Азьлане

Сюлэм косэмъя быръем ӧнер

1 сентябрь 2026 - 14:00 Автор:

Ольга Плотникова

Котькуд нунал Вероника Егорова возьматэ: ӵапак сыӵе сюлэм быръёнлэсь быдэс династилэн вуоноез кылдэ

Покчи Лӧзя школаысь географияя но биологияя дышетӥсь Вероника Вениаминовна Егорова понна таиз ар нимысьтыз пусйымон луиз. Россия Федерациысь Просвещениея министерстволэн указэзъя солы сётэмын «Отличник просвещения» пус. Будӥсь пиналъёсты будэтонын но дышетонын усто тыршемез понна та данъетэз педагог 50 арес тырмон араз басьтӥз.

Пельпум сьӧрын — 31 ар ужам стаж, вылӥ квалификационной категория, дасо данъетъёс но таукаронъёс, ёрос, элькун но огъяросси олимпиадаосын вормись дышетскисьёс. Но солэн историяз тужгес валтӥсез поколениослэн герӟетсы луэ: со — Медведевъёслэсь 560 арлэсь ортчем педагогической стажен династизылэсь выжызэс азинтэ.

Сюрес быръён

Вероника Егорова вордске 1976-тӥ арын 20-тӥ южтолэзе Покчи Лӧзя гуртын Татьяна но Вениамин Александровъёслэн семьяязы. Анаез, Татьяна Валентиновна, интыысь колхозын кассир луыса ужаз, нош атаез, Вениамин Степанович, механизатор вал.

— Пичи дырысеным ик тодӥсько вал, дышетӥсь луо шуыса, — вера Вероника Вениаминовна. — Бускель нылпиосын шудӥ школаен, отын котьку дышетӥсь вал, нош валтӥсь адӟем карымон пример мон понна луизы ӵужапае, Тамара Валентиновна Плотникова, но ӵужкенаке, Нина Петровна Медведева, соос кема аръёс ӵоже школаямы дышетӥсь луыса ужазы.

Тӥни озьы 1991-тӥ арын, вордскем школаысьтыз 9 классэз йылпумъямез бере, егит ныл Арчаысь педагогикая училищее покчи классъёсты дышетӥсьлэн ӧнерезъя дышетскыны пыре. 1995-тӥ арын ужан сюрессэ мытэ Покчи Лӧзя гуртысь нылпи садын воспитатель луыса, нош ар ортчыса, выже ни гуртысьтызы школае ужаны, географияя дышетӥсь луыса. 2001-тӥ арын заочно йылпумъя Казаньысь педагогикая кун университетысь естественно-географической факультетэз. Со дырысен туннэ нуналозь Вероника Егорова вордскем школаяз географилы но биологилы дышетэ.

Династия азьланьтӥське

Вероника Вениаминовналэн педагогической династиез — школалэн историяз огшоры фамилия гинэ ӧвӧл. Со улэп нюжа, кудзэ туннэ азьланьто солэн нылпиосыз.

— Мынам пытьыосы кузя мыно нылъёсы но, — данъяськыса вера педагог.
Бадӟым нылыз, Людмила, 2014-тӥ арын Покчи Лӧзя школаысь 9 классэз йылпумъяз, собере, анаез кадь ик, покчи пиналъёсты дышетон понна, Арчаысь педагогикая колледже дышетскыны пыриз. 2018-тӥ арын со профилья ик дышетсконзэ азьланьтӥз Казаньысь федерал университетын. Али со Казаньысь одӥгаз школаын дышетӥсь луыса ужа, покчи классъёслы тодон-валан сётэ. Покчи нылыз, Лариса, 2022-тӥ арын 11 классэз йылпумъяз но Казаньысь федерал университетысь Филологияя но межкультурной коммуникацияя институтэ кунсьӧр кылъя дышетӥсьлы дышетскыны пыриз. Туэ со дышетсконзэ умой йылпумъяз но озьы ик Казаньысь одӥгаз школаын кунсьӧр кылэз дышетыны кутскиз ни.

Вылӥ данъет

Вероника Егоровалэн кун но удысъя данъетъёсыз асьсэ понна верало, солэн ӧнерлыко тыршемез тужгес вылӥ уровенен пусъемын. 2012-тӥ арын со, дышетон но визьнодан удысын тыршемез понна Татарстан Республикалэн Президентэзлэн Рустам Нургалиевич Миннихановлэн киысьтыз Таукарон басьтӥз. Со арын ик «Наш лучший учитель» элькун грантын вормись луиз, «Арлэн дышетӥсез» конкурслэн ёрос этапаз пыриськиз но, методической компетентностьсэ но творческой амалзэ вылӥ дунъяса, жюри солэсь ужзэ куинетӥ интыен пусйиз. 2013-тӥ арын Татарстан Республикаысь Дышетонъя но тодосъя министерстволэн «За заслуги в образовании» гадьпусэныз пусйиськиз, 2021-тӥ арын Россия Федерациысь Просвещениея министерстволэсь Данъян грамотазэ басьтӥз, нош 2026-тӥ арын — Россия Федерациысь Просвещениея министерстволэсь «Отличник просвещения» азинскон пуссэ.

Данъяськон — дышетскисьёслэн азинсконъёссы

Но ас удысаз валтӥсь азинсконэн педагог лыдъя дышетскисьёсызлэсь вормонъёссэ. Арлы быдэ солэн дышетэм пиналъёсыз географияя, биологияя, геологияя но экологияя ёрос олимпиадаосын призёръёс луо. Нош куд-огез республика но, огъяросси уровене но пото. Озьы, кылсярысь, Никитин Евгений географияя Огъяросси олимпиадалэн элькун этапаз кык пол (2024-тӥ но 2025-тӥ аръёсы) призо интыос басьтылӥз, нош Сидоров Иван геологияя висъяськиз, 2026-тӥ арын элькунын вылӥ результат басьтӥз. Педагоглэн нимысьтыз данъяськонэз — Дмитрий Шадров, со куинь ар ӵоже, 2008-тӥ арысен кутскыса 2010-тӥ арозь, географияя Огъяросси олимпиадалэн йылпумъян этапаз призёръёс пӧлы шедиз. Финаллы дасяськон вылысь Вероника Вениаминовна сое Казане, Москвае но Твере сборъёсы но нуллӥз.

— Ӵапак дышетскисьёслэсь таӵе результатъёссэс мон аслам валтӥсь профессиональной азинсконэным лыдъясько, — пусъе дышетӥсь.

Экологияя визьнодан но мерлыко уж

Вероника Егоровалэн ужаз нимысьтыз инты басьтэ экологиез будэтон. Трос аръёс ӵоже ини со школаысь «Друзья природы» лесничествоен кивалтэ.

— Инкуазь сярысь сюлмаськон — со бадӟым лозунгъёс ӧвӧл, со нуналлы быдэ быгатэмъя лэсьтэм уж, кудӥз огъя улон интымес чылкытгес, вожгес но ӟечгес каре, — оске педагог.

Та ласянь трос аръёс ӵоже ужамез понна со пусъемын Татарстанысь Экологияя но инкуазь узырлыкъёсъя министерстволэн Данъян грамотаосыныз, Татарстанысь Нюлэс хозяйствоя министерстволэн Таукаронэныз. Озьы ик школаысь лесничестволэсь ужзэ радъянын азинсконъёсыз понна Татарстан Республикаысь Дышетонъя но тодосъёсъя министерстволэн Данъян грамотаосыныз сӥлы каремын.

Покчи Лӧзя школа «Эковесна» элькун акциын «Лучшая школа» номинациын трос пол призо интыос басьтылӥз, нош 2020-тӥ арын Егоровъёслэн семьязы «Экосемья» номинацие пыриськиз но Татарстан Республикаысь Экологияя но инкуазь узырлыкъёсъя министерстволэсь дипломзэ но синпель кузьымзэ басьтӥз.

Вероника Вениаминовна мыло-кыдо ужа «Балтасинский» заказникысь инспекторъёсын, озьы ик Казаньысь аграрной университетэн агротехнологияя ӧрен герӟаськем проект улсын. Пусйыны кулэ: гурт возёсэн но лесотехнической профилен тунсыкъяськон будэ шуыса, тросэз выпускникъёс КГАУ-е пыро.

2025-тӥ арын дышетскисьёсыныз ӵош со «Русское поле-2025» Огъяросси форуме пыриськиз.

Классэн кивалтӥсь но анай-атайёслэн командазы

Вероника Вениаминовналэн дышетон ужез классэн кивалтонэн люконтэм герӟаськемын. Со туж бадӟым саклык висъя семьяосын ужанлы: валче праздникъёсты ортчытон, Поволжьеысь каръёсы — Казане, Свияжске, Иннополисэ, Йошкар-Олае, Ижкаре — ӵош ветлонъёс нылпиосты но анай-атайёсты матэгес каро, юртто вордскем шаерзылэсь чеберлыксэ адӟыны, данъяськыны соин.

2017-тӥ арын солэн классысьтыз анай-атайёс нырысьсэ ёросысь «Секреты дружного класса» конкурсэ пыриськизы но нырысетӥ инты басьтӥзы. Сизьым ар ортчыса, 2024-тӥ арын мукет анайёс но атайёс та сям-йылолэз азьланьтӥзы но сӥё-дано кыкетӥ инты басьтӥзы.

— Секретэз туж огшоры но универсальной: анай-атайёслэн асьсэлэн мыло-кыдо луэмзы, вӧзазы луыны, ог-огзэс кылыны но дышетӥсьлы юрттыны дась луэмзы. Сыӵе семьяос вань дыръя, котькыӵе классэз зэмос команда карыны луэ, — оске Вероника Вениаминовна.

Семья — пыкет

Валамон, котькуд азинлыко дышетӥсь сьӧрын оскымон семья сылэ.

— Дышетӥсь, пе, пумтэм вапумъёс ӵоже визьмо но ӟеч луонлэсь кидысъёссэ кизе. Нош кин кужым сётэ аслыз дышетӥсьлы? Мынам тужгес матысь адямиосы — анай-атае, картэ, нылпиосы, — вера адӟем карымон дышетӥсь.

Вероника Вениаминовналэн кузпалыз, Андрей Петрович, «Сурнай» обществоын тракторист луыса ужа. Солэн профессиез дышетон удыслэсь кыдёкын ке но, со дышетӥсьёслэн сюлмаськонъёссы шоры валаса учке, кузпалызлы котьку юрттэ. Нимысьтыз таукарон кылъёс педагог аслаз анай-атаезлы вера: анаезлы Татьяна Валентиновналы — анайлы гинэ тупась сюлэмшӧдонэз понна, атаезлы Вениамин Степановичлы — юн оскон сётэмез понна.

— Вань сюлмысьтым сӥзисько соослы тазалык. Соослэн асьсэлэн ужъёссылы кужымзы мед луоз, нош сюлмаськыны мугъёссы ӧжытгес мед луозы, — вера Вероника Егорова.

Кылпум

Вань сыӵе профессиос, кудъёссэ визьмын быръё, нош вань сыӵеосыз, кудъёсыз трос аръёс талэсь азьло сюлэм косэмъя быръемын. Котькуд нунал Вероника Вениаминовна возьматэ: ӵапак сыӵе сюлэм быръёнлэсь быдэс династилэн вуоноез кылдэ. Медведевъёс но Егоровъёс кадь династиос вань дыръя дышетӥсьёслэн ӟеч кылъёссы школаослэн борддоръёсазы кема чузъяськозы на, вормонъёссылэн географизы эшшо но паськыталоз, дышетсконлэн вуоноез оскымон киын луоз.