Шуйгурт: укмыс юртэн удмурт гурт (фоторепортаж)

Балтась ёросамы вань одӥг пичи гинэ удмурт гурт — Ушминка шурлэн бур палаз интыяськем Шуйгурт, яке Шор Ушма. Малпалод, со огшоры пичи гурт — сыӵе гуртъёсын туала дыре нокинэ уд паймыты ни. Но та гуртлэн аслаз кышкыт, но тунсыко легендаосыз вань.

Верало, кемалась-кемалась Уйпал нюкын шайтанъёс интыяськемын вылэм шуыса. Но Шуйгуртын улӥсьёс нырысь та сярысь номыр тодымтэзы — валъёс гурт калыклэсь кизем музъемъёссэс лёганы кутскемзы бере гинэ тодӥллям. Огпол гуртын улӥсьёс, шайтанъёс мед лякиськозы шуыса, валъёссылэсь тыбырзэс сирен зыраллям. Таӵе учыр бере шайтанъёс, пе, гурт калыкез каргиллям но гуртазы 8 корка сяна юртъёс медаз кыле шуыса вераллям. Со дырысен, пе, Шуйгуртын солэсь трос юртъёс ӧвӧл (тунсыко, туннэ нуналэ гуртын зэмзэ но 9 юрт гинэ).

Та легенда сярысь тодыса мынӥ Шуйгуртэ. Вуэм бере, кудӥзлэсь гуртын улӥсьлэсь гинэ та сярысь юалляськыны ӧй кутскы, соос пальпотыса веразы, та легендаез гуртын котькин тодэ шуыса.    

— Гуртлэн пӧртэм легендаосыз вань ке но, татын огшоры калык улэ, — пумитазы Шуйгуртын улӥсьёс. — Гуртмы пичи ке но, милемлы, татын улӥсьёслы, со туж матын. Ми сое туж яратӥськомы.  Нокыӵе легендаосын но милемыз уд кышкаты.

Шуйгурт Вылын но Улын Ушма гуртъёс куспын вырйылын интыяськемын. Уйпаласен но лымшорпаласен гуртэз мур нюкъёс котырто. Уйпаласез «Шайтан нюк» шуыса нимаське вылэм, со нюк сьӧрын излэсь карьер интыяськемын. Лымшорпаласен — «Дема луд» шуыса нимаськись пичи гинэ нюлэс. Со нюлэсэз Дема нимо пиосмурт мерттэм, пе, соин нюлэслы сыӵе ним сётӥллям. Нюлэслэн кык люкетэз вань: шундыпуксён палан сусыпуос будо, нош шундыӝужан палан — кызъёс. Гуртэ пырон дорын ӵыпет интыяськемын. Огъя вераса, туж чебер но шулдыр инты. 

Гуртлы синмаськемме адӟыса, кузпалъёс Мария но Валерий Автономовъёс (ӵапак соос монэ гуртэн тодматыны соглаш луизы) веранзэс кутскизы:

— Азьло, кылем дауръёсы, Шуйгурт бадӟым гурт луэм. Металлоискательёсын лыктыса вашкала арбериосты, коньдонъёсты, чеберъянъёсты утчаса ветлӥсьёс но луизы татын. Трос шедьтӥзы: киросъёсты, кашъёсын зундэсъёсты… Озьы бере, та вашкала дыръёсы гуртмы бадӟымгес луэм шуонэз эшшо огпол юнматэ.

Ог-огзы дорын матэ интыяськем куинь Ушма гуртъёс — Вылын Ушма, Улын Ушма но Шуйгурт — пӧлысь Шуйгурт самой «мӧйыез» вылэм. Вылын но Улын Ушмаос берлогес кылдӥллям. Тазьы верало асьсэос гуртын улӥсьёс.

Шуйгуртын туннэ нуналэ, кызьы гожтӥ ини, укмыс семья улэ: Степановъёс, Павловъёс, Автономовъёс (кык семья), Манашевъёс, Григорьевъёс, Фёдоровъёс, Алексеевъёс, Матюнинъёс. Татын тросгес пенсионеръёс уло, егитъёс татчы улыны уг кыстӥсько. Та понна Автономов Валерий Яковлевичлэн сюлмыз висе вылэм. Со ачиз та гуртын вордскем, гумырез ӵоже та гуртын улэ ини. Кышноез Мария Ивановна Вылын Ушмаысь.

— Тодам вайисько на, кызьы сюресъёс луымтэ дыръя, апаратӥ, лымытӥ секытэн ветлӥмы пыдын яке автобусэн. Туала дыре пичи гинэ гуртамы но каньыллыкъёс вань — сюресэ самообложение амалэн люкам коньдонэн векчи из вӧлдӥзы, 2018-тӥ арын ӵыпет лэсьтӥзы. Газ, ву, тыл но кемалась вань ини. Ёрос центр но кыдёкын ӧвӧл — шумпотыса улы гинэ, — шуэ Валерий Яковлевич.

Пенсие потон арлыдозь вуымтэ адямиос ваньзы шуымон «Сурнай» обществоын ужало. Колхоз соосты азьло дырысен «сюдэ» вылэм. Улын Ушмаын куке но ёросамы гинэ ӧвӧл, республикаямы но тодмо луэм кирпич завод но ужа вал. Кузпалъёслэн верамзыя, со ас дыраз туж трос адямилы ужан инты сётэм, нылпиос гинэ но, гужем каникулъёсы отчы ужаны ветлыса, анай-атайёссылы уксё ласянь юрттыны быгатӥллям.

Шуйгурт бадӟымгес луыкуз, татын асьсэлэн клубзы но, солэн юртаз библиотека но луэм. «Айкайёс» но, «Шулдыр ӝытъёс» но со клублэн сценаяз выступать кариллям. Магазин гуртын ӧвӧл, луымтэ но. Арнялы куинь пол Вылын Ушмае автолавка ветлэ, соку Шуйгуртын улӥсьёс отчы басьяськыны мыно. Но туала дыре тросэзлэн машинаоссы вань бере, соослы Балтасьысь магазинъёсы ветлон нокыӵе шуг-секытъёсты уг кылдыты ини. Но шуг-секытъёссы мукет ужпумъя вань вылэм.

— Гуртын адямиез пудо сюдэ. Но гуртамы туннэ нуналэ пудоез тросэн вордӥсьёс ӧвӧл ини, одӥг-кык скал вордӥськомы. Малы ке шуоно кутьы возьман понна интымы ӧвӧл. Кутьы Вылын Ушмае потэ, пудоосты пумитан понна отчы вуытозь ветлоно, ӧд ке пумита — соос адямилэн сад-бакчаосазы пырыны быгато. Соин пудо туж вордэммы уг поты. Пенсилы улӥськомы, — азьланьто веранзэс Автономовъёс.

Вераськонамы Валерий Яковлевичлэн двоюродной выныз Николай Петрович Автономов итӥськиз.

— Шуг-секытъёс сярысь вераськон потэм бере, мынам ошмесмы сярысь но кӧня ке кыл вераме потэ вал. «Шуйгурт ошмесмес» 2017-тӥ арын самообложение амалэн люкам коньдонэн «Мелиоратор» организация благоустроить кариз, та гурт калыкмы понна гинэ ӧвӧл, вань ёрос понна бадӟым шумпотон луиз. Татчы вулы асьмелэнъёс гинэ ӧвӧл, Казаньысь бертэм куноос но вуо. Ошмесмы дорысь машинаослэн лыдзы ноку но уг кулэсмы. Тӥ но отчы мыныса вузэ юыса уте ай, мукет ву юэмды но уз поты ни. Но вань одӥг проблема: толалтэ ошмесысь ву басьтыны уг луы — со кынме. Трубазэ поттыса, шонер лэзьыны кулэ вал. Оло, газетысь та шуг-секытмы сярысь лыдӟыса, та уж борды ёросысь кивалтэт басьтӥськысал, — шуиз воргорон.

Та сяна, мукет сюлмаськытӥсь ужпумъёссы но вань шуйгуртъёслэн. Кылсярысь, гуртоосынызы кыӵе ке юанъёсты эскерон понна пумиськыса пукыны интызы ӧвӧл. Туж кулэ луиз ке, сыӵе пумиськонъёсты урамын ортчыто вылэм.

Пичи гинэ коллективен улэмысьтызы, куинь гуртын улӥсьёс азьло дырысен куспазы эшлыко, ог-огзылы юрттыса уло. Шуйгуртъёс та гуртын улэмзылы шумпото — татын губияны, боры люканы интыоссы трос, мылыд ке потӥз, ӵыпетэ чорыганы ветлыны луэ. Арнялы огпол жуг-жаг люканы машина лыктэ. Мукет тодмотэм машинаос уг ветло, мултэс куара ӧвӧл. Гуртлэн пумаз Сочиын улӥсьёсын пуктэм юрт сылэ. Татчы соос арлы кӧня ке пол шутэтскыны берто вылэм.

Ӧвӧл Шуйгуртын адямиослы кулэ луись клуб но библиотека, ФАП но школа-нылпи сад (нылпиос Вылын Ушмаысь школа-нылпи садэ но Покчи Лӧзяысь школае дышетскыны ветло), но татын вань огъя луон, валче улон. Шудо улон понна Шуйгуртын улӥсьёслы со гинэ но тырме.