«Мудорвай» - 2022 (фото)

7-тӥ шуркынмонэ Ципья черкогуртын «Мудорвай» улоскуспо конкурслэн муниципал этапезлэн очной турез кутскиз. Отчы мыло-кыдо пыриськизы Ципья шоръёзо школаысь покчи классъёсын дышетскисьёс но Ципья нылпи садын визьнод басьтӥсь пиналъёс. Нылпиос туэ но учкисьёсты но жюрилэсь членъёссэ чебер кырӟанъёсынызы но кылбуръёсынызы, шулдыр эктонъёсынызы но яркыт дӥськутъёсынызы шумпоттӥзы.

Тодады вайытӥськом, туэ «Мудорвай» конкурс куатетӥзэ радъяське ини шуыса. Пусйыны кулэ, туэез конкурс улоскуспо луыса ортчытӥське, малы ке шуоно вожвылъяськонэ пыриськыны мылкыд карисьёс пӧлын Удмуртиысь пиналъёс но вань. Соос Татарстанысь асьсэлы матын интыяськем ёросъёсын творческой быгатонлыкъёссэс, устолыксэс возьматозы шуыса ивортэ Татарстанысь удмуртъёслэн НКА-зылэн ужрадъясь директорез Ольга Чайникова. Нош асьме ёросамы конкурс туэ но куинь зонаын ортчытӥське. Ципьяын 7 шуркынмонэ вал, Ӟаныын — 8-аз, нош Покчи Лӧзяын 9-тӥ шуркынмонэ ортчоз. Очной этапын нылпиос азьвыл аръёсы кадь ик кылбур лыдӟон, эктон, оген но коллективен кырӟан номинациосъя вожвылъясько. Котькуд номинацияя нимаз вормисьёс но призёръёс бырйиськозы, кудъёсыз берло конкурслэн Гала-концертаз пыриськозы. Гала-концерт 6-тӥ толсуре луоз шуыса витиське.

Фото: РОО "Национально-культурная автономия удмуртов Республики Татарстан"