Хезмәт

Сала Кушкет каникулъёсты йӧ вылын ортчытӥз

Сала Кушкет – пичи гурт. Нош кин вераз, пичи гуртъёсын шулдыръяськонъёс уг ортчо шуыса?

Зэм, туала дыре городын пиналъёс понна но, мӧйыос понна но трос пӧртэм шутэтскон интыос радъямын. Нош гурт калыклэн шулдыръяськемез потӥз ке – со но шулдыръяськоз. Интызэ но, дырзэ но шедьтоз. Ӵапак озьы ик луиз Сала Кушкетын но. Шулдыр праздниксэс соос йӧ вылын ик ортчытӥзы! Толалтэ тросэз ужрадъёс но, праздникъёс но отын ортчо вылэм соослэн. Йӧ доразы ик, праздник мылкыдэз ӝутыса, чебермам кыз сылэ – лыкты но шулдыръяськы гинэ.

«Праздникмы туж кельшиз, бал-маскарадэ но адямиос пыриськизы, шумпотымон. Та праздникез радъяны юрттэмез понна бадӟым тау вераммы потэ Ильясов Рашид Магсумовичлы – МДСУ-лэн директорезлы. Со спонсормы луиз. Кузпалэныз Резеда Магсумовнаен праздникамы но лыктӥзы. Озьы ик тау шуэме потэ асьме «Дуслык» обществомылы но ваньзылы гуртоосмылы. Нырысь ик Юрий Петровлы уха пӧзьтэмез понна, Алексей Гавриловлы но Михаил Камаевлы чай пӧзьтэмзы но лыктэм куноосты куноямзы понна. Озьы ик тау организаторъёслы Екатерина Петровалы но солэн юрттӥсьёсызлы Екатерина но Виктор Игнатьевъёслы. Конкурсъёсты туж умой нуизы Ольга Вершинина, Алёна Гаврилова, Алина Михайлова, Александр Смирнов. Та выль арез ортчытыны выжиз Екатерина Петрова, декретын ке но, дырзэ ӧз жаля, нош катокез организовать кариз Александр Прокопьев. «Тол бабаймылы» но Лымы ныллы – Лилия Чириковалы но Мария Троцианскаялы нимысьтыз бадӟым тау. Нокинлэн но со рольёсты басьтэмез ӧз поты, нош та нылъёс соку ик соглаш луизы. Мызганчимылы Камаев Виктор Павловичлы но туж бадӟым тау кареммес вуттӥськомы, азьвыл вераськытэк но шудыны соглаш луэмез понна. Табань пыжисьёслы Валентина Гавриловалы но Светлана Лихачёвалы озьы ик пумтэм тау кариськомы. Огъя вераса, гурт калыкмы – молодцы! Нокин но палэнэ ӧз кыльы, котькин пыриськиз. Азьпалан но озьы ик мед луысал», - вераз шумпотонзэ ватытэк Сала Кушкетысь Людмила Тихонова.  

Реклама
Нравится
Поделиться:
Реклама
Комментарии (0)
Осталось символов: