Хезмәт

Малы асьмелы «Мудорвай» кулэ?

Удмурт нылпиос бигер кылын кырӟало (кылбур верало) ке, ум паймиське лэся ни — Татарстанын ведь улӥськомы — та ини дышем югдур. Нош вань-а тӥляд бигер нылпиослэсь удмурт сямен кырӟамъёссэс но кылбур верамъёссэс кылэмды?

Мынам, кылсярысь, «Мудорвай» конкурс ортчытозь кылэме но, тодэме но ӧй вал али.

Та конкурс сярысь ваньмы умой тодӥськомы ини. Со радъямын нылпи садэ ветлӥсь но покчи классъёсын дышетскись нылпиос понна, соослэсь удмурт кылэн, удмурт лулчеберетэн тунсыкъяськонзэс будэтон вылысь. Туэ республиканской масштабен ортчись «Мудорвай» конкурс радъяськиз ини ньылетӥзэ. Тодады уськытӥсько, туэ нылпиос вить номинациосъя вожвылъяськизы: эктон, оген кырӟан, коллективен кырӟан, кылбур веран, озьы ик суред. Котьку сямен трос вал кылбур верасьёс. Арысь аре конкурсэ пырисько тросгес но тросгес мукет калыкысь нылпиос — бигеръёс, ӟучъёс. Туэ тани Балтасьысь, Янгулысь, Арчаысь но нылпиос вуизы. Кудӥз-огез талы туж ӧз шумпотэ — асьмелэнъёс но, пе, тырмо вал (удмуртъёс — ред.). Нош калыкъёс куспын эшъяськон мар понна? «Мудорвай» выллем конкурсын ӧвӧл ке, кытын бен калыкъёс куспын ог-огдэ гажан, эшъяськон кылдоз?

6-тӥ толсуре «Мудорвайлэн» Балтасьын ортчем гала-концертаз трос калык люкаськиз. Куноос пӧлын вал А. С. Герасимов — Татарстанысь удмуртъёслэн НКА-зылэн тӧроез, М. А. Иванова — Татарстанысь удмуртъёслэн НКА-зылэн исполнительной директорез, И. Ф. Гайнутдинов — Балтась исполкомлэн кивалтӥсезлэн воштӥсез, В. В. Никитин — Балтасьысь удмуртъёслэн «Кенеш» НКА-зылэн тӧроез.

Нылпиос туж тыршизы кызьы конкурслэн быръён этапаз, озьы ик гала-концертаз  но, та шӧдске вал. Кызьы-о бен мукет сямен? Кӧня ведь соос та конкурсэ дасяськизы, кӧня репетициоссы луизы. Нош табере — залысен соос шоры данъяськыса учко анай-атайёссы (кинлэн ке — песянай-песятайёссы но), кулиса сьӧрысен сюлмасько визьнодасьёссы (дышетӥсьёссы) — нокызьы возьытэ усьыны уг яра. Вань кужмысь тыршоно.  

Сценаын пальпотӥсь ымныръёсын тыршыса выступать карем нылпиос сцена сьӧрын макем сюлмаськыса сылӥзы — ум тодӥське. Ум тодӥське, макем нылпиоссы понна сюлмаськизы анай-атайёс, визьнодасьёс. Но тодӥськомы, кызьы соос пӧлысь тросэз туэ ортчем конкурслэн быръён этапаз асьсэды «возьматӥзы». Паймоно кадь, кызьы сыӵе, нырысь малпаса, шулдыр но нылпиос понна туж кулэ луись конкурс пӧрмыны быгатӥз споръяськон, супыльтон, даллашон площадкалы.

Трос гинэ анай-атайёс, визьнодасьёс, дышетӥсьёс (жюрилэн комиссияз луэмысьтым, дыр) жингыртыса кельшымтэоссы сярысь шонерак, вань чыры-пырыосты тодазы вайыса веразы. Котькудӥзлы аслаз нылпиез матын ук, асладэз ваньмызлэсь мусогес но, умойгес но, быгатӥсьгес но потэ, дыр, ини со. Валаны но луэ, кадь. Сомында вуэм ӝожтӥськонъёс, валантэмъёс паймытӥзы но, ӝожомытӥзы но. Валасько, котькин конкурсэ дасяськыса лыктэ бере, татысь вормонэн кошкемез потэ. Но та ведь конкурс! Конкурсэ дасяськись котькуд адями валаны кулэ, татын вормисьёс сяна вормымтэос но луо шуыса. Уд быгатӥськыд вылэм бере кылемдэ, вормымтэдэ валаны — малы соку пыриськонэз, собере споръяськыса ветлонэз? Оло, «Мудорвай» конкурс асьмелы кулэ но ӧвӧл? Эсьмаса, нокин грамота но кузьым понна куара уз потты. Асьмелэн вань нылпиосмы асьсэ сямен туж быгатӥсь но таланто ведь. Тае соос «Мудорвай» конкурсын арысь аре юнмато. Котькудӥзлы шуымон максимальной балл поныны луысал. Но конкурс — со конкурс ни. Кыӵе бен нылпиос тыршыса сцена вылын асьсэлэсь дасям номеръёссэс возьматӥзы: огезлэсь огез чебергес экто, кырӟало, кылбуръёсты верало. Дӥськутъёссы сярысь веранэз но ӧвӧл — таиз понна ини анай-атайёслы но визьнодасьёслы нимысьтыз бадӟым тау. Макем шумпотымон вал, конкурсэ бигер нылпиос вуизы шуыса (нош кинлы ке таиз но кельшымтэ — угось удмурт нылпиослы конкуренция бадӟымгес луэ ук). Зэмзэ но, жаль, озьы малпасьёс вань шуыса.

Конкурс йылпумъяськем бере, коридорын конкурсэ пыриськем, кияз али гинэ вылысьтыз куштэм камалиоссэ кутыса сылӥсь одӥг ныллэсь анаезлы таӵе верам кылъёссэ кылӥ: «Мама, яра али мон удмурт!». Та ӧвӧл-а конкурслэн самой валтӥсь ужпумез? Нош ми, бадӟымъёс, сыӵе умой конкурслэсь но маскарад пӧрмытӥмы. Возьыт.

Оскем потэ, янгышъёсмес тупатыса, мылкыдъёсмес буйгатыса,та конкурсэ вуоно арын но пыриськомы шуыса.

Марина Иванова Балтасьын ортчем «Мудорвай» конкурс сярысь:

- Таиз «Мудорвай» конкурс сярысь тани мар вераме потэ. Паймытӥз куд-ог муртъёслэн, алдаськыса ке но, нылпиоссэс конкурсэ пыриськытыны мылкыдзы (одӥг ик нылпиос пӧртэм номинациосы пыриськыны уг быгато вал — ред.). Куронъёсты тӥянъёс сярысь анай-атайёс ик ивортӥзы. Соин «эскеронъёс» ортчытоно луиз, отысь-татысь шедьтыса, видеосты учкыны но тупаз. Но конкурсэз радъясьёс понна та умой урок луиз: видео уськытытэк сое ортчытыны уг луы, малы ке шуоно соку шонер тодыны луоз, кин зэмзэ но алдаськиз. Валамон, та ужрадлэн туж кельшем палыз ӧз луы. Но номыр шоры учкытэк, конкурсэз туж эшлыко ортчытӥмы, Гала-концерт радъямы. Со понна вань радъясьёслы, юрттӥсьёслы, Балтась ёросысь кивалтэтлы бадӟым тау кареме потэ. Концерт мыныку но куд-ог организационной шуг-секытъёс кылдӥзы ке но, шедизы сыӵе муртъёс, кудъёсыз туж кулэ минутэ юрттӥзы. Балтасьын ужам быдэс командалы туж бадӟым тау!

 

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: