Хезмәт

Кужыммы – ӵошен луон бордын

Асьмеос, балтасьёс, огшоры ёросысь огшоры улӥсьёс. Ӧвӧл, тазьы вераны шонер уз луы. Асьмелэн ёросмы, оло, одӥгез тужгес чеберез, паймымонэз, выжыкылын кадь чебер азе пуксемез инты луэ, дыр.

Балтась ёросмы Киров улосвылэн но Марий Эл Республикаен артэ интыяськемын. Кин одӥг пол ке но асьме доры вуылӥз, ноку уз вунэты та палъёсты, выльысь но выльысь лыктэмез потоз солэн асьме доры, паймымон чебер нюлэслэн чылкыт омыреныз шоканы, паськыт бусыосты  но вӧлмыт возьвылъёсты учкыны, вутымъёслэн но шуръёслэн чеберзылы синмаськыны.

Асьмелы шуд усиз вордӥськыны сыӵе интыын, кытын уло ӟучъёс но, удмуртъёс но, бигеръёс но, чувашъёс но, поръёс но, узбекъёс но, цыганъёс но, полякъёс но, турокъёс но, мукет калыкъёс но. Та асьмелэн бадӟым Атаймузъеммылэн пӧртэм калыкъёсысь) адямиосты огазеясь одӥг пичи люкетэз луэ.

Туала секыт улонын шаермылэн тужгес бадӟым узырлыкез — калыкъёслэн эшъяськонзы, соос куспын каньыл кусыпъёс. «Калык эшъяськон» шуэм кылъёс асьме понна ноку но огшоры верам кылъёс ӧз луэ. Россилэсь гимнзэ кылэмелы быдэ пуш тыре, вылтыр юзыр-кезьыр луэ, синвуос асьсэос быльырало. «Эшлыко калыкъёслэн дауръёслы союззы...» — шуэмын отын, таин Россиын улӥсь котькуд гражданин данъяське, та шаермылэн валтӥсь узырлыкез луэ угось. Нош асьме ёросамы — тужгес но.

Кӧня асме тодӥсько, мон котырын котьку пӧртэм йӧскалыкысь адямиос луизы, соин мон понна но тросэз эшъёсы понна одӥг кадь матын луэ удмурт кыл но, ӟуч кыл но, бигер кыл но. Соосын ми пичи дырысен капчиен вераськиськом. Удмуртъёслы тунсыко пото пор, бигер кылъёс, бигеръёслы — удмурт кыл... Со ведь сокем тунсыко: уно кылъёсты тодыны, бускельёсыдлэсь вераськемзэс валаны но вераськоназы пыриськыны.

Асьме ёросын ваньмыз уникальной, аспӧртэмлыко, школаос гинэ но. Кыӵе мукет школаос ушъяськыны быгатозы сыӵе пӧртэм пумо йӧскалык дышетскисьёсын но дышетӥсьёсын, кудъёсыз куспазы туж тупаса уло? Нош кыӵе тунсыкоесь пӧртэм кылъёсын но культураосын герӟаськем праздникъёс но мукет ужрадъёс ортчыло асьме школаосын! Со кырӟан но эктон, кылбуран, шудон, калык сиёнэн герӟаськем конкурсъёс, кудъёсазы пыриськыны быгато вань мылкыд карем муртъёс. Со ведь сокем тунсыко — пӧртэм калыкъёслэсь лулчеберетсэс тодыны, соос пӧлын астэ «ас» муртэн шӧдыны.

Асьме пала ӵемысь телевидение но вуылэ. Репортажъёсты школаосын гинэ уг уськыто. Ёросысьтымы поселениосын но пӧртэм йӧскалык адямиосын кылдытэм семьяос уно. Котькудӥз семья — историен кылдытэм калык сям-йылолъёслэн ваньбур шыкысэз. Бигер эчпочмакысен кутскыса, ӟуч щи, удмурт перемеч но поръёсын яратэм кӧй доры вуытозь. Паськыт но вӧлмыт вурем ӟуч сарафанысен кутскыса, чеберъям бигер дэремозь, удмурт калык чеберман камалиысен но пор эктӥсьёслэн тыпыртонозязы. Нылпиос но сыӵе семьяосын, кӧня ке кылэз тодэмзы сяна, пӧртэм калыкъёслэн лулчеберетсы борды но кыстӥсько. Тужгес но тунсыко ортчыло удмурт но пор сюанъёс, отын калык дӥсьёсын лыктэм куноос нылэз — выль кенэз куро, сюан кырӟанъёсты кырӟало, калык эктонъёсты экто...

Асьме ёросмы пӧртэм калыкъёсыныз гинэ уг данъяськы, ас сям-йылолъёссэ утьыны быгатэменыз но ушъяськымон. Нош соос асьмелэн ӧжыт ӧвӧл. Асьме дорын радъясько пӧртэм ярмаркаос, адӟытонъёс, быдэс ёросысь калыкез бордазы кыско чебересь праздникъёс. Кӧня котырысь адями люкаське арлы быдэ ортчытӥськись Сабантуй празднике, удмурт Гырон быдтонэ! Кыӵе узыр ярмаркаос ортчыло асьме дорын! Татын сиён-юонъёс но ас киосынызы лэсьтэм арбериос но мукетыз. Котькуд калыклы тупась паймымон узырлык, мукетъёсызлэсь висъясь шӧм. Асьмеос ас сямъёсмес гинэ ӧвӧл, ӟеч бускельёсмылэсь йылолъёссэс но утьыны тыршиськом, ческыт пӧрамъёсын ог-огмы доры куное ветлӥськом, калык сиёнъёслэсь рецептъёссэс вераськом, ог-огместы праздникъёсын ӟечкыласьком но кузьымъёс сётъяськом.

Балтась музъем котьку но куно карыны быгатэменыз данъяськем. Паймонэз но ӧвӧл, татчы асьме республикаысьтымы гинэ ӧвӧл, бускель улосъёсысь куноос но, кунгож сьӧрысь адӟем карымон адямиос но вуыло шуыса. Соос ӵемгес лыкто праздникъёсы, одно ик пырало Ципьяысь «Калыкъёслэн эшъяськонзы» музее, кудӥз асьме музъеммылэн лулчеберет ваньбурезлэн ошмесэз луэ. Со музейын вашкала дырысен кутскыса, туннэ нуналозь история люкамын. Отын туала но вашкала калык дӥсьёсын дисям манекенъёсын, калык тусьты-пуньыосын нимаз зал но вань. Пыриськод отчы но шаередлэн историяз зымиськод, калыклэсь мылкыдзэ шӧдӥськод. Ас калыкедлэн историез борды йӧтскыкуд, астэ солэн люкетэныз шӧдыкуд, макем бадӟым данъяськон мылкыд тырмытэ бен сюлэмдэ, кыӵе шумпотон тонэ басьтэ —  ваньзэсты ӟыгыртэмед но соосты яратэмед сярысь верамед ик потэ. Вералэ табере: быгатэ-а одӥг пол ке но та музейын луэм, асьме паймымон палъёсы вуылэм мурт ас агай-вынэз шоры кизэ ӝутыны? Уг, татын асьмеос бадӟым эшлыко семьяен улӥськом.

Пӧртэм калыкъёслэн ӵошен улэмзы, семьяын кадь ик, ог-огдэ гажантэк, ог-огдэ валантэк уг пӧрмы. †ошен улонлэн валтӥсез — мукет калыклэн сям-йылолъёсыз шоры сяна, солэн осконэз шоры но гажаса учкон. Балтасьын уло кык пӧртэм осконысь адямиос: христианъёс но мусульманъёс. Пӧртэм осконысь муртъёс но ог-огзы шоры гажанэн учко, одӥг кадь гажало осконэн герӟаськем праздникъёсты но. Ымусьтонэз но, Курбан байрамез но вань калык пусъе. Соос асьме дорын шутэтскон нуналэн лыдъясько.

Берло дыре дуннеын югдур туж лэчыт кариське. Но асьмеос тодӥськомы: кужыммы — ӵошен луон бордын. Асьме шаерамы, нимаз улосъёсын но нимаз гуртъёсын улӥсь калыкъёслэн, нациослэн ӵошен кариськыны быгатэмзы бордын. Калык кусыпъёсты юнматонэ, каньыл улонэз утёнэ ас люкетсэ котькин ас интыяз пыртэ. Сое котькудмы быгатэммыя быдэстӥмы ке, асьмелы номыр но кышкыт ӧвӧл. Эшлыко улыку кышкыт ӧвӧл нокыӵе санкциос но палэнысен кышкатонъёс.

Асьме шаерысьтымы калыкъёс куспазы каньыл улыны кулэ. Со секыт. Но вань шуг-секытъёсты ӵошен радъяны кулэ. Нош та уз пӧрмы, мукет калыклэсь лулчеберетсэ, сям-йылолъёссэ, историзэ но осконзэ гажатэк. Тае ке ӧм вунэтэ, вуоно нуналлы но асьмеос оскыны быгатӥськом...

 

 

Реклама
Нравится
Поделиться:
Реклама
Комментарии (0)
Осталось символов: