Мынам семьяысь солдатъёс

Ми — Быдӟым Вормонлэн наследникъёсыз, ми тодыны кулэ выжыосмес. Милям ужпуммы — тодамы возьыны кышкыт учыръёсты, кудъёссэ адӟоно но чидано луизы матысь адямиосмы. Мынам но тодэме потӥз, ож мынам семьяе вылын шӧдӥськиз-а шуыса. Соин ик анай-атаелы, песянай-песятаелы юрттэт курыса вазиськыны малпай. 

Котькуд адями понна семья улонын самой дуноез луэ. Адями ӵыжы-выжыоссэ гинэ тодыны кулэ ӧвӧл, выжыезлэсь историзэ но тодыны кулэ. Семьялэн историез — со выжыос, кудъёсызтэк адями улыны уг быгаты. 

Бадӟым поколенимы ӧвӧл ни, нош семьялэн историез уг йылпумъяськы, со нылпиосын азьланьтӥське. Озьыен, семья тодэ ваёнъёсын но.

Шаерамы война пырымтэ одӥг семья но ӧз кыльы, дыр. Милям выжыысьтымы ӧжытсэ 10 мурт Быдӟым Атыкай оже пыриськем. 

Ветров Пётр Тимофеевич вордӥськем 1902-тӥ арын инвожо толэзе Удмурт УАССР-ысь Кизнер ёросысь Вуж Бӧдья гуртын. Йӧслыкезъя — удмурт. Кык классъем тодон-валанэз луэм. Партие пырымтэ. 

Пётр Тимофеевич туж хозяйственной адями вылэм. Пырем шоро-куспо улӥсьёс пӧлы. Войналэсь азьвыл ас музъемъёсаз музъем ужен вырем. Солэн трос валъёсыз, скалэз, ыжъёсыз, курегъёсыз луиллям. Аслаз пичи муш бакчаез луэм. Коллективизация вакытэ (1928-тӥ-1930-тӥ аръёсы) солэсь вань ваньбурзэ ю тысен ӵош колхоз огазеяськонэ басьтӥллям, нош коркаезлэн ӝыныез (соослэн корказы вить борддоръем луэм) контора луэм, отын председатель ужам. 

1941-тӥ арын 6-тӥ инвожое сое Быдӟым Атыкай оже басьтӥллям. Красноармеец званиен луэм. Стрелок луыса служит карем. 1942-тӥ арын коньывуонэ семьяез ивортон басьтэм, 1942-тӥ арын 26-тӥ куарусёнэ Пётр Тимофеевич ожын быриз шуыса. Но шудэз вылэм, со улэп луэм. 

Наградной листысьтыз: «Рядовой Ветров Пётр Тимофеевич ожмаськиз немецкой захватчикъёсын Ленинград фронтлэн 336 полкысьтыз рядовой боец должностьын 1942-тӥ арын пӧсьтолэзьысен 1943-тӥ арын 26-тӥ тулыспалозь. Та дыр ӵоже рядовой Ветров трос пол наступление ветлӥз, 1943-тӥ арын 26-тӥ тулыспалэ Ленинград дорын синмаз контузить каремын вал. Эмъяськемез бере госпитальын 2-тӥ группаен инвалидность басьтӥз». Ожмаськонын кышкасьтэм луэмез понна Пётр Тимофеевич пусъемын «За боевые заслуги» медален. 

Дораз бертэмез бере «Виль гурт» колхозэ валтӥсь вал утись луыса ужаны интыяськем. Ужез яратэмез но уж шоры кылкутыса учкемез семьялэн ӟеч улэмезлы луонлык сётӥллям. Со муш но пудо вордонэн вырем, суллэсь тусьты-пуньы, пу бекчеос, кӧкыос лэсьтылэм. Со ачиз понна вань инструментъёсты лэсьтылэм. Вань хозяйствозэ ӟеч возем. Семьяез но пушъем. Солэн 5 нылпиез луэм: Николай, Антонида, Михаил, Андрей, Таисия. Кулытозяз сое утялтӥллям Анна кышноез, Михаил пиез но Зоя кенэз. 1956-тӥ арын 1-тӥ шуркынмонэ вордӥськем нырысетӥ внучкаез Нина, со понна со лэсьтэм суллэсь чебер кӧкы, кудӥз одӥг внукезлэсь мукетызлы, собере правнукъёсызлы но выжем. 

Кулэм Пётр Тимофеевич 1957-тӥ арын 7-тӥ толшоре. 

Марков Егор Егорович вордске 1901-тӥ арын Удмурт УАССР-ысь Кизнер ёросысь Вуж Бӧдья гуртын. Йӧслыкезъя — удмурт. 

1941-тӥ арын 29-тӥ гудырикошконэ Быдӟым Атыкай оже басьтэмын. Дораз кылиллям кышноез Агафья Васильевна, Мария но Зоя нылъёсыз. Иван пизы та вакытэ оже пыриськемын луэм ни. 

Егор Егорович но шоро-куспо улӥсь мурт вылэм. Войналэсь азьвыл музъем ужен вырем, трос валъёсты вордэм. Коллективизация дыръя ваньзэ талаллям. Колхозэ пырыны пумит луэмысьтыз, кужмысь выт тырыны косылӥллям, нош выт тырыны пумит луэмез бере, юртъерзэ сэрттӥллям но колхоз фермаос лэсьтӥллям. Соин воргорон, кышноеныз люкиськыкуз, ӝот-ӝот алэм, колхозэ медаз пыры шуыса. Ӟечсэ уд адӟы соослэсь, — шуэм. Огназ кыльыса, Агафья Васильевна белогвардеецъёс доры поварлэн юрттӥсез луыса ужаны интыяськем (кызьы со соосын тодматскем — тодмо ӧвӧл). Талы луыса нылпиослэн коть кыӵе ке но сиёнзы луэм. Белогвардеецъёс сярысь со котьку умой но гажаса гинэ вераллям. 

Война быронлы матэктыку, Агафья Васильевна «Виль гурт» колхозэ пырем, но кыӵе интыужын тыршем, тодмо ӧвӧл. 

«Память народа» сайтысь но «Книга памяти»-ысь ивортодэтъя ми тодӥмы, 1942-тӥ арын толшоре Егор Егорович Смоленск улосысь Сыченск ёросын ивортэк ышиз шуыса. Но Зоя нылызлэн верамъёсызъя со отын огпол но луымтэ. 

Гожтэтъёсаз со гожъям, Москва понна ожмаськонъёсы пыриське шуыса. Берпуметӥ гожтэтэз вуэм Москваысь госпитальысен, кытын верамын луэм, Егор Егорович зол сӧсырмем, госпитальын кема кыллем но, жаляса верано, кулэм шуыса. Со гожтэтысь ик матысьёсыз тодӥллям, Егор Марков Подмосковьеысь одӥгаз братской шайгуэ ватэмын шуыса. 

Кузпалызлэсь вань гожтэтъёссэ Агафья Васильевна котьку сьӧраз нуллэм, туж ӵем выльысь лыдӟылэм. Картэзлэн шайгуэз доры ветлыны быгатымтэеныз солэн сюлмыз туж висем. Кулэмез бере картэзлэсь вань гожтэтъёссэ вӧзаз поныса ватӥллям.

Марков Иван Егорович вордске 1921-тӥ арын Удмурт УАССР-ысь Кизнер ёросысь Вуж Бӧдья гуртын. Йӧслыкезъя — удмурт. 

1941-тӥ арын 4-тӥ куартолэзе срочной службаез ортчон понна армие басьтэмын, отысен ик оже шедемын. Вылӥын верам Марков Егор Егоровичлэн пиез луэ. «Память народа» сайтын но «Книга Памяти» книгаын 1942-тӥ арын толшоре ышемез сярысь ивор возьматэмын. Но Зоя сузэрезлэн верамезъя, та ивортодэт шонер ӧвӧл. Гожтэтъёсаз Иван Егорович гожтэм, Одесса понна ожмаськонъёсы пыриське шуыса. Берпуметӥ гожтэтаз Иван Егорович гожтэ: «Вань море ӝуа. Городэ пырим». Сьӧд зарезь но со вылын ожмаськон сярысь вераськон мынэм, дыр. Нош Одессаез мозмытон понна ожмаськонын солдатмы бырем. 

1944-тӥ арын сӥзьыл басьтэм гожтэт берпуметӥез луэм. Агафья Васильевна ялан бӧрдылэм: «Малы коть огез ке но ӧз берты». 
Картэзлэсь гожтэтъёссэ сямен ик, пиезлэсь гожтэтъёссэ но соин ӵош ватӥллям.

Комарова (Смердова) Любовь Семёновна вордӥськемын 1922-тӥ арын 1-тӥ толшоре Киров улосысь Тужино ёросысь Лукоянка гуртын. Жаляса верано, Любовь Семёновна сярысь ивор туж ӧжыт кылем. Тодмо, 1936-тӥ арын, 14 арес тырмыса, апаез доры Казань городэ кошкем но отын етӥн поттон комбинатысь ФЗУ-лэн школаяз пырем шуыса. 

1941-тӥ арысен асьме армимылэн радъёсаз луэм но Венаозь вуэм. Службазэ госпиталь бордын запасысь медсестра луыса ортчем, собере сое танковой войскоос борды юнматӥллям. 1945-тӥ арын коньывуонэ старшой сержант званиен демобилизовать каремын. Дораз бертэмез бере Казаньысь 387-тӥ заводлэн столовояз буфетчица луыса ужаны интыяськем. Отечественной войналэн II-тӥ степенё орденэныз данъямын.

Кулэм Любовь Семёновна 2004-тӥ арын 15-тӥ оштолэзе. 

Смердов Александр Семёнович вордскемын 1924-тӥ арын 2-тӥ шуркынмонэ Киров улосысь Тужино ёросысь Лукоянка гуртын шоро-куспо крестьян семьяын. Дышетскемез — 4 класс. Йӧслыкезъя — ӟуч.

1938-тӥ арын, атаез кулэм бере, анаеныз Соломонида Филипповнаен но Аркадий выныныз ӵош Казань городэ улыны выжиллям. Отын етӥн поттон комбинатэ ужаны интыяськиллям. 

1942-тӥ арын армие басьт-ӥллям. Миномётчик луыса служить карем. 1943-тӥ арын Орловской дугаын одӥгаз ожын контузия басьтэм но пельзэ вӧсь карем. 1944-тӥ арын Польшаысь Висла шур дорын паллян пыдыз сӧсырмем. 

1945-тӥ арын шуркынмонэ дораз бертэм инвалидностья. Ужам слесарь луыса. Таӵе данъетъёсыз вань: «За освобождение Варшавы», «За взятие Берлина», «За победу над Германией в Великой Отечественной войне 1941-1945 гг.» медальёсыз но II-тӥ степенё Отечественной война орденэз. Тунсыко учыр: Александр Семёнович Берлинысь дораз бертыкуз сьӧраз кык питрано велосипед ваем, соин чик люкиськымтэ. 

Чулков Иван Васильевич вордскемын 1913-тӥ арын Татарской АССР-ысь Ципья ёросысь Вуж Турья гуртын.

Иван Васильевич сярысь ивор ӧжыт кылемын. Вань ивор люкамын «Память народа» сайтысь но Смердова Галина Петровна (Тихонова) внучкаезлэн тодэ ваёнъёсысьтыз. 

1942-тӥ арын 12-тӥ южтолэзе армие басьтӥллям, отын служить карем 998-тӥ стрелковой полклэн 286 стрелковой дивизияз. 

Лек ожъёс дыръя 1942-тӥ арын гудырикошконэ Ленинград улосысь Мгинской ёросысь Поречье гуртын виемын но ватэмын. Но кыӵе ке муген выльысь ватэмын «Новая Малукса» мемориалэ, кудӥз Ленинград улосысь Киров ёросысь Берёзовской волостьысь Малая Малукса станциын интыяськемын. Но кӧня ке дыр ӵоже ӵош служить карем гуртоезлэн ивортэмезъя, Иван Васильевич 1941-тӥ арын сӥзьыл ик бырем, сое немецъёс курадӟытыса виилям. Немецъёс, сое китӥз но пыдтӥз танк борды думыса, юдэсэн кесяллям, пе. Но та иворлэн зэм луэмезлы юнматонъёс ӧвӧл. Та учырез гуртоез одӥг пол гинэ верам, сӧсырмыса дораз отпускын дыръяз. 

Дораз Иван Васильевичлэн кылиллям кузпалыз Антонина но нылпиосыз — Вера, Герман, Мария. Ньылетӥез — Дарья нылыз — вордскем, куке атаез войнаын луэм ини.

Тихонов Павел Тихонович вордӥськем 1907-тӥ арын 1-тӥ толшоре Татарской АССР-ысь Ципья ёросысь Ӟаны гуртын. 

1941-тӥ арын 10-тӥ гудырикошконэ армие басьтӥллям. «Память народа» сайтын ивортэмын, 1942-тӥ арын куартолэзе быриз шуыса. Буре ваён книгаын ивор вань, Брянскысь нюлэсъёсын быриз шуыса. Но солэн эшез, гуртоез, Папаев Фёдор Степанович ивортэмъя, кудӥныз соослы кӧня ке дыр ӵоже ӵош служить карыны кылдӥз, Павел Тихонович 1941-тӥ арын сӥзьыл ик бырем. Павел Тихоновичлэн дораз кылем Надежда кышноез но ньыль нылпиез — Володя, Пантелеймон, Анфиса но Пётр. 

Тихонов Михаил Тихонович вордскемын 1910-тӥ арын 23-тӥ куартолэзе Ӟаны гуртын. 

1942-тӥ арын 22-тӥ оштолэзе армилэн радъёсаз басьтэмын. Служить карем 22-тӥ стрелковой полкын. Сӧсырмыны шедем ожъёсын. 

Тихонов Кузьма Тихонович вордӥськемын 1897-тӥ арын 8-тӥ коньывуонэ Ӟаны гуртын. 1943-тӥ арын 8-тӥ гудырикошконэ армилэн радъёсаз басьтэмын. Служить карем 22-тӥ стрелковой полкын.

Тихонов Николай Кузьмич вордскемын 1925-тӥ арын 16-тӥ куартолэе Ӟаны гуртын. Армилэн радъёсаз басьтэмын 1943-тӥ арын. Соку солы 18 арес но луымтэ на. 

Удмурт АССР-ысь Сарапул городын связистлы дышетскыса, Калининской фронтэ сюрем. Соку та фронтлэн частьёсыз Смоленск понна лек ожмаськонъёсы пыриськылӥллям. Нош со арын ик сӥзьыл Николай Кузьмичлы Орловской дугаын ожмаськонъёсы пыриськыны усем. Сентябрь кутсконын ог дас нунал пала оборонаез возиллям соос. 14-тӥ куарусёнэ асьме войскоос наступление выжиллям. Ньыль нунал ӵоже лек ожмаськонъёс мынӥллям. Ожгарчиос бруствер вылын сылыса изиллям. Нош связистъёслы кӧлыны чик удалтымтэ. Кусыпез ялан возёно вал уго. 

18-тӥ куарусёнэ Коноплянка гурт вӧзысь одӥгаз ожын Николай Кузьмичлэн пыдыз сӧсырмем. Пӧртэм госпитальёсын кема эмъяськемез бере Николай Тихоновез Ярославльысь младшой офицерской составлэн училищеяз дышетскыны келяллям. Пыриськем Львов городэз мозмытонэ, отчы азьланяз выжем училище но. 

1945-тӥ арын 9-тӥ куартолэзез со пумитам аслаз дышетскон учреждениезлэн борддоръёсаз. Но ляб тазалыкеныз сэрен военной службазэ азьланьтыны Николай Кузьмич быгатымтэ ни. 1946-тӥ арын сое комиссовать кариллям. Дораз бертэмез бере партийной уж нуэм, колхозлэн председателез но вылэм. Колхозъёсты огазеямзы бере 15 ар пала слесарь луыса ужам. Таӵе данъетъёсыз вань: «30 лет победы в ВОВ», «50 лет победы в ВОВ», «50 лет Вооруженных сил СССР», «60 лет Вооруженных сил СССР», «70 лет Вооруженных сил СССР», «За победу над Германией в Великой Отечественной войне 1941-1945 гг», «За боевые заслуги» медальёсыз, Жуковлэн медалез, «Ужысь ветеран» медалез, I степенё Отечественной война орденэз. 

Кулэм Николай Кузьмич 1999-тӥ арын 4-тӥ инвожое.

***

Калыкмылэн быдэстэм подвигез, шаермылэн историяз котькыӵе ож вакыт ӵоже, бырисьтэм! Тае котьку тодамы возёно! Мон тодӥ, мынам ӵыжы-выжыосы пӧлын вань зэмос батыръёс, кудъёсызлэсь подвигзэс мон вунэтыны уг быгатӥськы. Нош люкам материал мынам семьяелэн ваньбурез луоз. Мынам черодэ вуиз кулонтэмлыклэсь эстафетазэ нуллыны — выжыосмылэсь тодэ ваёнзэс данъяны, сое берыктыны но выжыысь выжые выжтыны. Табере мон но азьланез понна кыл кутӥсько, ортчем улонмес тодамы возисько. Оскисько, семьяысьтымы поколениосты герӟась нюжа уз тӥяськы, нылпиосы но внукъёсы анай-атайзылы, вордскем шаерзылы, быдӟым Россилы пумтэм яратонэн улозы. Данъяськисько сыӵе семьяе вань шуыса!

Ӟаны шоръёзо школаысь 5-тӥ классысь дышетскисьлэн Смердов Артёмлэн проект ужез
Дышетӥсез: Смердова Анна Витальевна

(Вакчиятыса сётэмын)