«Шулдыр ӝыт» шулдыртӥз

Ужрад туж яркыт пӧрмиз — концерт программалэн репертуарез егит поколенилы но, арлыдоослы но учкыны тунсыко мед луоз шуыса радъямын вал. «Шулдыр ӝытъёс» возьматӥзы крезьгурлэсь пӧртэм ӧръёссэ: поп, шансон, рок-н-ролл... Паймытӥзы чебересь туала удмурт костюмъёсынызы, выль программаенызы.

Ансамбльлэн историысьтыз

Ансамбль кылдытэмын 1977-тӥ арын (соку ик, шуыны луэ, профессиональной удмурт эстрада кылдыны кутске). Тунсыко: та ансамбль тодмо луись «Айкай» ансамбльлэсь но «мӧйыгес» («Айкай» кылдэмын 1990-тӥ арын ). »Шулдыр ӝытлэн» кылдытӥсез но трос аръёс ӵоже кивалтӥсез вал Россиысь но Удмуртиысь сӥё-дано артист Анатолий Ушаков, собере — солэн кузпалыз Галина Платонова, Россиысь сӥё-дано артистка, Удмуртиысь калык артистка. Нош туннэ нуналэ художественной кивалтӥсез луэ Анатолий Алексеевичлэн но Галина Иосифовналэн нылзы Наталья Ушакова.

«Шулдыр ӝыт» — туннэ

Ансамбль улон-вылонэз ӵоже трос выльдӥськонъёс пыр потӥз. Коллектив ялан егитоме. Огъёсыз кошко, мукетъёсыз вуо. Выль адями выль малпанъёсын лыктэ. Соин «Шулдыр ӝыт» калыклы ноку уг акыльты. Солэн улонэз «пӧзе». Коллективлы 40-лэсь тросгес ар ке но, со аслэсьтыз кулэлыксэ уг ышты. Наталья Ушаковалэн верамезъя, берпуметӥ аръёсы выль адямиос — устоесь но быгатӥсь нылъёс но пиос — вуо. Соин соослэн учкисьёс понна тросгес выль проектъёс но выль номеръёс дасяны мылкыдъёссы вань — зал тыр люкаськем калык тужгес но мылкыдъёссэс ӝутэ. Ма, таиз валамон но — «Шулдыр ӝытлэн» репертуарез туж узыр — кырӟанъёссы удмурт, ӟуч кылын быдэстӥсько, бигер кырӟанъёссы но вань. Кырӟанъёсыз пӧлын но вань кызьы лирическойёсыз, озьы ик шулдыръёсыз; кызьы серекъятӥсьёсыз, озьы ик бӧрдытӥсьёсыз но.

Татарстанын куноын

«Шулдыр ӝытъёс» Татарстанэ туж ӵем ӧвӧл ке но, куное вуыло. Кылсярысь, 2017-тӥ арын ортчем ёрос Гырон быдтонэ мыло-кыдо пыриськыса, калыкез шулдыртӥзы. Соку ик синйылтӥськемы вал ни ансамбльысь егит кырӟасез, Иван Белослудцевез. Таяз лыктыкузы со выль кырӟанъёссэ быдэстыса эшшо но тросгес аслыз синмаськытӥз. Ачиз чебер, кырӟанъёсыз аспӧртэмлыко, куараез небыт... Макем усто сцена вылын ассэ возе, кырӟа но, эктэ но, гитараен но шудэ. «Кыӵе красавчик» — кылӥськиз концертын сьӧр радъёсысь. Иван гинэ ӧвӧл, ваньмыз кырӟасьёс часэн ӝыны кыстӥськись концертын калыкез пальпоттӥзы. Шумпотыса пумитазы Удмуртиысь калык артисткаез Анна Плотниковаез. Та кырӟасез, Балтась районын трос пол выступать каремез вань вал бере, «асьме» кырӟасьмы шуыса гинэ, кужмогес кичабонъёсын пумитало, соин валче кырӟало но.

Мылкыдъёс, мылкыдъёс...

Светлана Щербакова, Вуж Кушкет гурт клублэн кивалтӥсез:

— Калыклы концерт кельшиз. Клубамы 50 инты гинэ вань бере, ваньмызлы учкисьёслы инты но ӧз тырмы — скамейкаын пукизы. Озьы ке но, тырмем мылкыдын доразы бертӥзы. Удмуртиысь вуэм артистъёсмес куно но каримы: дасямы трос пӧртэм салатъёс, пыжиськемъёс. Концерт йылпумъяськем бере юмшамы но, Алексей Павлов мызганэн шудӥз. Сыӵе кыдёкысь вуэм куноосмес шумпоттэммы потӥз. Ми ведь удмурт концертъёслэсь, удмурт кырӟасьёслэсь туж мӧзмиськом.

Екатерина Салтыкова, учкись:

— Концерт туж кельшиз. Туж профессионально, пыр-поч малпаса радъям вылӥ уровенен эстрадной концерт. Синмаськымон чебересь нылъёс но пиос сцена вылын ас устолыксэс возьматӥзы. Туж быгатыса ужало залэн, усто кырӟанъёсты быдэсъяло. Артистъёс милемлы зэмос шулдыр ӝыт кузьмазы. Мон сямен, концертын малпаса ӵектэмын вал котькуд аресэн учкисьёс понна номеръёс, егитэзлы кельшымонэз но, арлыдоезлы тупамонэз но луиз. Одно ик нимысьтыз верам потэ ансамбльысь егит кырӟась пи сярысь — Иван Белослудцев туж аспӧртэмлыко, ас манереныз быдэсъя кырӟанъёссэ. Малпасько, со унозэ синмаськытӥз, дыр. Ма, весь «Айкай» уз луы ук, пӧртэм ӧрын ужась артистъёсын тодматскон — со туж умой. «Шулдыр ӝытъёс» азьпалан но асьмеос доры вуылозы но милемыз шумпоттозы шуыса оскем потэ.

Ольга Плотникова, учкись:

— «Шулдыр ӝытъёслэн» концертсы, кинлы кызьы, дыр, но мыным туж но туж кельшиз. Выль адямиос, туала, аспӧртэмлыко но йӧспӧртэм концерт программа, яркыт но чебер дӥсьёс — ваньмыз синмаськытӥз.

Улонлэсь азинтӥськемзэ, воштӥськемзэ возьматӥзы, кадь, артистъёс асьсэ выступлениосынызы, аръёс ӵоже кылдэм стереотипъёсты тӥязы, шуод-а мар-а. Удмурт концерт таӵе но луыны быгатэ вылэм шуыса, паймисьёс но луизы, дыр.

Котькуд артистлэн аслаз учкисез. Малпасько, «Шулдыр ӝыт» ансамбль но  асьме доры матысь эшъёссы доры кадь вуылӥз но выль учкисьёсты шедьтӥз. Тау соослы туж бадӟым огпӧртэм, огсыр улонмес шулдыртэмзы, шутэтскон минутъёс, шуныт тулыс мылкыд, огъя вераса, шулдыр ӝыт кузьмамзы понна. Азьланяз но выль но выль азинсконъёс, творческой азинлык соослы!

Мария Матвеева, Ярак-Чурма клублэн заведующиез:

— «Шулдыр ӝыт» эстрадной ансамбль Ярак-Чурма гуртэ вуылӥз 12 оштолэзе. 50 интыем клубе 70-лэсь тросгес учкись люкаськем вал. Балтасьысен лыктэмъёс но вань вал. Мынам малпамея, та туж умой. Калык артистъёсты туж шуныт пумитаз. Котькуд кырӟан бере кичабонъёс но шуланъёс кема кыстӥськизы. Малпасько, гурт калык таӵе дано артистъёслэсь мӧзмем вал ни шуыса, малы ке шуоно таӵе концертъёс клубамы туж кемалась ӧй вал ни. солэн мугез — вуж клублэн аварийной состояниез. Артистъёслэн эмоциональной выступлениоссы но люкаськем калыклэн кичабонъёссы кемалы кылёзы тодэ ваёнъёсамы. Туж бадӟым тау Михаил Михайловлы сыӵе пичи гурт клубе концерт радъяны быгатэмез понна.

Огъя мылкыдъёс сярысь верано ке, тазьы шуыны луэ: та ваньмыз ласянь (кырӟанъёсыз, костюмъёсыз ласянь) туала удмурт-ӟуч концерт вал. Малпасько (калыкен вераськыса тодӥсько но), учкисьёс пӧлын концертэз кельшытэмъёс но, кельшытымтэос но вал шуыса. Но огез тодмо — мылкыдтэмъёс ӧз кыле.