Мынам пересь песятае. Мынам данъяськонэ. Мынам историе.

Пичи дыръям песянаелэн шкафаз ошем вуж пиджакын медальёс вал, кудъёсыз огшоры чилясь значокъёс кадь гинэ адскылӥзы. Мон соку туж ӧй малпаськылы, мар соос сьӧрын сылэ. Но берлогес тодӥ: та ваньмыз мынам пересь песятаелэн — Туктаров Туктагул Туктаровичлэн — вормонъёсыз. 

Песятае вордске 1918-тӥ арын, 15-тӥ гудырикошконэ. Со Тагашур гуртын будэ, Ципьяын дышетске, сизьым классэз йылпумъя. 1938-тӥ арын со ачиз дышетӥсь луэ ни. Мон ӵемысь син азям пуктыны вырисько: тани со доска дорын сылэ, нылпиосты гожъяськыны но лыдӟиськыны дышетэ. Нош ар ортчыса, школа интые, сое армие келяло. 

1939-тӥ арын коньывуонэ егит пиез Монголие служить карыны басьто. Нырысь курсант луэ, собере — орудилэн командирез. Но со дырысен кутскыса, 1946-тӥ арозь тупаса улонэз со уг адӟылы. 

Быдӟым Атыкай ож кутскем бере, Туктагул Туктаровез Шундыпуксёнпал (Западной) фронтэ келяло, нош 1943-тӥ арын — Белорус фронтэ. Юн ожмаське, туж дӥсьтӥсь но кышкасьтэм луэ со. Но зол сӧсырмыса, Москва котырысь госпитале шеде. Мукетыз, оло, ож мышкы кыльыны тыршысал, дыр, но песятае, яраосыз бурмем бере ик, выльысь передовое кошке. 

Но, мар монэ тужгес но синмаськытэ пересь песятаелэн историяз, со ожмаськонъёс ӧвӧл, нош одӥг паймымон учыр но соин герӟаськем арбери. 

Со учыр луэ Германиын. Пазьгем городысь, куашкан калэ вуэм клубысь, песятай кубыз (скрипка) шедьтэ. Котыр ыбылӥськонъёс, кышкыт ож но... та крезьгур инструмент. Кузёез, оло, бырем, яке пегӟем... Пересь песятае сое ӝутэ. Ачиз дыше соин шудыны. Мыным потэ, та крезьгур солы войнаын котьма ласянь юрттӥз шуыса. 

1945-тӥ арын вормеммы бере но Туктагул Туктаровичлэн Атыкай музъеммы понна служить каронэз уг йылпумъяськы. Сое келяло Дальний Востоке, 152-тӥ аэродромной полке, Япониен ожмаськыны. Дораз со бертэ 1946-тӥ арын гинэ. Мирной улонын но капчи сюрес со уг утча: типографиын ужа, собере сельсоветлэн председателез, бригадир луэ, вордскем Тагашур гуртысьтыз фермаен кивалтэ. Ӝытъёсы со котьку сямен поттэ яратоно крезьгур инструментсэ — кубыззэ. 

Адямиослэн верамъёссыя, гуртын вань улӥсьёс сое гажазы, туж лякыт сямо но дӥсьтӥсь адямиен лыдъязы. 

Огпол мон солэсь вань данъетъёссэ лыдъяй. Горд Кизили, Отечественной война орденъёсыз, «За боевые заслуги», Кёнигсберг понна, Германиез, Япониез вормемез понна медальёс... Ваньмыз 18 штука. Со туж бадӟым ож сюрес. Но мон понна солэн валтӥсь вормонэз мукетыз бордын. Со вань та шугадӟон пыр потӥз, но пушкысьтыз югытсэ ӧз ышты. Быгатӥз шедьтыны крезьгур отысь, кытын ваньмыз куашкатэмын вал.

Али пересь песятаймы милемын ӧвӧл ни. Нош кубызэз кылиз. Со вуж ини, пуэз сьӧдэктӥз, но али ке но песятаймылэн киосызлэсь шунытсэс уте кадь. Куддыръя мон со борды огшоры йӧтскылӥсько но кусыпмес шӧдӥсько. Собере, ачим крезьгурез дышетыны кутски. Киям гитара кутӥ но соин шудыны дыши. 

Та кубыз мон понна семья реликвия гинэ ӧвӧл, со тодэ вайытон, улон котьку но ожлэсь кужмогес шуыса.

Дарина Туктарова, Ижкар

Редакцилэсь: Тагашур гуртысь Быдӟым ожысь ветеран Туктаров Туктагул Туктарович ас дыраз тодмо кубызчи луэм. Со фабрикаын лэсьтэм куинь сиё инструментэн шудэм. Сиоссэ ачиз векчи ыж сюллэсь лэсьтэм. Атаез но солэн кубызчи луэм, дорын лэсьтэм кубызэн шудэм.