Хезмәт

Балтач районы

18+
2024 - Гаилә елы
Азьлане

Праздниклэн историысьтыз

21 сентябре православной осконэн улӥсьёс Пресвятой Богородицалэсь Вордскемзэ пусъё. Та нунал возьматэ Иисус Христослэн Анаезлэсь та дуннее вордскемзэ.

Дун-чылкыт Мариялэн вордскемез сярысь пӧртэм малпанъёс вань, но Россиысь православной черк со Назарет городын вордскиз шуыса малпанэн соглаш луэ.

... Иерусалим городлэсь кыдёкын ӧвӧл интыяськем пичи городын улӥллям Иоаким но Анна — Дунне Утисьлэн анай-атайёсыз. Выжызы соослэн дано луэм ке но, нош улонзы — тыр, соос ог-огзэсты гажаса, ӟечсэ валаса, мукет муртэз жаляса улыны быгатӥллям. Сыӵе сямъёссы понна городысь калык но та кузпалъёсты яратэм. Но вылэм соослэн одӥг кайгыронзы — нылпизы луымтэ. Вылаз ик со дыре нылпитэк улон Инмарлэн каргеменыз лыдъяськем. Но кузпалъёс осконзэс ӧвӧл ыштӥллям, соос ялан Инмарлы нуны кузьманы курыса вӧсяськиллям. Огпол Иоаким чурыт пост утьыны но восяськыны пустыняе кошкем. Нош Анна кузпалыз, эшшо но кужмогес Инмарез нылпи сётыны курем. Соку Инмысь Инмарлэн Кылчинэз васькем но солы Кылдытӥсь куронъёссэ кылэм шуыса ивор верам. Семьяязы благословить карем, Инмарен пусъем ныл вордскоз шуыса ивортэм но солы Мария ним сётыны косэм. Таӵе иворзэ со Иоакимлы но вуттэм, соиз сыӵе кузьым понна вордсконо нылзэ Инмарлы служить карыны сётыны кыл сётэм. Озьы ик кариллям, дунне вылэ вордскем нылзылы кузпалъёс Кылчинлэн верамезъя Мария ним но сётӥллям.

Дун-чылкыт Нылмурт вордскемен адямиослэн осконзы кылдэм, дуннее Инмарлэн пиез, Утись лыктоз шуыса.

Кызьы оскисьёс та нуналэз пусъё?

VI даурысен кутскыса оскисьёс та нуналэ дырто храмъёсы, отын вӧсяськонъёс ортчо. Адямиос данъяло Инмарез но шудо ивор ваем нуналэз. Иерусалим но Назарет городъёс та нуналэ паломничество интыослы пӧрмо. Оскисьёс татчы Дун-чылкыт Мариялэсь улэм интыоссэ, черкъёсты адӟыны лыкто. Та нуналэ Инбам христиан оскисьёслэсь вань куронъёссэс кылэ, шуо, соин та нуналэ сьӧлыкез вераны кулэ но, Инмарлы тау карыса, вӧсяськыса, куронъёслэсь быдэсмемзэс курыны луэ.

Та нунал адямиос пӧлын нылкышно праздникен лыдъяське, соку нылкышнолы, выжыез азинтӥсьлы, гажан возьматыны кулэ. Нылпиез луымтэ нылкышнолэн пинал вордон сярысь куронъёсыз 21 сентябре одно ик кылэмын луо шуыса лыдъяське.

Нимысьтыз пусйыны кулэ, Инмар Анайлэн Вордскем нуналаз уг яра спирто юонъёсты юыны, сӥль но кӧсутёнлы тупасьтэм сиён-юонъёсты сиыны. Та кӧс нунал луэ. Озьы ик уг яра керетыны, муртэз вераны, секыт ужаны. Лулпуш чылкытлыкез утьыны, ӟеч уж лэсьтыны,

кылын но ужен юрттыны кулэ.

Нуналэн герӟаськем сямъёс

Азьло дыръёсы Богородицалэн Вордскем нуналыз выль арлэн кутсконэныз но лыдъяськиз. Та нуналэ ӝуатылӥллям чаг писэз но сое уйин но кысытэк возиллям. Нырысетӥзэ чаг ӝуам бере солэсь мукетсэ ӝуато вылэм, собере мукетсэ но мукетсэ. Али дыре но куд-ог оскисьёс, та сямез утьыса, оброс азьын уйин но, нуназе но лампада ӝуатыса возё.

Та нуналысен нылъёсты кураны кутскылӥллям, озьы ик та нуналэ сюан но ортчытыны умой — семья котьку но Инмар Анаен утиськоз.

Вашкала дырысен таӵе сямез но утьылӥллям: вазь ӵукна ик нылкышноос ву дуре васькылӥллям, шунды ӝужамлэсь азьло вуэн мисьтаськем нылкышнолэн чеберез кемалы, пе, возиськыса кыле.

Калык тодметъёс

21 сентябре уй но нунал огкадь луо но со бере уй каллен кузьгес луыны кутске, нош нунал — вакчигес.

Та нуналэ инкуазез учкыса, адямиос вуоно сӥзьыллэсь но толлэсь кыӵе луэмзэс тодылӥллям. Калык верамъя, тылобурдоос вылӥе инбаме ке ӝутско, сӥзьыл кема уз вуы али. Нош тылобурдоос музъем борды ӝиптӥсько но сиён ке утчало, кезьыт но лек толэз витёно. Богородица нуналэ яркыт шунды — шуныт октябрёзь кыстӥськоз али. Ӵукна инбам кизилиё, чылкыт — ӝоген кынтоз. 21 сентябре бус — зоръёс луозы. Бус ӝог вӧлмиз ке, зоро но шундыё нуналъёс черодэн вошъяськозы. Вазь ӵукна ик зор — эшшо 40 нунал ӵоже зор-кот усёз, нош тол кезьыт луоз. Лысву ке луиз — толэзьскын пужмер усёз. Лысву ӝог ке куасьме — лымы ӧжыт луоз, нош кема, нышырозь ке куасьме — трос лымыё толэз витьыны кулэ. Тӧл —  тол тӧло но ӧжыт лымыен луоз.

Статья Интернет источникъёсын пайдаяськыса дасямын

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: праздник