Пумиськонэ нош куриськомы ай

Пӧртэм аръёсысь выпускникъёс сцена вылысен школаез, дышетӥсьёсты данъязы, синпелет кузьымъёс сётъязы.  Милемыз дышетэм дышетӥсьёс одӥг-кык гинэ кылемын на. Ципья школае 5-тӥ классэ укмыс гуртъёсысь нылпиос люкаським. Тямысэтӥ классозь классной руководительмы вал Галина Николаевна Семовская. Соин пумиськыны кылдӥз ай, ӟеч тазалыкен кема мед улоз на. Адӟем карымон дышетӥсьмес, Галина Николаевнаез, кельшытӥм. Малы ке шуоно со егит но, чебер но, ымнырыз но пальпотӥсь тусо. Милемын вераськиз удмурт, бигер, ӟуч кылъёсын. Немец кыллы дышетӥз. Мугорын ӝужыт ӧй вал бере, туфлиос нуллӥз туж ӝужыт каблукен. Огпол быдэс классэн утчамы выж пуллэн висказ шедем набойказэ, шедьтӥм. Али но милемыз ваньместы нимын, фамилиен тодма, шумпотыса пумита. Тау солы.

Дышетскимы вуж, кык этажо пулэсь лэсьтэм юртын. Вожъяськыса учкылӥм бадӟым классъёсын дышетскисьёс шоры, соос уго дышетскизы кирпичлэсь лэсьтэм выль школаын. Укмысэтӥ классысен ми но отын дышетским. Та школамы но али дыре вуж шуыса нимаське ни, малы ке шуоно бордаз ӝутӥськиз туала дырлы тупась выль школа. Конечно, ваньмыз мукет сямен, воштӥськемын, азьвыл дышетскем классмес но утчано луиз.

Нылпиос зэмос артистъёс кадь туж быгатыса концерт возьматӥзы. Дышетӥсьёслэсь но чебер кырӟамзэс кельшытӥмы. Концерт бере столовойын кема пукимы на чай юыса но вераськыса. Тодамы ваимы школаын дышетскеммес, эшъёсмес. Верамы асьмелэсь улэм-вылэммес, нылпиосмы но внукъёсмы сярысь. Милям поколенимы палэнысь юрттэт возьматэк асьсэос тыршыса улэмын, котыр ласянь бадӟымесь азинсконъёс басьтыса. Матысьёсмы но мӧйы анай-атайёсмы сярысь сюлмаськыса. Таӵе сямъёсмы пыӵамын, луоз, школаысь адӟем карымон дышетӥсьёсмылэн сиё-дано уженызы но.

Роберт Животниковлэн мылкыдыз вылэм лётчик луыны, кылдымтэ. Казаньын авиационной заводын, самолёт лэсьтонын, самой ответственной интыын трос пӧртэм ужъёсты быдэсъям. Солэн вань медальёсыз но мукет трос наградаосыз. Милемыз тодматӥз эшеныз, лётчикен Рафаэль Хусаиновен, кудӥз дышетскиз артэ классын. Со лобам Робертлэн лэсьтэм самолётэныз, возьматӥз туспуктэмъёссэ. Фагиль Шафигуллин стройка удысын кивалтӥсьын ужамын. «Почётный строитель России», «Почётный строитель Татарстана», «Ветеран труда РФ» дано нимъёс сётэмын, мукет наградаосыз но вормонъёсыз лыдъянтэм трос. Та эшъёс паймытӥзы чебер куараен кырӟаменызы, баянэн но шудо вылэм. Пӧртэм серемес учыръёсты вераса зол серекъятӥзы.

Лида Туктаровалэн пиез Конькин Эдуард СВО-е пыриськемын. Та пияшлы сюлмысьтымы сӥзиськомы сӧл-тазаен вормыса бертыны. Лидалы но семьяезлы чурыт, зол кариськыны.

Пумиськон ӝытэз тунсыко нуизы, быгатыса шулдыртӥзы Ирина Григорьевна Чупанова но 10-тӥ классысь Давид Турганалиев. Бадӟым тау ваньзылы школаын ужасьёслы но милемыз шуныт пумитась нылпиослы. Дас ар ортчыса, оло, ӧз ке но ӧте, нош ик куриськомы ай пумиськонэ, ма соку милемлы 77 арес котыр гинэ луоз ай.

Вера Лобанова,

Ципья школа