«Мынам песятае — орденэн данъям мурт»

Вань событиос, датаос, адямиослэн нимъёссы, кудъёсыз пыризы карлэн, улосвыллэн, шаерлэн историяз но быдэс Музъемлэн историяз. Соос сярысь книгаос гожъяло, легендаос верало, кылбуръёс, крезьгур кылдыто. Валтӥсез — соос сярысь тодазы возё. Та тодэ ваён выжыысь выжые кӧче но кыдёкысь нуналъёслы но учыръёслы вуныны уг сёты. 

Асьме шаермы трос кышкыт, куашкатӥсь ожъёс пыр ортчиз. 

Ож... Макем трос вера та кыл. Ож — со куректон, синкыли. Ож — анайёслэн курадӟемзы, сюосын бырем солдатъёс, сюосын сирота кылем нылпиос но атайёстэк семьяос, адямиослэн шимес тодэ ваёнъёссы. Солдатъёс честно служить каризы, асьсэды жалятэк. Соос Атыкай музъеммес, ӵыжы-выжыоссэс но матысь адямиоссэс утизы. Ож — со котькуд час, котькуд минут кулон, но соку соос та сярысь ӧз малпаськылэ, ваньмыз понна валтӥсез вал тушмонэз дугдытон. Туж трос солдатъёс мурт музъеме кылизы, кӧняез ивортэк ышизы, кӧняез доразы быдэс улонзылы сӧсырмыса бертӥзы. 

Та шугадӟон мынэсьтым семьяме но палэнтӥ ӧз ортчы. Мон тодӥсько, анаелэн но песянаелэн верамъёсысьтызы, мынам туж умой пересь песятае вал шуыса, кудӥз оже пыриськиз, асьме Родинамес тушмон захватчикъёслэсь утиз. Солэн улонэз сярысь мынам тросгес тодэме но мадеме потӥз.

Песятаелэн ожмаськон сюресэз 

Кабатуев Егор Терентьевич, мынам пересь песятае, вордскемын 1907-тӥ арын, пичи Ӟаны гуртын. 

1941-тӥ арын 13-тӥ гудырикошконэ сое Горд Армилэн радъёсаз басьто. Семьяеныз, нылпиосыныз но эшъёсыныз люкиськыса, пересь песятае Ленинград улосысь 1018-тӥ кабельно-шестовой ротае Молотовской РВК-е келямын вал. 

Со вакытэ Быдӟым Атыкай ож мынэ вал. Советской войскоослэн армизы туж ӝог наступать карем. Со армия пӧлын луэм дивизия но, кытын служить карем мынам пересь песятае. 

Анна песянаелэн верамезъя, песятай война сярысь мадьыны яратымтэ. Озьы ке но, куддыръя со та учыръёс доры берытскылэм но тодаз вайылэм. 

Наградной листысьтыз тодӥмы, 1941-тӥ арын куарусёнэ (07.09.1941) ожъёсын со секыт сӧсырмем но Орёл городысь госпитале (ЭГ 2073) шедем шуыса. Сӧсырмемез бере сое кивалтэтэн сётэм наградалы — «За боевые заслуги» медальлы — представить кариллям. 

1018-тӥ нимаз кабельно-шестовой роталэн (вакчиятыса — окшр) командирезлэн капитан Г. Черныхлэн сётэм характеристикаысьтыз:

«Кабатуев эш ротаын кылдэм дырысеныз линейной надсмотрщик луыса служить каре. Смоленск но Витебск направлениосын ожмаськонъёс дыръя линейной надсмотрщиклэсь ужзэ быдэсъяз, со участокъёсын, кытын связь тужгес но зол куашкатэмын вал тушмонлэн артиллерийской тылыныз. Соку Кабатуев эш быгатэмзэ но кичӧлтонзэ возьматӥз. Берло дыре Кабатуев эш ездовой луыса ужа, солы оскем валъёс шоры бадӟым кылкутонэн учке. Аслаз командиръёсызлэсь дунъет басьтэ, тужгес устоез ездовой шуыса». 
Пересь песятай 1945-тӥ арын куартолэзе ик демобилизоваться кариськем. Пусъемын Горд Кизили орденэн но «За победу над Германией В Великой Отечественной войне 1941-1945гг.» медален.

Линейной надсмотрщик... 

Туннэ ӧжытэз тодэ, кыӵе со специальность — линейной надсмотрщик. Ожгар литератураын но та специальностьлэсь нимзэ шер пумиталод. Соин ик, нырысь уд но вала, связистлэн ужез сярысь вераськон мынэ шуыса. 

Фронтын одӥгез тужгес кышкытэз профессия. Бен, бен, эн пайме, со зэмзэ но озьы. Связь ужаку тонэ нокин уг адӟы. Но ӧжыт гинэ могӟон луэ вылэм — тон ваньмыз понна янгыш ини, бусыетӥ катушкаен ширтӥськод... Кускозяз лымыын яке гадёзяз вуын, дэриетӥ но миномётной тыл но пуляослэн шуламзы улын. Фронтын связь туж кулэ, соин ик связистъёс телефон езъёсты кыско, тушмонлэн тылыз улын соослэсь пуштылэм интыоссэс ваче ито вал. Связистлэн огшоры ужъёсаз пыре вал связь линиосты кыскон, юбоос пуктылон, чигиськем интыосты дыраз тупатъян но нялтас тушмонэз пезьгытон, тушмон солдатъёсты быдтон. Связистъёстэк информация басьтыны луонлык ӧвӧл — кытын та дырлы асьмелэнъёс, нош кытын тушмонъёс, озьы ик артиллерилэсь тылзэ корректировать карон. Войскоосын ӵош, куддыръя соосты азьпалтыса но, связистъёс мыно. Дугдылӥсьтэм тыл улын, ӵошкыт интыосын, шуръёс вамен, гурезьёсын линейной надсмотрщикъёс, чигиськем интыосты быдтыса, связь кыскизы. Кин тодэ, кызьы вал со тушмонлэн миномётной тылыз улын кӧня ке сю метр кабельно-шестовой связез кыскыны яке связез тупатыны, куке пехота музъеме согиське но йырзэ ӝутыны уг быгаты, куке танкистъёсты броня уте, нош артиллеристъёсты, ӧжыт ке но, кусып уте? Но приказ, вань приказ, уж, вань уж. 

Соку войскоосын связь возиськиз огшоры полевой провод вылын. Артиллерийской налёт дыръя соос осколокъёсын чигисько вал но связистлы, номыр шоры учкытэк, чигиськем интыез утчаны мыноно вал. Одӥг сыӵе «ходка» — со атакае ветлэм кадь. Пукид, шокчид, нош тонэ выльысь чигиськем интыез утчаны келяло. И ведь нокытчы уд пыры, шузимытӥсь тыл улэ пыроно луылӥз — приказэз быдэстымтэзы понна ожын интыязы ик ыбыны быгатылӥзы ук.

Но со ваньмыз ӧвӧл на. Связист ялан телефонын пуке, соин ик фронтын югдурез со мукет солдатъёслэсь ӟечгес тодэ. Со ялан вань событиосты тодэ. Немец разведчикъёс тае тодо вал, соин ик асьме связистъёс вылэ дырын-дырын засадаос лэсьтылӥзы. Езэз вандо но возьмало, ку связист ачиз соос доры киязы вуоз. Таин сэрен связистъёс ӵемысь пленэ шедьылӥзы. 

Но мынам песятае, линейной надсмотрщик, быдэс войнаез ортчем, аслэсьтыз ужзэ быдэсъяса. Солы удалтэ. 

Война бере ужан 

Демобилизация бере пересь песятае берытскем вордскем гуртаз, аслаз семьяез но ӵыжы-выжыосыз доры. Татын улэм но тыршем берпум нуналъёсозяз. Песятае «Победа» колхозын ужам, гужембыт пудо возьмам, нимысьтыз дышетскытэк но, пудо эмъян удысын тодон-валанэз луэм солэн. 

Егор Терентьевич туж яратэм инкуазез, котьку ветлылэм нюлэскы, толлы пу, веник но турын дасяллям, озьы со нылпиосызлы гурт улонэз яратон мылкыд пыӵатэм. Песятайлэн котьку активной улон позициез луэм. 

Анна Семёновна песянаенымы ӵош вить нылпи будэтӥллям: Александр (1930), Василий (1933), Татьяна (1936), Николай (1946) но Нина (1949). 

Песятае кулэм 1959-тӥ арын шуркынмонэ, ватэмын вордскем гуртаз. 

***

Песятаелэсь историзэ йылпумъяса, кышкан но данъяськон мылкыдме шӧдӥсько. Мынам пересь песятае Атыкай музъеммес утись, историысь событиосы пыриськись вал. Мон пересь песятайме героен лыдъясько. Тодӥсько, солэн уг поты вал, асьме поколение войнаез мед адӟоз шуыса. Шаермылэн эрикез понна со аслэсьтыз улонзэ сётыны дась вал ук. Мон данъяськисько песятаеным! 

Мон лыдъясько, пересь песятаелэсь улон сюрессэ эскеронэз азьланьтыны но вуоно поколениослы солэн героизмез, кышкасьтэм луэмез сярысь вераны кулэ шуыса: соос но мед тодозы но данъяськозы. Мынам потэ, ас ёзо эшъёсы тросгес мед тунсыкъяськозы семьяоссылэн историенызы но тодэ ваёнъёс дауръёсы медаз быре шуыса.

Ӟаны шоръёзо школаысь 6-тӥ классысь дышетскисьлэн Елизавета Григорьевалэн проект ужез.
Дышетӥсез: Григорьева Анна Витальевна.

(Вакчиятыса сётэмын)