«Ми коррупцилы пумит!»

Ёросамы но пӧртэм амалъёсын коррупциен нюръяськон мынэ. Одӥгез соос пӧлысь — школаын дышетскисьёс куспын ортчись ас анай кылынызы гожтэм сочинениослы конкурс. Котькуд аре 9 толсуре коррупциен нюръяськон нунал пусйиське. Соин валче районлэн главаез Рамиль Нутфуллин кемалась ӧвӧл коррупцилы пумит творческой ужъёсъя республиканской конкурслэн муниципальной этапаз вормисьёсты но призёръёсты пусйиз. Удмурт кылын та лэчыт темая сочинение-эссе гожтыса, «Скажем коррупции «Нет!» творческой конкурслэн муниципал этапаз вормисе потӥз Покчи Лӧзя шоръёзо школаысь 11-тӥ классын дышетскись Анастасия Артемьева (кивалтӥсез Пчельникова О.М.). Призо интыосын пусйиськизы Покчи Лӧзя школаысь 9 классысь Полина Плотниковалэн (кивалтӥсез Антонова Н.В.), О.Н. Исаев нимо Шор Кушкет шоръёзо школаысь 9 классысь Карина Терентьевалэн (кивалтӥсез Яковлева О.В.) но 10 классын дышетскись Евдокимов Виталийлэн (кивалтӥсез Петрова Р.Н.) ужъёссы. Удмурт этнокомпонентэн Шор Кушкет но Покчи Лӧзя школаосысь пиналъёс пӧлын коррупциен нюръяськонъя мукет конкурсъёсын но вормем, озьы ик призо инты басьтэм нылпиос вань. Кылсярысь, Шор Кушкет школаысь «Строим будущее без коррупции» шуыса нимаськись сочинениосъя конкурслэн муниципал этапаз асьсэ арлыдъемъёссы пӧлын 10-тӥ классын дышетскись Ильина Алина вормись луиз, нош Исаева Елена — призёр (кыкназылэн но кивалтӥсьсы — Николаева С.А.). «Знай и не допускай» шуыса нимаськем творческой ужъёсъя конкурсын 5-9 классъёс пӧлын Покчи Лӧзя школаысь Петрова Виктория (кивалтӥсез Петрова Г.Д.) вормиз.

4-тӥ толсуре ёрос этапын вормисьёс Казаньын ортчем кузьымъёсын пусъён ужрадэ пыриськизы. «Скажем коррупции «Нет!» шуыса нимаськись сочинениосъя конкурсын, ас вордскем кылынызы (удмурт, бигер, пор) сочинение гожтэм Балтась нылъёс призо интыос басьтӥзы. Покчи Лӧзя школаысь Анастасия Артемьева республика конкурслэн вормисез луиз. Тюнтер шоръёзо школаысь 10-тӥ классын дышетскись Гульназ Ахмадиева (кивалтӥсез Лилия Накипова) бигер кылын эссе-сочинениосъя кыкетӥ инты басьтӥз. Ципья шоръёзо школаысь Полина Анеева (кивалтӥсез Алина Иванова), пор кылын сочинение гожтыса, призёр луиз.