Хезмәт

«Сиёнэн туж секыт вал...»

Ож... Каргам Быдӟым тылож... Кӧня кайгу, кӧня куректон со вайиз. Кӧня адямилэсь улонзэ тарказ, кӧня воргоронъёс ож лудын бырыны шедизы, кӧня анайёс пиоссэс но нылъёссэс ыштӥзы, кӧня нылпиос атайтэк кылиз, кӧня нылкышноос палкышно луизы...

... Покчи Лӧзя гуртысь Медведева Агафья Николаевна, кузпалзэ Медведев Андрей Тихоновичез оже келякуз сизьыметӥ пиналэзлэсь вордскемзэ вите ни вал. Ӵапак картэз кошкем бере одӥг арняскын вордӥське Александр пиез. Кышномурт сизьым быдэ вуымтэ, огезлэсь огез пичи пиналъёсыныз огназ кыле. «Атай кошкем бере туж курадӟыса улӥз анай. Озьы ке но, ужез яратэмысь таман (ялан) но ужаз», — шуэ туннэ нуналэ Бадӟым Лӧзя гуртын улӥсь Плотникова Раиса Андреевна, Агафья Николаевналэн нылыз.

Агафья Николаевна вордӥське 1907 арын 17 феврале Кушкет гуртын. Но адӟон вуттэ сое Покчи Лӧзя гуртэ: атайзы кулэм бере, анайзы кык нылпиен кыкетӥзэ картлы кошке Покчи Лӧзя гуртэ. «Азьло валэн ветло вал ук ни. Анайёс татчы (Покчи Лӧзяе — О.П.) лыктыкузы соослэсь обоззэс лушкаллям. Нош обозазы ю луэм. Азьло ведь тысьлэсь но дуно узырлык луымтэ. Тӥни озьы соос сюратайзы доры буш лыктыса пыриллям», — тодаз вае анаезлэсь верамъёссэ мукет нылыз Софья Андреевна.

Озьы Кушкет ныллэн пичи но егит дырыз, ма бен быдэс гумырыз но, Лӧзя музъемын ортчем. Яратонзэ но татын ик пумитам. Быдэ вуыса, Медведев Андрей Тихоновичлы бызем, сизьым нылпизы вордскем — Валя (1929), Рая (1931), Пётр (1933), Софья (1935), Ольга (1936), Виктор (1939) но Александр (1941). Жаляса верано, дышетскыны шуд усьымтэ Агафьялы, со понна пичиысен ик ужаны тупам.

«Азьло ик фермаын ужаз, дояркаын. Соку колхоз кылдон аръёс вал. Муртъёслэсь люкам скалъёсты кыскиз. Собере кема аръёс ӵоже конюхын тыршиз. Азьло валъёсын ветло вал ук кивалтӥсьёс. Али кадь машинаос ӧй вал. Тӥни со валъёсты ӵукна ик сюдыса, сынаса, утялтыса дася вал анаймы. Мазэ веранэз, ужась луэмысьтыз кытын секыт, отчы лэзё вал анаймес...» — шуэ ужан сюресэз сярысь мадьыса Соняпай.

Бен, пиналъёсты пыд йылазы султытон понна быгатымтэзэ но быгатыны тупа ни, дыр. Со котьку но анай-атайлэн валтӥсь ужпумез луэ шуыса вераны янгыш уг луы, дыр. Туннэ нуналэ но адямиос тыршо пиналъёссылэн шудо улонзы понна. Анай-атайёс ваньзэ лэсьтыны дась пиналзы номырлы ёрмытэк мед улоз шуыса, вылӥ тодон-валан мед басьтоз шуыса. Нош ож вакытэ анайёслэн бадӟым сюлмаськонзы вал — нылпиоссэс сютэм улонлэсь но кулонлэсь утён.

«Сиёнэн туж секыт вал, — шуэ Раяпай. — Сиён уг тырмы вал, котьку но кӧт сюмаса ветлӥм. Сиыны куаръёс но ӧй вал. Поттурынлэсь сьӧд-сьӧд нянь пыже вал анаймы. Курыт луэ вал со. Со но аслыз уг йӧты вал. Ваньзэ нылпиосызлы люкылӥз». «Бен, озьы. Нянез кампетэз кадь люке вал анай. Нош ачиз чыры-пырызэ гинэ сиылӥз.., — пушкыз тырыса апаезлэсь веранзэ азинтӥз Соняпай. — Бадӟым коркамы вал, куать укноен. Кӧт сюмаса укноысь кын йӧэз сииськом вал... Адями нянь сиыку но нянь ӧм сие ми. 1955-тӥ арозь ӝӧк выламы няньмы ӧй вал», — Раяпайлэсь верамзэ юнматыса маде Софья Андреевна.

«Ӵукна пеймытэн кошко но ӝыт пеймытэн берто вал анайёс. Но озьы ке но котьку нышырлы бертыса милемлы, нылпиосызлы, турын-куарлэсь шыд пӧзьтыса кельтэ вал. Нош религиозной праздникъёслы ӝӧк выламы ческыт сиён луэ вал — кын барангиез куасьтыса но солэсь крахмал карыса пыжем кӧмеч. Сыӵе дыръя анай куноосты но ӧте вал», — ватса на Соняпай.

Секыт ужлэсь но сютэм улонлэсь Агафья Николаевна ужан куспетӥз ик калтэм кылем, пограм. «Конюхын ужа вал соку. Кудмы быгатӥмы мынӥмы анаймес утьыны. Анаймы усем бере ми доры районысен лыктӥзы уполномоченнойёс. Собере соос милемлы вить килограмм пызь сётӥзы. Анай сое одӥг пуньыен поттурын шыдэ понэ вал. Тӥни озьы со пыд йылаз султӥз но... соку ик ужаны потӥз», — вера Раяпай.

Агафья Николаевна Медведева улэм 85 аресозь. 7 нылпизэ но пыд йылаз султытэм, ачиз кадь ужез гажаны дышетэм, яратоно песяй но ӵужанай луыны вутскем. Тыршыса ужамез понна «За доблестный труд в Великой Отечественной войне 1941-1945 гг.» медален пусъемын, ужысь но тылысь ветеран ним сётэмын.

Кин ке но, оло, малпалоз, Быдӟым ож дыръя котькин но озьы ужаз, сыӵе шуг-секытъёсын пумиськоно луиз. Соиз озьы. Но ӵапак нимаз одӥг адямилэсь улонзэ эскерыса валаськом, кыӵе секытэн вуэм но кыӵе бадӟым дун тыроно луэм асьме шаермылы кема витем Вормонэ вутскон понна. Ӵапак одӥг адямилэсь — ожгарчи-а со, яке городын, гуртын тыршись-а — улонзэ эскерыса валаны луэ, мабыдӟа люкет со пыртэм огъя уже — тушмонэн нюръяськонэ.

 

«Тыршонтэк вормон но ӧй луысал. Нярак тыршыса ужамысь тушмонэз вормыны быгатӥм. Сыӵе секыт улонэз пиналъёс медаз адӟе. Ноку но медаз лу война», — шуэ Раиса Андреевна Плотникова.

 

Реклама
Теги: ож
Нравится
Поделиться:
Реклама
Комментарии (0)
Осталось символов: