Хезмәт

Нылпиос — улонысь самой бадӟым шуд

Калыкын тазьы верало: «Писпу выжыеныз улэ, нош адями — семьяеныз». Семья — со котькуд адямилэн самой бадӟым шудэз, Инмарен кузьмам зарниез луэ. Нош семьяяд нылпиосыдлэн шулдыр куараоссы ке чузъясько, нуналысь нуналэ муспотон ымныръёссы ке адско...талэсь но бадӟым шумпотон вань меда?

Асьсэлэн ужез яратэменызы, семья понна тыршеменызы, адямиослы котьку юрттыны дась но самой валтӥсез — ньыль нылпиез будэтэменызы  Исаевъёс гурт калыклэн гажаназ вутскизы.

Нина Ивановна Сырьяын вордске, кузпалыз нош, Николай Николаевич, Вуж Кушкетысь луэ.

«Вазь ик картлы кошки ке но, огпол но со сярысь ӧй жаля. Мыным кузпалэным туж удалтӥз. Анайзы, атайзы но монэ туж ярато, «мусо кенэ» гинэ шуо. Анай шуд сярысь веранэз но ӧвӧл — ньыль нылпие вань, Инмарлы тау, огезлэсь огез чебересь но визьмоесь».

Исаевъёслэн Александр пизылы 22 арес, со Казаньын вылӥ дышетскон юртэз йылпумъяса профессиезъя ужа но ини (Саша программист луэ). Ужзэ, пе, Саша туж яратэ, шутэтскон нуналъёсы но гуртэ бертыкуз, гуртоосыз компьютеръёссэс радъяны Саша доры гинэ ваё вылэм, школаысь дышетӥсьёсыз но ӵемысь ноутбукъёссэ тупатъяны, пе, куро. Диана нылзы туэ 11-тӥ классэз йылпумъяз (али дыре экзаменъёс сётэ). Экономической яке юридической ӧръя дышетскыны пырыны малпа вылэм. Диана но, агаез кадь ик, туж визьмо нылаш. Арлы быдэ пӧртэм предметъёсъя олимпиадаосы пыриськыса, призо интыосты басьтэ (кылем арын, кылсярысь, Ижевскын ортчем удмурт кылъя но литературая олимпиадаын 1-тӥ инты басьтэм, туэ отын ик 2-тӥ инты басьтӥз). Родион 5-тӥ классэз йылпумъя, пичи дырысеныз ик со но ужлы дышемын. Пиосмурт ужъёслэсь но пичиысен ик уг кышка, ваньзэ ачиз ужа. Нош самой покчи нылзылы, Аделиналы, туэ куинь арес гинэ тырмоз на. Нинапай, нылпиосыныз данъяськыса, вера: «Сашамы но школаез зарни медален йылпумъяз, Дианамы но туэ школаез медален йылпумъя, Родион пимы но туннэ нуналэ «5»-лы гинэ дышетске. Мон анай-атайёслэн собраниязы котьку но данъяськыса мынӥсько, нылпиосы понна ноку но возьытэ усьыны ӧз тупа». Анай-атайзылэсь яратэмзэс, данъяськемзэс но соос понна вань улонзэс сӥземзэс нылпиоссы асьсэос но валало. Соин но, Нинапайлэн аслаз верамезъя, соос анай-атаезлы пумтэм тау каро. «Экзаменъёслы дасяськонъёссы вань вал ке но, огпол но юрт котырысь ужъёслэсь ӧз пегӟе, ӧз кышкалэ. Одӥг пол мар ке но ужаны курид вылэм — соку ик быдэсто», — шуэ Нинапай.

Зэмзэ но, Нинапайлэн нылпиосыз ваньзы ик зарни кадь. Дышетскыны но устоесь, юрттыны но котьку дась. Секыт вал, дыр, Исаевъёслы сыӵе зарни нылпиосты будэтыны (мар шуид ке но, гуртын котьку уж трос, ӵемысь анай-атайёслэн нылпиоссылы дырзы уг тырмы). Та сярысь кузпалъёс тазьы шуо: «Улонын котькыӵе вакытъёс но луо. Но котьма ке но, нылпиосты будэтыны, визьноданы дыр шедьтоно. Котьмалэн аслаз дырыз, ваньмызлы времаяз дышетоно. Куд-ог дыръя тышкаськыны но тупа (пичиысенызы ӧд ке визьнода, бадӟымгес будэмзы бере вормыны уз ни луы), куд-ог дыръя кылын гинэ, каньыл ваньзэ валэктоно. Тани ми, кылсярысь, вань кадь праздникъёсты но семьяен ортчытыны тыршиськомы. Арлы быдэ, дышетскон ар йылпумъяськем бере, нылпиосмес ушъяса, соос понна ӝӧкъёс дасяськом. ӵыжы-выжыосмы, нылпиосмылэн юлтошъёссы — ваньзы люкасько. Нылпи талы туж шумпотэ, азьпалан умой дышетскыны но стимул луэ та со понна». Котькуд анай-атай кадь, Исаевъёс но одӥгзэ но нылпизэс уг люко — бадӟымъёссэ но, пичиоссэ но огкадь ярато. Соослэн семьяязы «тон пичи» но «тон бадӟым» шуисьёс ӧвӧл. Тани кык пол шуныт палъёсы но семьяенызы шутэтскыны мынӥллям — ваньмыз нылпиоссы понна. Таӵе шулдыр но тыр улонэзлы шумпотыса, Нинапайлэн бадӟым тау верамез потэ анайзыезлы но атайзыезлы. «Мыным шуд усиз сыӵе анайзылэн но атайзылэн кенэз луыны. Туж юртто соос мыным нылпиосты но утьыны, юртысь ужъёсты но быдэсъяло», — шуэ шумпотыса нылкышно.

...Калыкын тазьы верало: «Писпу выжыеныз улэ, нош адями — семьяеныз». Семьяеныз, нылпиосыныз, внукъёсыныз... Исаевъёс та верам кылъёслэсь пуштроссэ шараяло кадь. Нош кӧня асьме районамы гинэ но сыӵе «Исаевъёс»? Вераса быдтонтэм. Гожъяса быдтонтэм... Шумпотымон.

 

 

 

Реклама
Нравится
Поделиться:
Реклама
Комментарии (0)
Осталось символов: