ини — солы соку 25 арес луэ.

Картлы кошкемез бере, Шура апай колхозысь фермае ужаны пыре, парсьёсты сюдэ. Но отын со кема уг ужа, колхозын ик пӧртэм ужъёсты быдэсъяны кутске. Ужзэ воштон висеменыз герӟаське. Лельвижын улыкуз но со ик муген, колхозын сяна, нокытын ужаны уг вутскы, вылаз ик анаез но висем, нош Шура сое утем.

Кушкетын улонэз вольытэн но каньылэн уг ортчы Александра апайлэн. Но визьмо ныл анайзыезлы но пумит кыл уг вера, кузпалэныз но уг даллашы. Солэн вордскем гуртаз, вордскем юртаз бертыса ӝожтӥськыны, сюлэмзэ буйгатыны интыез но уг луы, апай-сузэрыз, анаез ӧвӧл… Пантелеймон кузпалэзлэн Зоя нимо сузэрыз луэм, со Казаньын ужам, собере Челябинске картлы кошкем. Зоя егит семьялы ваньмыз ласянь юрттэм. Солэн кузьмам чай юоно тэркыез али но вань, пе. Со Зоялэн луэмезлы Шура туж шумпотэм.

— Улӥмы куиньнамы — мон, Пантелеймон но солэн анаез. Пересь песяймы вал, со 1961-тӥ арын кулӥз. Солэн ньыль пиез луэм, ньылез ик жугиськонэ кулэм, — маде песянай. — Тани мон но вить нылпиосты будэтӥ, Инмарлы тау. Ньылез пи, огез ныл. Бадӟым пие Геня бускельын улэ. Кыкетӥез, Валерий, Тюменьын интыяськиз. Куинетӥез Коля Челябинскын, ньылетӥез, нылы, Мария, Кутэшын улэ. Самой покчиез Иван. Туннэ нуналэ Иванэн, Лена кенэным но куатетӥ классын дышетскись Ярослав внукеным ӵош улӥсько мон. Иванлэн куинь пиез. Кык бадӟым пиосыз, Дима но Даниил, Казаньын уло но ужало.

Туннэ нуналэ 10 внукез но 11 правнукез вань ини Александра апайлэн.

— Лыдъяса быдтыны но уг луы внукъёсме но правнукъёсме. Узыр песяй мон, Инмарлы тау, — шумпотэ Шурапай.

— Трос ӧвӧл солэн, монэ сутытозяз али, — серекъя вӧзаз пукись Мария апай Ильмурзина, мон шоры учкыса.

— Тон мында арес люкатозям луоз али, люкаськоз, — уг сётскы Шура апай.

Тазьы серекъяса вераськемзы бере, матысь ӵыжы-выжыос но эшъёс кырӟаны кутскизы.  Ог-огзы доры соос ӵемысь куное ветло вылэм соос. Азьвыл люкаськыса кырӟаса но пукиллям. «Али ӝӧк куспын пукыку, сказка вераса пуко, ми весь кырӟаськомы вал», — шуэ та сярысь Александра Кузьминична.

Шура апай удмурт кырӟанъёсты туж яратэ вылэм. Ас дыраз песянай соосты тетраде но гожъям. Табере гожъяськыны туж уг пӧрмы вылэм ини солэн. Нош ёрос газетэз шумпотыса, пе, лыдӟисько. Пичи дырысеныз Шура апай туж кышкась но возьдаськись луэм ке но, кырӟаны но эктыны со егит дырысеныз туж яратэм.

— Али но мызган куара кылыны уг луы, пыд эктыны куриське. Со пинал дырысен озьы вал. Сюлэм уг пересьмы вылэм, ачид пересьмид ке но. Тани мон одӥг тетрадь тыр кырӟанъёсты гожъяй ини, табере йырам кыльымтэ ини ваньмыз. Валляна кырӟанъёс ведь со. Соосты егитъёс тодысалзы ке, дышетскысалзы ке, кыӵе умой луысал, — сюлмаське Шура апай. 

Пенсие Шурапай 1984-тӥ арын потэм ке но, собере но трос аръёс ӵоже колхозын тыршем.

— Балтасе но мынэме ӧй вал, весь гуртын, ужын вал. Бушын ужамы, али туала дыре, Инмарлы тау, сёто ини коньдонзэ но, но табере тазалык ӧвӧл ни. Нош ми егит дыръя, секыт йӧтӥз. Яра али Панти сапег лэсьтэ вал, соин гинэ кызьы ке улӥмы. Гумыраз колхозын ужаз со но. Нюлэскысь бертыса ӧз вуы кузпалэ. 2002-тӥ арын кулӥз ини Панти. Нош мон али но улӥсько…  Али но улӥсько, куать нылпи пӧлысь огнам кыльыса. Монэ Инмар соос понна возе, дыр. Соослэсь улонзэ улӥсько, дыр, мон. Агае-апае кулэм, выны кулӥз, кык сузэръёсы кулӥзы, мон улӥсько али, — синкылиоссэ ӵушылыса азьланьтэ веранзэ Шура апай. — Нокинэ ӧз кыльы… Нылпиосы, внукъёсы вань, Инмарлы тау. Семьяям куать нылпиос пӧлысь огнам кылеме понна, аслым вить нылпилэн анаез луыны шуд усиз, Инмарлы тау.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Со понна аслым вить нылпилэн анаез луыны шуд усиз, Инмарлы тау