Хезмәт

Балтач районы

18+
2024 - Гаилә елы
Азьлане

Секытэн будыса но, ӝожтӥськыны малпанъёсыз ӧвӧл

Тросэз мӧйыос, кудъёсыз сярысь ар ӵоже ини газет бамъёсы гожъяськомы, ожысь яке ужысь ветеранъёс луо. Та ачиз ини соос сярысь гожтон понна туж бадӟым муг луэ. Нош та статьяелэн героез сярысь гожтон понна мугъёс эшшо но тросгес. Та кышномуртлэн, ужысь ветеран луэмзэ юнматӥсь удостоверениез сяна, 1-тӥ степенё «Мать-героиня» медалез вань, ужаз но азьмынӥсь луэмез сярысь грамотаосыныз со ушъяськыны быгатэ, ньыль ар ӵоже гурт поселенияз депутат луэмез но тросэз сярысь вера.

Но ачиз кышномурт, Вуж Кушкет гуртысь Елизавета Зимеева, та сярысь вераны уг яраты — со ушъяськисьёс пӧлысь ӧвӧл. «Вань вал вормонъёс, мазэ ватонэз. Но со сярысь трос вераськыны кулэ ӧвӧл, улон-вылон сярысь вераськомы», — шуиз песянай. Вераськимы.

 

«Атай ожысь пал суй кыльыса бертӥз» 

Зимеева (Кузнецова) Елизавета Федотовна 1939-тӥ арын Вукогуртын огшоры крестьян семьяын вордскем.

— Анай гумыраз колхозын секыт ужын ужаз. Ма, соку нокинлэн но ужез капчи ӧй вал. Воргоронъёс ӧвӧл, нылкышноос уен-нуназеен ужын, нылпиос асьсэ понна улӥзы лумбыт, соос но ужазы… Атаймы ожысь пал суй кыльыса бертӥз. Мон пичи вал ке но, атайлэсь бертэмзэ тодӥсько на. Кӧня гинэ арес луэм меда мыным соку? Куинь-ньыль арес сяна ӧй вал, дыр, али. Час укмыс котыр ӵукна. Анай сушилкаын куасьтӥське вал…

Та вакытэ Лиза апай синъёсам учке но вала, сушилкаез син азям пуктыны уг быгатӥськы шуыса.  Песянай, нылпи вакытсэ тодаз вайыса, валэктыны кутске:

— Тӥ, егитъёс, сушилкаез кытысен тододы ини. Азьло сушилкаын куасьтӥсько вал ук; ачид эстӥськод, вылӥяз чильтэр луэ вал, со чильтэр вылэ ю тыриськод; чильтэр вылысь юдэ ялан сураса улӥськод… Сыӵе маке вал со сушилка.

...Табере атай бертӥз, нош анай сушилкаын ужа. Дорамы Васьлеен кыкнамы вал, Васьлей — мынэсьтым куинь арлы бадӟым агае. Мон кошки сюрестӥ, ми отӥ шонерен гинэ ветлӥськомы вал сушилка доры. Нош Васьлей урам кузя васькиз амбаре. Анай куасьтэм юзэ валэн амбаре васькытэ вал. Вакчигес верано ке, мон сушилка доры мыныса ӧй вуы, анай ини дӥньын вал — Васьлей со доры мынэсьтым азьлогес вуыса иворез верам. Кӧня шумпотон вал соку…

 

«Милемлы дышетскыны эрик ӧй вал»

Атайзы ожысь пал ки бертэм ке но, ужлэсь со ноку кышкамтэ, гумырез ӵоже бусыын агроном луыса тыршем.

Кузнецовъёслэн вить нылпизы луэм. Ваньзы соос ож дырозь вордскиллям. Лиза апай соос пӧлысь самой покчиез луэм, солэн кыктоез но вань вылэм, но вордскеменыз валче со больницаын кулэм.

— Школаын дышетскыны ми ӧм быгатэ шуыны луэ, малы ке шуоно пичи дырысен сапег лэсьтӥмы. Атаймы ачиз но ужась вал, милемыз но ужаны дышетӥз. Милемлы дышетскыны эрик ӧз луы, — азьланьтэ веранзэ Елизавета Федотовна. — Атай пал киын ке но, ужаны тыршиз. Азьло ыжгон тугон инты ӧй вал — ачид лӧдӥськод, ачид тугиськод, ачид вӧлдӥськод, ачид погылляськод вал ыжгонэз. Со ужен выреммы али но син азьын: атай паллян киыныз вӧлдэ, агай туге… 

Малпанъёсызлы сётскыса, Лиза апай нош секыт ож дыръёсты тодаз вайиз но вераны кутскиз:

— Октон-калтон вакытэ анай бусыын ара вал, ми солы юрттыса ветлӥмы, малы ке шуоно сиыны нянь ӧй вал, нош кӧт сюма. Анай доры мынӥд ке, отын сиён пӧзьто… Анайлэсь люкетсэ ми сииськомы, нош со сютэм кыле вал, милемыз, нылпиоссэ, сюдыны тыршыса. Ма, дорын но номыр сиён ӧй вал, — анайзэ тодаз уськытыса но сое жаляса вера Лиза апай. — Октон-калтон бере одӥг ведра пызь сёто вал. Со луэ вал 16 килограмм мында. Со пызьлэсь сиён пӧзьтыса, ӵукна 8 часлы анайёслы нышыраны сиён нуиськомы вал. Нышырлы шыд пӧзьто вал, ӝыт сиськонзылы ум нуиське вал ни сиён, нышырлы шыд сиеменызы ужало вал. Озьы тӥни, ӵукна куинь часэн кошко вал анайёс ужаны, ми кылиськомы вал скал кыскыны, юрт котырын ужаны.

Ужаса-ужаса ке но, дышетсконзэ кельтыса ке но, Лиза апай сизьым ар Ципья школаын дышетскыны быгатэ ик. Туннэ нуналэ со пайме, кызьы со дырысь нылпиос вутскиллям котьма карыны но.

— Вань шуг-секытъёсты, вань ыштонъёсты, курадӟемъёсты вераса быдтыны но уз луы. Ваньзэ веранэз мултэс но луоз, дыр. Мон али малпасько, малы ваньзэ нимысьтыз тетраде ӧй гожъя меда шуыса. Кызьы но мар каримы пичи дыръя, кызьы будӥмы но кызьы улӥмы, анай-атайёсын кызьы дырмес ортчытъямы — ваньзэ гожъяно вылэм сое. Олома зӧкта луысал гожъям тетраде… Ма, милям тетраде гожъяны дырмы но ӧз луы ини, малпано ке. Табере туж гожъясалыд но, йырын кыльымтэ ни. Карандашез вал-а, тетрадез-а гожъяськыны, созэ но вунэтоно ӧвӧл...

 

«Куспамы тупаса улӥмы»

17 аресэн Лиза апай Вукогуртысь фермае скал кыскыны пыре. Отын кык ар ӵоже ужа, дас скалъёсты киын кыске, котькыӵе косэм ужез но быдэстыны дась луэ. Картлы кошкытозяз со та ужын тырше.

— Мынам Зина апае татчы, Кушкетэ, картлы кошкем вал. Со дышетӥсь вал, татын нылпиосты дышетӥз. Мон со доры куное ветлылӥ. Кушкетын 1966-тӥ арозь торф потто вал, ми отчы ужаны ветлӥмы: азьло фермае мынӥськомы, фермаысь ужаса бертэммы бере ини торф поттыны кошкиськомы вал, — тодаз вае Лиза апай егит дыръя ужамъёссэ. 

Кушкетэ ӵемысь ветлэ вал бере, Елизавета но, апаез кадь ик, кузпалзэ та гуртысь шедьтэ. 1959-тӥ арын со Зимеев Пётрлы картлы кошке. Татын но егит кышномурт фермаын ужа, парсьёсты сюдэ.

— Вукогуртын ужамез но лыдэ басьтоно ке, мон огъя 37 ар ӵоже фермаын ужай, собере 10 ар лаборант луыса тырши. Тазалыке лябӟемен, монэ капчигес уже выжтӥзы, — маде песянай. — Пенсие нош 1991-тӥ арын потӥ.

Зимеевъёс куать нылпиослэн анай-атайзы луо. Нырысетӥ нылзы, Антонина, 1960-тӥ арын вордскем. Со Казаньын аслаз семьяеныз улэ. Кыкетӥ луыса 1963-тӥ арын Николай пизы вордске, воргорон Коми Республикаысь Ухта городын интыяськем. 1966-тӥ арын Василий но Геннадий кыктооссы вордско. 1975-тӥ арын Зимеевъёслэн нош кыктооссы вордско, но таяз учыре ини нылъёс — Елена но Ольга. Туннэ нуналэ Елена нылзы Казаньын аслаз семьяеныз улэ, Ольга — Ципьяын. Василий но Геннадий кыктооссы, жаляса вераны кулэ, висеменызы сэрен, больницае интыямын.

— Кыкто пиосы армиын но служить каризы, бертэмзы бере уже но интыяськизы. Висёнзы витьымтэ шорысь кутскиз. Пиосмес келяны секыт вал, анай сюлэм вӧсь луиз. Но отчы соос доры мыныса бертӥськомы, — шуэ Лиза апай, ассэ буйгатыны тыршыса. — Ваньзы ас семьяоссэс кылдытӥзы бере, мон огнам улыны кыли. Пётрлэн кулэмезлы но тани куинь ар луэ ини. Кыкнамы улӥськомы вал али, куспамы тупаса улӥмы. Кузпалэ гумыраз, шонергес ке верано, 49 ар ӵоже, колхозын учётчик луыса ужаз. Бусыын туж трос дырзэ ортчытӥз, ялан трактористъёсын ужаз. Кошкиз ини та дуннеысь… Яра али нылпиосы куное бертылыса уло, жингыртыса тазалыкеным тунсыкъясько. Туннэ нуналэ куать внукъёсы вань, правнукъёссы но вань ини мынам, — шумпотэ Лиза апай.

 

«Яра али Римма вань» 

Нылпиосызлэн но внукъёсызлэн жингыртэмзылы но куное бертылэмзылы гинэ ӧвӧл, песянай туж шумпотэ, солы социальной ужась Римма Павлова ялан юрттэ шуыса. Вуж Кушкет гуртэ мынэм нуналэ но Римма Николаевна отын вал ни, юртъер котыраз утялскыса ветлӥз. Шӧдске, Римма апайлэн песянайёсын кылыз туж умой тупа.

— Римма туж уте, солы бадӟым тау, яра али со вань. Юрт котыръёсме но утялтэ, милемын, пересьёсын, трос дырзэ ортчытъя, ӟеч кылъёссэ но уг жаля, — ушъя Лиза апай социальной ужасьсэ.

Зэмзэ но, Елизавета Федотовналы но, Римма апайлэн мукет утёно адямиосызлы кадь ик, вӧзазы сыӵе социальной ужасьсы вань дыръя, оген улон но кышкыт ӧвӧл. Малы ке шуоно со котькуд пересь адямиез азьын аслэсьтыз кылкутонзэ умой шӧдэ.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Тросэз мӧйыос, кудъёсыз сярысь ар ӵоже ини газет бамъёсы гожъяськомы, ожысь яке ужысь ветеранъёс луо.