«Сьӧд пилем кадь ик, ми но кошкиськом, кытчы вуэммес тодытэк…»

Кушкет гурт — пичи удмурт гурт, Россиысь Геройлэн нимыныз герӟаськем дано удмурт гурт. Туннэ нуналэ та гуртысь огдыре арми радъёсын служить каро ньыль егит пиос. Кыкезлэн соос пӧлысь матысь дыре бертонзы но вуэ ини.

Филиппов Даниил Иванович вордске 2-тӥ толсуре 1999 арын Вуж Кушкет гуртын. Гуртысьтызы покчиёзо школаез йылпумъяса, дышетсконзэ азьланьтэ Шор Кушкет шоръёзо школаын. 2016-тӥ арын сое умой гинэ йылпумъя но Кукмор ёросысь Яныль гуртысь трос профильем аграрной колледже дышетскыны пыре. Отын тодон-валан люкаса, механиклэсь но сварщиклэсь ӧнерзэ басьтэ. Тракторез но машинаез нуллон праволы но дышетске. Школа аръёсысен ик творческой но общественной ужрадъёсы пыриськеменыз висъяськем пияш татын но уг ышы. Одӥг ужрад но, концерт но сотэк уг ортчы. Концерт номеръёсын Казане но, Елабугае но вуылэ. 2020-тӥ арын Даниил колледжез йылпумья. Со ик арын 27 инвожое Балтасьысь военной комиссариат сое военной службазэ ортчыны келя Самара улосвылысь Кряж каргуртын интыяськем войсковой часте. Туннэ нуналозь но со отын, аслэсьтыз дано ужпумзэ быдэстыса, связист но «КамАЗ» машиналэн шофёрез луыса служить каре. Анаез Филиппова Елена Михайловна ужа артэн гуртысь магазинын вузкарись луыса, нош атаез Филиппов Иван Пантелеймонович асьсэ гуртазы ик механик луыса тырше.

Даниилэн ӵош одӥг нуналэ Россиысь армилэн радъёсаз басьтӥське солэн двоюродной выныз но, Павлов Артём Сергеевич. Артём вордске 14-тӥ шуркынмонэ 2000-тӥ арын озьы ик Вуж Кушкет гуртын. Паймымон, агай-вынъёс дышетсконын но уг люкисько: валче мыно Вуж Кушкет гуртысь покчиёзо школае нырысетӥ классэ, нош собере, одӥг парта сьӧрын ик пукыса, Шор Кушкет школаын дышетсконзэс азинто. 2016-тӥ арын дышетсконзэс ӵош йылпумъяло. Собере гинэ сюресъёссы люкисько: Даниил Яныле кошке, нош Артём Марий Эл республикаысь Оршанка каргуртысь трос профильем колледже дышетскыны пыре. Сое йылпумьяса, физкультурая дышетӥсьлэсь квалификацизэ басьтэ. Артём та дышетскон интыяз но ассэ умоен гинэ возьматэ, котькыӵе ужрадъёсы пыриськылэ: спортивной ӵошатсконъёсы, концертъёсы. Выль ар праздник дыръя школаосын Тол бабайлэсь рользэ но шудэ.

Шумпотымон, армия пиослэсь сюресъёссэс нош огазея: агай-вынъёс одӥг нуналэ (2020 арын 27 инвожое) армие кошко но одӥг интые служить карыны шедё — Самара улосвылысь Кряж каргуртэ. Служить карон ротаоссы гинэ пӧртэм тупало. Артём но туннэ нуналозь связист но «КамАЗ» машиналэн шофёрез луыса службазэ нуэ. Туэ Самара городын Быдӟым Вормонлы 76 ар тырмонлы сӥзем сӥё-дано ужрадэ, парадэ но пыриськем. Анаез Павлова Римма Николаевна ужа «Наз» центрын социальной ужась луыса, атаез Павлов Сергей Михайлович шабашка ужъёсын выре.

Куинетӥез Россиысь армилэн радъёсаз служить карись Кушкет гуртысь пияш — Байгельдин Никита Алексеевич. Со вордске 19-тӥ толсуре 2001-тӥ арын. 2017-тӥ арын Шор Кушкет школаын 9 классэз йылпумъя но Сабаысь аграрной колледже дышетскыны пыре. 2019-тӥ арын, колледжез йылпумъяса, экономистлэсь, бухгалтерлэсь но кассирлэсь ӧнерзэс басьтэ. 2020-тӥ арын 10 шуркынмонэ Балтась ёросысь военной комиссариатысен басьтӥське воинской службае. Шеде со Южный Сахалин городэ. РЭБ (радиоэлектронной борьба) войскоосын служить каре. Трос дыръя штабын документ ужъёсты нуэ. 9 Май праздник дыръя со но туэ парадэ пыриськем. Анаез — Байгельдина Галина Михайловна, атаез — Байгельдин Алексей Анатольевич. Кыкназы но «Яна тормыш» обществоын ужало.

Эшшо одӥгез Кушкет гуртысь солдат — Исаев Максим Олегович. Вордскемын 23-тӥ толшоре 1997-тӥ арын. 2003-тӥ арын Вуж Кушкет покчиёзо школае нырысетӥ классэ дышетскыны пыре. 2007-2014 аръёсы Шор Кушкет школаын тодон-валан басьтэ, умой гинэ сое йылпумъя. Дышетсконзэ азьланьтыны малпа Удмурт шаерын, УдГУ-лэн географияя факультетаз. 2018-тӥ арын сое йылпумъя но «Ижевский нефтяной научный центр» обществолэн инженерной геодезияя ёзэтаз инженер луыса ужаны кутске.

Школа аръёсысен кутскыса ик Максим котьку мыло-кыдо пыриськылэ классэзлэн но школалэн спортивной но общественной улоназ, капчи атлетикая но волейболъя ортчись пӧртэм ӵошатсконъёсын призёр луылэ. Та сямызлэсь университетын дышетскыкуз но, ужаны кутскемез бере но уг куштӥськы со: пӧртэм творческой но спортивной ужрадъёсы пыриськылэ. 2020 арын, Удмурт Элькунлэн сборноезлэн составаз луыса, «Российская студенческая весна» фестивале но пыриське.

Армие Максим басьтӥське 2020 арын коньывуон толэзе. Службазэ нуэ Россиысь Сьӧд зарезьысь флотын ракетной катеръёслэн бригадаязы «Ивановец» ракетной катерын.

Максимлэн анаез, Исаева Наталья Юрьевна, ужа Шор Кушкет школаын ӟуч кылъя но литературая дышетӥсь луыса, атаез но, Исаев Олег Александрович, школаын тырше.

Армия… Та кылын данъяськон мылкыд мӧзмонэн пӧлэстӥськемын. Одӥг арлы-а, яке кык-куиньлы-а, котьма ке но со — люкиськон. Тужгес но со люкиськон секыт сётӥське солдатлэн анай-атаезлы. Соин но пиоссэс армие келям вань анай-атайёслы тазалык, чидан но сюлэм каньыллык сӥзьыны кулэ.

Историысь тодӥськом, азьло дыре кызь вить ар армиын служить кариллям шуыса. Тужгес егит но шудо дырзэ воргоронлы Атыкаймузъемзэ утёнлы сӥзьыны тупам. Но со вал эксэй кивалтон вакытэ. Вал сыӵе кышкыт дыръёс, ку асьме бабайёсмылы, служить карем сяна, Атыкаймузъемзэс утён понна ожмаськонъёсы пыриськыны, асьсэ улонзэс сётыны тупам. Туннэ асьмеос каньыл улонэн улӥськом, законъёс но воштӥськизы. Кылсярысь, бабайёсмы куинь ар служить каризы ке, атайёсмы — кык, нош туала призывникъёс одӥг ар гинэ служить каро ни. Служить карон дыр шӧдскымон кулэсмиз, но котьма ке но пуштросэз солэн ӧз ышы: армиын служить карон котьку но воргоронлэн дано ужпумез луыса кылёз. Дан понна но, коньдон понна но ӧвӧл! Со Атыкаймузъемед азьын, семьяед, матысьёсыд но ачид азьын дано ужпум!