Ма бордын луэ таза пересьмон?

Наталья Жукова, 26 сентябрь 2019 - 17:46

1822

21 сентябре Покчи Лӧзя гуртысь Медведева Анна Андреевна бадӟым праздниксэ — 90 аресъем юбилейзэ пусйиз.

Та нуналэ со ваньзылэсь — матысь адямиосызлэсь но, ӵыжы-выжыосызлэсь но — яратэмзэс, район кивалтэтысь вуэм куноослэсь гажамзэс шӧдӥз.

Етӥз песянай со доры вуэм куноосты ваньзэсын тодматӥз но ачиз сярысь мадьыны кутскиз:

— Мон ачим та гуртысь ӧвӧл — Бадӟым Лӧзялэн I-тӥ люкетаз вордскемын. Та гуртэ картлы кошки. Ма, со дырозь но Покчи Лӧзя вордскем гуртэ кадь потэ вал — гуртысь ньыль классъем школаез йылпумъяса, Покчи Лӧзя школае дышетскыны выжи ук. Татын сизьым классэз йылпумъятозь дышетски. Собере ини — ужай но ужай. Ваньзэ-ӧвӧлзэ дас вить арес гинэ вал ужаны кутскыкум.
Озьыен, 1944-тӥ арын 15 аресъем егит ныл, школазэ йылпумъям дырысеныз гуртын ужа но улэ, Балтасьысь государственной банке ужаны интыяське. Нырысь кассаын дышетскись луэ, собере, кӧня ке дыр ортчыса, старшой кассир должностьын ужаны кутске. «Гумыре ӵоже одӥг интыын ужай, 35 ар. 50 аресэ тырмем бере, пенсие потӥ. Ини тани пенсиын луэмелы но 40 ар вылэм ини...», — ортчем аръёсызлы ачиз но пайме кадь нылкышно.

Анна Андреевналэн вить нылпиез вань — Нылыз Валентина (анаеныз ӵош улэ) но пиосыз Евгений, Николай, Александр но Лев. Нылпиосыз пӧлысь куинез татын ик, Покчи Лӧзяын уло, одӥгез пиез Казаньын, нош мукетыз — Ижевскын. Анайзылэн но песянайзылэн юбилеяз но бадӟым семья валче люкаськиз. Ижкарысен гинэ но Анна Андреевнаез ӟечкыланы куинь машинаен ӵыжы-выжыосыз куное бертӥллям. Туннэ нуналэ солэн дас кык внукез но дас кык правнукез вань — тӥни кыӵе узыр песянай со. Анна Андреевнаез мусо карыса, «пересь песянаймы» шуыса гинэ вазё. «Туннэ нуналэ ваньзы сӧл-таза, — шумпотэ юбиляр. Кызь ньыль внукъёсы но правнукъёсы — мынам самой бадӟым шумпотонэ. Кузпалы гинэ дорам ӧвӧл ни», — шуэ Анна Андреевна, синкылиоссэ ватыны тыршыса. — Ми соин ӵош 68 ар улӥмы. Ђыны ар талэсь азьло со ми пӧлысь кошкиз (1951-тӥ арын Анна Андреевна Покчи Лӧзяысь Медведев Анатолий Кузьмичлы, Быдӟым ожысь ветеранлы, бызе. Туэ апрель толэзе Анатолий Кузьмич та дуннеысь кошкиз — Н. Ж.). Мон али но ӝӧк сьӧры пукси ке но, ураме потӥ ке но — мар кари ке но — со сярысь малпасько...

— Ма, тӥледлы 70 арес гинэ дыр ай, тӥледыз ӟечкыланы люкаськем кивалтӥсьёс но, ӵыжы-выжыосты но мае ке сураллям, дыр, — шуисько, бӧрдыны куткем песянаез кызьы ке но буйгатыны тыршыса. Анна Андреевна та верам кылъёслы шумпотӥз, синкылиоссэ ӵушиз но, пальпотонзэ ватытэк, шуиз: «Секретсэ вералом-а? Трос ужай но ужасько, ужтэк уг пукиськы, тушак вылын уг кыллиськы. Али но ужасько вал, тӥ лыктэмысь гинэ ужме кельтӥ но тани дӥськутъёсме воштӥ. Ми ведь пичиысен секыт уж адӟыса будэм поколениысь нылпиос, соин ужлэсь ум кышкаське. Али со ваньмыз механизированной, нош ми киын ужаса будӥмы. Пенсие потэме бере, дыры луыкум, яратӥсько вал черсыны, вуриськыны. Табере синмы лябгес ини сыӵе ужен вырыны... Ма, ярам. Тазалык гинэ мед луоз, — шокчыса вера Анна Медведева.

Та нуналэ 90 аресъем юбилееныз ӟечкыласа, ёрослэн главаез но район кивалтэтысь представительёс Анна Андреевналы РФ-лэн Президентэзлэсь ӟечкылан открытказэ, район главалэсь Таукарон гожтэтсэ сётӥзы, трос кузьымъёс кузьмазы, кузь гумыр но юн тазалык сӥзизы. Внукъёсыз но, нылпиосыз но юбилярез трос сяська керттэтъёсын но кузьымъёсын шумпоттӥзы.

— Тау бадӟым ваньзылы но люкаськем куноослы. Мон туж шумпотӥсько, та нуналэ матысь адямиосы вӧзам шуыса, ужзэс кельтыса мон доры вуизы шуыса. Туннэ нуналэ мон туж шудо адями. Вӧзам яратоно адямиосы, ини 2010-тӥ арысен та шуныт ветеранской коркан улӥсько. Оскисько, вуонояз но милемыз каньыл но шулдыр улон вите шуыса.