Ма бордын шудо семья улонлэн секретэз?

Та юанлы Сырья гуртысь 52 ар ӵоже валче улӥсь Иван но Надежда Плотниковъёс ответ сётӥзы
но адӟем карымон семьяос пӧлысь Иван но Надежда Плотниковъёслэн семьязы нимысьтыз пусйымон. Кема аръёс ӵоже гуртын улӥсь кузпалъёс куинь пиосты будэтӥзы, гумыразы ужлэсь кышкатэк тыршизы, гуртын ортчись ужрадъёслэсь но палэнэ уг кылё соос. Валче улэмзылы но витьтон арлэсь тросгес вылэм ини. Плотниковъёс кузпалъяськыса улэмзэс секыт, но яратоно уженызы лыдъяло. Соос ватытэк верало, туннэ нуналэ но ог-огзы понна валтӥсь кенеш сётӥсь, юрттӥсь но самой матысь адямиос луо шуыса.
Егитъёс сюанын тодматско
Надежда Валентиновна Плотникова (Сергеева) Марий Эл республикаысь Петаш гуртын (туннэ нуналэ со гурт ӧвӧл ини) 1954-тӥ арын вордскем.
— Сырьяе мон воксё малпамтэ шорысь картлы кошки, — веранзэ кутске Надя апай. — 1970-тӥ ар, июнь толэзь. Мон Зоя эшеным татчы Сабантуе лыктӥ. Сабантуй нуналэ Павуослэн сюанзы вылэм. Утид ке, сюаназы мӧйыос гинэ люкаськиллям, нош егитъёс ӧвӧл. Соослы «липет ныл» кулэ луэм (мынэсьтым паймемме адӟыса, Надя апай «липет ныллэсь» валэктонзэ сётэ — сюанъёсын самой егит нылъёсты озьы шуиллям вылэм — Н. Ж.). Тӥни озьы мон егит ныл луыса сюанэ вуи.
Вераськонамы Надя апайлэн кузпалэз Иван агай но итӥськиз.
— Со нуналэ мон но Сабантуе мынӥсь маке вал. Берен сюанэ мызганэн шудыны ӧтизы, мон соглаш луи. Тӥни отын ик тодматскимы. Вот улон.., — шуэ со.
Егит Надяез сюанысен адӟыса, солы синмаськем егит Ваня. Нылаш но пумит уг луы, озьы эшъяськонзы кутске.
— Велосипедэн ветлӥ Петаше, — азьланьтэ веранзэ Иван агай. — Сьӧд Петыр (Пётр Григорьевич Чернов — ред.) куинь пол мотоциклзэ но сётӥз (серекъя). Берлозэ мотоциклзэ курыку, сюанам ӧтё шуыса верай ини.
Со дыре егит Надя, али гинэ тямысэтӥ классэз йылпумъям нылаш, пекарняын ужа вылэм ини. Семьяязы соос сизьым кузя нылпиос луиллям, атайзы висем, семьязы анайзылэн пенсиезлы улэм. Соин пичиысен Надялы улонлэсь секытсэ ас вылаз шӧдыны, вазь ик быдэ вуыны тупам. Дышетскыны но солы йӧтымтэ. Но пекарняын со ӝыны ар сяна ужаны уг вутскы — Иванлы картлы кошке.
— Июнь толэзе тодматскимы ке, сентябре татчы лыктӥ ини, — маде Надя апай. — Анай-атай но вазь картлы кошкемелы пумит ӧз луэ, «ачид тодӥськод, тынад улонэд» гинэ шуизы.
Ваня агайлэн но кышно басьтыны дыртэмезлы валэктон вань вылэм. Кызь одӥг аресэз тырмем бере, солэн анаез кулэм. Атаез воксё Ванялы аресэн ӝыны луыку висьыса кулэм. Юртаз тани-тани картлы кошконо апаез гинэ кылем. Мукет апайёсыз-агайёсыз но (семьяязы соос куать кузя нылпиос луиллям) ас семьяоссэс кылдытӥллям. Соин Иванлэн но кышнояськемез потэм.
— Семья кылдытэме потӥз. Соин тыршыса кышно утчай, шедьтӥ. Надялы капчи ӧй вал, ма, соку, огъя вераса, улон капчи ӧй вал ини, мазэ веранэз. Школаын 10 классэз йылпумъяме бере, ачим но колхозэ ужаны интыяськи. «Белорус» тракторен ужай. 55 аресэ тырмытозям но техникаен ӧй люкиськы, весь руль сьӧрын вал, — шуэ Иван агай.
Кема аръёс ӵоже азинлыко но тыршыса ужамез понна Иван Миронович трос пол Даньян кагазъёсын, грамотаосын пусйиське. Ужысь ветеран но со. Тыршыса ужась воргоронлы бригадир луыны но ӵектӥллям, но со соглаш луымтэ. Техниказэ но котьку ачиз тупатъям. Ма, солэн гидкуазяз али но трактор сылэ. Али но руль сьӧрын яратыса ветлэ со. Пенсие потытозяз но вань кужымзэ ужезлы сётэм со, ассэ жалямтэ. Али но вань ужъёссэ ачиз ужа. Нош Надежда Валентиновна со понна оскымон кузпал но, эш но луэ.
Кузпалъёс али но ог-огзэс ярато
Надя апай кузпалэзлы куинь пиосты кузьма. Михаил пизы 1972-тӥ арын вордске, Николайзы — 1974-тӥ арын, нош Василийзы — 1975-тӥ арын (жаляса вераны кулэ, Василий пизы кызь куать аресэн висьыса кулэм). Туннэ нуналэ Михаил пизы но, Николай пизы но ас семьяосынызы Сырья гуртын ик уло. Надя апайлэн но Иван агайлэн куинь внукъёссы но одӥг внучказы, правнучказы но вань ини. Кузпалэзлэсь трос ужамзэ адӟыса, семья понна тыршемзэ тодыса, Надежда Валентиновна котьку валась кышно луыны тырше.
— Улӥськеммы но улӥськеммы, дыр, ини.., — ватытэк вера кышномурт. — Ванька весь ужаз но ужаз, мон нылпиосын вал — керетон сярысь малпаськыны дырмы но ӧй вал, дыр (серекъя).

Пудоез сюдоно, гурез эстоно, вулы ветлоно — соиз но матын ӧй вал — огезлэсь огез нылпиосы пичиесь. Секытэн будэтӥмы соосты.
Иван агай нылпиоссэ пыд йылазы султытэмез понна, соосты визьноданы трос кужымзэ сётэмез понна, жадёнэз, кузпалэзлэсь трос ужамзэ чидаса улэмез понна кышноезлы тау каре.
— Отказать карон сямы ӧй вал мынам, — трос ужамезлэсь мугзэ валэктыса вера Иван агай. — Ужай но ужай. Уйин кык часэн кошкыса ӝыт дас часэн бертэм дыръёсы но луизы. Сюресъёс соку начаресь вал, техника вуж. Кӧня иськемъёс ортчылыны тупаз нуналаз. Мон али туж ӧкынӥсько, мултэс трос ужаськем вылэм шуыса. Надялы котьку юрттыны но ӧй быгаты, пиослэсь будэмзэс но адӟытэк кыли шуыны луэ. Надя мон понна туж умой, валась, чидась кышно луиз.
Таӵе кылъёсты верамез бере, юатэк ӧй чида ни.
— Тӥ али но Надя апаез яратӥськоды-а?
Ваня агай, удмуртъёслы тупась возьдаськонэн но кышноеныз данъяськыса вера:
— Яратӥсько. Мон понна со ӟеч кузпал, пиосмы понна — яратӥсь анай. Умой кышнокузё но со. Али куд-ог мӧйыос но солэсь кенеш юаса лыкто. Пыжиськыны но, керттӥськыны но усто со.
Надя апай зэмзэ но кибашлы кышномурт. Ужлэсь но со ноку кышкамтэ. Но солэн нырысетӥ интыын котьку семьяез луэм. Соин со нылпиосыз вордскем бере соку ик ужаны потымтэ. Гужемъёсы колхозын сиён пӧзьтӥсь луыса ужам, бусыын ужасьёсты сюдэм. Пиоссэ но сьӧраз ветлытэм, соос шумпотыса анайзылы юрттӥллям: кин тэркы кутэм, кин нянь сётэм. 1987-тӥ арын почтае ужаны интыяськем Надя апай. Отын кызь кык ар ӵоже, пенсие потытозяз тыршем.
— Уже капчи ӧй вал. Со аръёсы газет-журналъёсты но тросгес басьтыло вал ук. Яра али пиосы юрттӥзы, Ванька но быгатэмезъя мон интые почтаез нуллӥз, — тодаз вае Надежда Валентиновна.
Иван Плотников тальянкаен шудыны усто
Иван Миронович егит дырысеныз туж усто тальянкаен шудэ. Та сярысь сырьяос но, мукет гуртын улӥсьёс но умой тодо. Тальянкаен шудэмез сярысь юалляськыны кутскем бере, Ваня агайлэн синъёсыз ик ӝуатскизы кадь.
— Мон ачим кулэ карыса шудыны дышетски, — шуиз со, мукет комнатаысь кык тальянказэ поттыса. — Агае кузьмаз мыным тальянка, ну, шумпотон вал со! Мон соку тямысэтӥ классын дышетскисько вал ини, но тальянкаен шудыны дышетскон понна со бер ини. Коля пиелы но дас одӥгетӥ классын дышетскыкуз 75 манетэн мызган басьтӥ. Шумпотэменыз кытчы пырыны ик ӧз тоды. Со дырысен тӥни со но шудэ. Кубызэн но усто шудэ со. Сюанъёсы, праздникъёсы сое ӵемысь ӧтьыло.
Иван агай ачиз но праздник ужрадъёсын ӵем пумиськись куно. Туклячи юонъёс но, пересь юонъёс но сотэк уг ортчо.
— Трос сюанъёсы ветлӥз Ванька. Мон пумит ӧй луы, лэзи. Ма, мон ачим но сыӵе ужрадъёсысь бертыса уг вуиськы (серекъя). Кытын праздник — отын ми. Шумпотыны кулэ, гажаса ӧтё бере. Кыкнамы но ведь шулдыръяськыны, удмурт кырӟанъёс улсын юмшаны яратӥськомы. Тани тон юаськод, ма бордын шудо семья улонмылэн секретэз шуыса. Ог-огмылы оскыса, огмес-огмы валаса улыны тыршимы, али но, пересьмон даурамы, ӵошен луыны тыршиськомы. Со бордын ик милям шудо семья улонмылэн секретэз, — йылпумъяса вераз Надя апай но яратӥсь синъёсыныз вӧзамы тальянкаен шудыса пукись Иван агай шоры учкиз.
Кызьы гинэ юаса ӧй утьы ке но, яратон сярысь кузпалъёс трос ӧз вераське: асьме калыкын со сярысь трос вераськон сямын ӧвӧл уга. Но та учыре яратон сярысь вераськон кулэ но ӧз луы кадь, малы ке шуоно кузпалъёслэн сомында аръёс ӵоже ог-огзэс гажаса, валаса улэмзы ачиз ваньмыз сярысь вера…