«Мон мызганэн ачим кырӟатэк шудыны уг быгатӥськы»

Женяпаез Ципья палъёс гинэ ӧвӧл, быдэс район но тодэ, дыр. Ма, сыӵе усто мызганэн шудӥсь нылкышноос трос шат? Праздникъёслы, пӧртэм ужрадъёслы быдэ но со сцена вылэ потыса пӧртэм кылын кырӟанъёсты быдэсъя.

— 6-тӥ классын дышетскыкум песятаймы мызган басьтӥз. Агаеным кыкнамы курадӟим соин шудыса, но агае малы ке но сокем кулэ ӧз кары мызганэз. Нош мон шудӥ но шудӥ, отын ик кырӟай но... Вукогуртысь вань кадь егитъёс (Женяпай Вукогуртын вордскем, солэн пинал дырыз но отын ик ортчем — Н. Ж.) мон доры люкасько вал, быдэс гуртэн. Соосты юмшатӥ. Вордскем нунал-а, сюан-а, армие келян яке армиысь пумитан-а — ваньмаз но монэ ӧтьылӥзы, — вера шумпотыса Женяпай.

Ма, пинал дыръяз гинэ озьы луымтэ со — али но Женяпаез котькуд празднике ӧтё. Шудэ но со, кырӟа но со, ведущейлэсь рользэ но быдэстэ отын ик! «Тани Аськеев Артёмез армие мызганэн дюшаса келямы, ачим ик пумитай но, — шумпотыса вера Евгения Петровна. — Звонить кариз но бертон азяз, ойдо, Женяпай, лыкты, мон бертӥ шуиз».

Та одӥг гинэ учыр, куке Женяпаез тодыса, яратыса, солэсь мызганэн усто шудэмзэ, сюлмысь кырӟамзэ тодыса сое праздникъёсы ӧтё. Нош кӧня вал соос...лыдъяса быдтымон но ӧвӧл. Сое универсальной адями шуыны луэ — кырӟанъёссэ удмурт, ӟуч, бигер, кулэ ке пор кылын но быдэсъясько, пе.

— Тужгес но мон удмурт кырӟанъёсты пропагандировать карыны тыршисько. Сыӵе кырӟанъёсты, кудъёссэ азьло дыре асьмелэн ӵыжы-выжыосмы кырӟаллям. Соосты асьмеос будӥсь поколенилы дышетыса ӧм ке кельтэ, вунозы но бырозы ук со кырӟанъёсмы, — шуэ ӝожомыса Женяпай.

Зэмзэ но, ачиз шудыны быгатэмезлы шумпотыса гинэ уг улы нылкышно, пиналъёслы но мызганэн шудыны ӵектэ. Кылсярысь, Ципьяысь егит мызганчилы Алексей Зубаревлы но быгатыкуз юрттэ. Алёша ачиз но Женяпай кадь ик самоучка ке но, со Женяпайлэсь тросэзлы дышетскыны быгатэ — опытэз трос ук ни солэн.

Ужез сярысь ке верано, Евгения Петровна сюлмысь яратэ аслэсьтыз ужан интызэ. 2010-2015-тӥ аръёсы со Вуж Ципья клубын тыршем ке, 2015-тӥ арысен сое Ципьяысь культура юртэ художественной руководитель карыса выжто. «Нырысь ик Ципьяын ужаны кутскем бере кышкаськем вал, таӵе бадӟым клубын быгатом меда ужаны шуыса. Но клубын азьло ужам Динияпай мыным туж юрттӥз, солы со понна бадӟым тау», — шуиз Женяпай.

Ципьяын ужаны кутскемез бере ик, 2015-тӥ арын, аслаз кичӧлтэмезъя Женяпай «Зангари» удмурт фольклор ансамбль кылдытэ. Тани та ансамбль ини ципьяосты куинетӥ арзэ аслаз творчествоеныз  шумпоттэ. «Шулдыр ӝыт» фестивале, кылсярысь мылысь-кыдысь пырисько. «Зангариосты» районамы гинэ ӧвӧл, республикаямы но тодо ини — 2015-тӥ арын соосты ТНВ телеканал уськытыны лыктэм. «Жырлыйк эле» передачае но пыриськем вылэм ни Женяпай.

— Женяпаймес ваньмы туж яратӥськомы. Аслэсьтыз ужъёссэ но со котьку туж умой быдэсъя. Нылпиос бен кыӵе сое ярато, ма со ачиз но нылпиосын котьку огъя кыл шедьтэ, — вераз Женяпай сярысь Ципьяысь клублэн директорез Раннур Аухадиев.

Зэмзэ но, огъя кыл со ваньзэсын шедьтэ. Ципьяысь «Радуга» эктонъя группае, озьы ик «Туганай» крашин ансамбле ветлӥсьёс но Женяпайлэсь котьку каньыл, умой луэмзэ но аслаз ужезлы сюлэмзэ сётыса ужамзэ висъязы. Та ансамбль Женяпайлэн кивалтэмез улсын кыӵе гинэ праздникъёсы вуиськымтэ ни — «Наш дом — Татарстан» республиканской фестивале, Мамадыш районэ Петрол празднике... Огъя вераса, каньыл улон ӧвӧл соослы — я отчы, я татчы мыноно луэ. Кемалась ӧвӧл дасям «Эшъяськон эктон» («Танец дружбы») композициенызы но ини кӧня пол пӧртэм ужрадъёсы ветлӥзы. Нырысь Ципьяын сое пуктӥллям, собере гала-концертын Балтасьын, кемалась ӧвӧл, Балтасьын ортчем азьмынӥсьёслэн слётазы но возьматӥллям та композицизэс. Сыӵе тыр улонэн улэ Ципья клуб, ансамбле ветлӥсьёсынызы но кивалтӥсьёсынызы валче. Сыӵе пайдаё ужамзы, Женяпай верамъя, со бордын гинэ ӧвӧл, та бадӟым командалэн огъя ужамзылэн бервылыз. «Ваньмы ӵошен ӧм ке ужалэ, милям номыр но уз пӧрмы. Адями огназ гинэ ваньзэ радъяны нокызьы но уг быгаты. Бервылыз умой мед луоз шуыса, огъя командаен умой ужаны кулэ. Мынам тау шуэме потэ вань кадь артистъёсмылы, соос ноку но пумит кыл уг верало, кытчы концертэн мыноно луиз ке но, мыно». Озьы ик ушъяса вераз Женяпай клублэсь директорзэ Раннур Аухадиевез но, Балтасьысь культурая отделысь ужасьёсты но, ӧз вунэты со библиотекаын ужасьёсты но котьку клублы юртӥсьёсты Животникова Гульсинаез но Зиатдинова Залияез. «Самой секыт уж — со адямиен ужан. Котькуд адямилэсь ведь сямзэ тодоно, ваньмызлы ярамон, кельшымон луоно. Мон та ласянь умой руководитель, лэся, — серекъя Женяпай. — Соин ик аслам уже мыным туж кельше. Ваньзылы нимысьтыз подход шедьтыны тыршисько. Сюлэм одӥгез понна висе: туала дыре тросэз егитъёс компьютер азьын гинэ пукыло. Нош тани мызганэн шудыны дышетскысалзы ке, мамында пайдаез луысал.Тани, нош ик Зубарев Алёшаез вераме потэ. Со ачиз самоучка ке но, туж быгатыса шудэ. Мынэсьтым чабатаосты но учкыса шудыны дышетскиз. Ми интые сыӵе замена будӥз ке, туж шумпотымон луысал, — веранзэ йылпумъяз Женяпай.

Статья, малпад ке, луыны кулэ вал Женяпай сярысь гинэ — солэн улонэз, яратоно ужез сярысь. Но азьвыл ик ноку но тодыны уг луы, таӵе вераськонъёс маин йылпумъяськозы. Ваньмыз вераськоно муртлэсь потэ. Таиз вераськон бере, Женяпайлэсь аслэсьтыз ужзэ яратэмез сяна, коллективзэ, ансамбле ветлӥсь артистъёссэ гажамез но яратэмез сярысь соку ик валаны луиз. Котькудӥныз данъяськыса но котькудӥзлы бадӟым тау карыса вераз Женяпай. Таӵе верамъёсыз солэсь усто художественной руководитель луэмзэ юнмато. Юнме гинэ уг ярато вылэм ваньзы Женяпаез!