Хезмәт

Балтач районы

18+
2024 - Гаилә елы
Азьлане

«Монэ, пересь адямиез, семьяям туж кадырлало...»

Игнатьевъёслэн семьязы туннэ нуналэ гуртазы самой бадӟым семьяен лыдъяське.

19 тулыспалэ Карек-Серма гуртын улӥсь Игнатьева Аграфена Павловналы 90 арес тырмиз.

Балтась районлэн главаез Рамиль Нутфуллин, «НАЗ» центрлэн директорез Гульнара Ахмадиева, Бурнак гурт поселенилэн главаез Шамиль Хабибуллин, «Бурнак» обществолэн кивалтӥсез Рафкат Назипов, Аграфена Павловнаез ӟечкыласа, шуныт мылкыд каронъёссэс веразы. РФ-лэн Президентэзлэсь ӟечкылан открытказэ, район главалэсь Таукарон гожтэтсэ вуттӥзы, трос кузьымъёс кузьмазы.

— Ачим пичи гинэ ке но, монэ собыдӟа карыса ӟечкылады, - синкылиоссэ вормыны тыршыса шуиз юбиляр. — Туж бадӟым тау ваньдылы но.

Аграфена Павловна 1929-тӥ арын Карек-Серма гуртын вордске. Война но война бере аръёсы вордскем но будэм тросэз нылпиос кадь ик, уно шуг-секытъёсты адӟем. Сисьмем картофка сиыса будэм, пичиысен ик нюлэс кораны ветлэм, мукет секыт ужъёсты но быдэстэм. «Адӟыны тупаз ни ас дырам пӧртэмзэ. Но ортчем аръёс шоры ӝожтӥськытэк учкисько, ортчемез-луэмез понна но Инмарлы тау», — шуэ Аграфена Павловна.

Быдэс улон сюресэз нылкышнолэн вордскем гуртэныз, Карек-Сермаен, герӟаське. Та гуртын со вордске, татысь ик яратонзэ шедьтэ, туннэ нуналэ татын пересьмон дырзэ но ортчытэ.

Кузпалэныз, Валентин Егоровичен, соос ньыль нылпи будэтӥзы. Но жаляса верано, Валентин Егорович ини 1999-тӥ арын кулэм. Улонэз ӵоже со ассэ гурт удыслы сӥзьыса ужам, колхозын комбайнэн тыршем. Ачиз но Аграфена Павловна кема аръёс ӵоже колхозын ужам, «ужамтэ уже но кыльымтэ, дыр» шуэ со колхозын ужам аръёссэ тодаз вайыса. Гуртысьтызы клубазы выж миськись луыса но ужам со, ӵапак татысен ик пенсие но потэм.

Игнатьевъёслэн семьязы туннэ нуналэ гуртазы самой бадӟым семьяен лыдъяське. Та сярысь шумпотыса но данъяськыса вераз Аграфена Павловналэн кенэз, Любовь Михайловна.

— Ваньмы дас кузя луиськомы, — шуэ нылкышно, — песяймы, кузпалы Юрий (юбилярлэн покчи пиез), бадӟым пимы Игорь, Игорьлэн кышноез Наташа, соослэн кык пиоссы — Игнат но Илья, покчи пимы Яша (туннэ нуналэ Киров улосын армиын служить каре), солэн кузпалыз Вероника но пизы Тимофей.

Любовь Михайловналэн гуртын аслаз магазинэз вань, со отын вузкаре. Кузпалыз Юрий Валентинович, Балтасьын «Стройметиз» организациын экскаваторен ужа, Игорь пизы «Бурнак» обществоын тракторен тырше, кенъёссы пичиосынызы доразы пуко. Та бадӟым семьяе Аграфена Павловналэн юбилеяз трос куноос но бертӥзы — солэн вань нылпиосыз но анайзэс бадӟым праздникеныз ӟечкыланы вуизы. Иван пиез но Нина нылыз Свердловск улосысь лыктӥллям (туннэ нуналэ семьяосынызы отын уло), Николай пиез — Кизнерысь бертӥз.

— Анаймес сюлмысен юбилееныз ӟечкыласькомы. Со котьку адӟем карымон нылкышно, яратӥсь анай вал, али но озьы. Туннэ нуналэ солэн 7 внукез, 9 правнукез вань — со туж узыр песяй. Али кема аръёс ӵоже каньыл, висьытэк улыны мед кылдоз солы, — шуиз Аграфена Павловналэн нылыз Нина.

«Туала дыре тросэз егитъёс, семья кылдытыса, анай-атайёссы дорысь «пегӟо», нимаз улыны тыршо. Но ми огъя улӥськом, Инмарлы тау, — шуэ Аграфена Павловна. — Туж шулдыр, туж ӟеч улӥськомы, куспамы тэрыса. Ог-огдэ валаса, гажаса, секыт кылъёс вератэк улӥд ке, ваньмыз но умой луоз. Монэ, пересь адямиез, семьяям туж кадырлало, ноку но кур уг каро. Та понна мон пумтэм тау карисько семьяелы», — вера Аграфена Павловна.

Та серекъясь, лякыт сямо, капчи мылкыдо песяй нокинэ но мылкыдтэм ӧз кельты, дыр. Районлэсь главазэ но. Кызьы пусйиз Рамиль Рашитович, Аграфена Павловналы 90 ӧвӧл, 80 арес но сётыны секыт али. Таӵе кылъёссэ кылыса, юбиляр шумпотэменыз солы омыре чупкаронъёссэ ик (воздушные поцелуи) лэзиз. Собере вань куноослы но. Соослэн (ма, мынам но) паймеммылы но шумпотэммылы пумыз ӧй вал. Пумиськон тазьы йылпумъяськоз шуыса нокин но ӧз малпа...

Туж ӝутскем мылкыдын кошкимы Игнатьевъёс дорысь. Аграфена Павловна но пальпотыса, главалэн кузьмам чебер шаленыз шобырскыса кылиз. Солэн синкылиен пачылмем синъёсыз таукарон кылъёсызлэсь но тросгес веразы — нылкышно та нуналэ ассэ самой шудо адямиен шӧдӥз, дыр...

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

3

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: семья

2
X